បក្សប្រជាជន បញ្ជូនឈ្មោះ បេក្ខជន តំណាងរាស្ត្រ ជំនួសលោក ស៊ិក ប៊ុនហុក ទៅគ.ជ.ប.
RFA / វិទ្យុ អាស៊ី សេរី | ១៧ មេសា ២០១៥
ទីស្ដីការគណៈកម្មាធិការជាតិរៀបចំការបោះឆ្នោត (គ.ជ.ប។ RFA
ឈ្មោះបេក្ខជន តំណាងរាស្ត្រ គណបក្ស ប្រជាជនកម្ពុជា មណ្ឌលកំពង់ធំ ដែលនឹងឡើង ធ្វើជាសមាជិក សភា ជំនួស លោក ស៊ិក ប៊ុនហុក ត្រូវ បានគណបក្ស ប្រជាជនកម្ពុជា បញ្ជូនទៅកាន់ គណៈកម្មាធិការ ជាតិ រៀបចំ ការបោះឆ្នោត រួចហើយ កាលពីថ្ងៃ ទី១៧ មេសា។ មន្ត្រី គ.ជ.ប. លើកឡើង ថា, នីតិវិធី នៃការផ្លាស់ប្ដូរ នឹងចាប់ផ្តើម ធ្វើនៅថ្ងៃច័ន្ទ សប្ដាហ៍ក្រោយ។
ជាទូទៅ នៅពេល ដែលតំណាងរាស្ត្រ ចេញពីគណបក្ស នយោបាយ ណាមួយ មិនអាច បន្តបំពេញ តួនាទី ឬលាលែង ចេញពីសមាជិក រដ្ឋសភា បេក្ខជន តំណាងរាស្ត្រ ដែលឈរឈ្មោះ នៅលេខរៀង បន្តបន្ទាប់ នឹងត្រូវ បានរដ្ឋសភា ប្រកាសសុពលភាព ជាតំណាងរាស្ត្រ ថ្មី ជំនួស តំណាងរាស្ត្រ ចាស់ បន្ទាប់ពីគណៈកម្មាធិការ ជាតិ រៀបចំ ការបោះឆ្នោត ពិនិត្យឃើញ ថា, ការផ្លាស់ប្ដូរ នោះ ស្របតាមច្បាប់។
តំណាងរាស្ត្រ គណបក្ស ប្រជាជនកម្ពុជា មណ្ឌលកំពង់ធំ លោក ស៊ិក ប៊ុនហុក ដែលត្រូវ បានរដ្ឋសភា បោះឆ្នោត ទុកចិត្ត ធ្វើជាប្រធាន គ.ជ.ប. ថ្មី, ហើយ ដែលទើប បានប្រកាស ចូលកាន់តំណែង កាលពីពេល ថ្មីៗនេះ, តំណែងតំណាងរាស្ត្រ របស់លោក នឹងត្រូវ ជំនួស ដោយបេក្ខជន តំណាងរាស្ត្រ មណ្ឌលកំពង់ធំ ផ្សេងទៀត។
អគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា ឲ្យដឹងនៅថ្ងៃទី១៨ មេសា ថា គ.ជ.ប បានទទួលរួចហើយពីគណបក្សប្រជាជនកម្ពុជា ឈ្មោះបេក្ខជនតំណាងរាស្ត្រមណ្ឌលកំពង់ធំ ដែលនឹងត្រូវមកជំនួសតំណែងសមាជិករដ្ឋសភារបស់ លោក ស៊ិក ប៊ុនហុក។ លោក ទេព នីថា ឲ្យដឹងដែរថា បេក្ខជនតំណាងរាស្ត្រថ្មីនោះ គឺលោក ជា អឿង។
បើតាម លោក ទេព នីថា បេក្ខជនតំណាងរាស្ត្រគណបក្សប្រជាជនកម្ពុជា មណ្ឌលកំពង់ធំ ដែលឈរឈ្មោះបន្ទាប់ពី លោក ស៊ិក ប៊ុនហុក គឺលោក ឈុន ឈន់។ ប៉ុន្តែដោយសារតែ លោក ឈុន ឈន់ បានសុំលាឈប់ពីបេក្ខភាពតំណាងរាស្ត្រ ដូច្នេះបេក្ខជនបន្ទាប់ទៀត គឺត្រូវជា លោក ជា អឿង។
លោក ទេព នីថា បញ្ជាក់ថា លោកបានបញ្ជូនឯកសាររបស់ លោក ជា អឿង ទៅកាន់នាយកដ្ឋាននីតិកម្មនៃ គ.ជ.ប ដើម្បីពិនិត្យមើលរួចហើយ ហើយការសម្រេចផ្លាស់ប្ដូរនឹងមិនចំណាយពេលវេលាយូរនោះទេ៖ «ថ្ងៃ សុក្រ យើងចូលធ្វើការ ហើយលិខិតយើងទទួលថ្ងៃដែរហើយ អ៊ីចឹងទេប្រហែលដល់ថ្ងៃច័ន្ទ បានយើងសម្រេច ហើយមិនយូរទេ ព្រោះថាយើងគ្រាន់តែផ្ទេរឈ្មោះ គ.ជ.ប នឹងចេញសេចក្តីសម្រេចប្រគល់ទៅសភាវិញ។»
ក្នុងពេលបោះឆ្នោតជ្រើសតាំងតំណាងរាស្ត្រកាលពីខែកក្កដា ឆ្នាំ២០១៣ មណ្ឌលកំពង់ធំ មានអាសនៈតំណាងរាស្ត្រសរុបចំនួន ៦អាសនៈ ក្នុងនោះគណបក្សប្រជាជនកម្ពុជា ទទួលបាន ៣អាសនៈ ហើយគណបក្សសង្គ្រោះជាតិ ទទួលបាន ៣អាសនៈ។
កាលពីពេលថ្មីៗនេះ រដ្ឋសភាក៏បានប្រកាសទទួលស្គាល់បេក្ខភាព លោក សុខ សូកាន កូនប្រុសរបស់ លោក សុខ អាន ជាតំណាងរាស្ត្រថ្មីគណបក្សប្រជាជនកម្ពុជា នៃមណ្ឌលតាកែវ ជំនួស លោក សូរ ឃុន ដែលបានទទួលមរណភាព។ ក្នុងពេលជាមួយគ្នា រដ្ឋសភាក៏បានប្រកាសទទួលស្គាល់ លោក ដាង ចំរើន ជាតំណាងរាស្ត្រថ្មីគណបក្សសង្គ្រោះជាតិ នៃមណ្ឌលកំពត ជំនួស លោក វ៉ាន សំអឿន ដែលបានលាលែងចេញពីសមាជិកសភាទៅចុះចូលជាមួយគណបក្សប្រជាជនកម្ពុជា៕
No comments:
Post a Comment