គណបក្ស នយោបាយ ធំៗ សម្រុកចុះជួប ម្ចាស់ឆ្នោត នៅមូលដ្ឋាន
RFA / វិទ្យុ អាស៊ី សេរី | ១០ ឧសភា ២០១៥
លោក សម រង្ស៊ី (ស្ដាំ) ប្រធានគណបក្សសង្គ្រោះជាតិ និងលោក កឹម
សុខា អនុប្រធានគណបក្សសង្គ្រោះជាតិ ក្នុងវេទិការាស្ត្រ
និងតំណាងរាស្ត្រនាឃុំផ្អាវ ស្រុកបាធាយ ខេត្តកំពង់ចាម នៅថ្ងៃទី១
ខែឧសភា ឆ្នាំ២០១៥។ Photo from Kem Sokha Facebook Page
តំណាង គណបក្ស នយោបាយ បានធ្វើសកម្មភាព ប្រកួតប្រជែង ខ្លាំងក្លា នៅពេល រដូវកាល ប្រកួតប្រជែង ការបោះឆ្នោត ជិតមកដល់, ពិសេស គណបក្ស ដែលមាន អាសនៈ នៅក្នុងរដ្ឋសភា, គឺ បានចុះ មូលដ្ឋាន ជួបម្ចាស់ឆ្នោត និងធ្វើសកម្មភាព ផ្សេងៗ ដើម្បី ទាញយក ប្រជាប្រិយភាព របស់ខ្លួន។ ក៏ប៉ុន្តែ សម្រាប់បរិបទ នយោបាយ នៅពេលនេះ មិនដូច ពីមុនទៀតឡើយ, បើ ទោះបី ជាការបោះឆ្នោត អាណត្តិ ទី៦ នៅមាន រយៈពេល វែងទៀតក្តី, ប៉ុន្តែ យុទ្ធនាការ ចុះមូលដ្ឋាន ស្វែងរក ប្រជាប្រិយភាព របស់ គណបក្ស នយោបាយ ធំៗ នៅកម្ពុជា បានចាប់ផ្ដើម តាំងពីដើម អាណត្តិ។
គេ សង្កេតឃើញ ថា, ក្រោយពីបញ្ចប់ភាពជាប់គាំងនយោបាយនោះ ទាំងបក្សកាន់អំណាច ទាំងបក្សប្រឆាំងបានចុះមូលដ្ឋានគ្រប់ទិសទីដើម្បីបង្ហាញទំនុក ចិត្តដល់ប្រជាជនផង និងបង្ហាញពីសមិទ្ធផលថ្មីៗរបស់ខ្លួនផង។ សកម្មភាពទាំងនេះ អ្នកវិភាគយល់ថា អ្នកនយោបាយចាប់ផ្ដើមអោយតម្លៃខ្ពស់ និងគោរពម្ចាស់ឆ្នោតជាងមុន។
អ្នកវិភាគលើកឡើងថា បច្ចុប្បន្ននេះតម្លៃប្រជាពលរដ្ឋខ្មែរក្នុងក្រសែភ្នែកអ្នកនយោបាយ កាន់តែឡើងខ្ពស់ជាងមុន ដែលធ្វើឲ្យគណបក្សនយោបាយជាប់ឆ្នោតទាំងពីរចាប់ផ្ដើមផ្លាស់ប្ដូរ យុទ្ធសាស្ត្រនយោបាយរបស់ខ្លួន ដោយសម្រុកចុះមូលដ្ឋានដើម្បីស្វែងរកប្រជាប្រិយភាពនៅមុនរដូវកាល បោះឆ្នោតអាណត្តិទី៦ បានមកដល់។
មេដឹកនាំគណបក្សសង្គ្រោះជាតិ តាំងពីដើមអាណិតមកម្ល៉េះ បានចុះមូលដ្ឋានគ្រប់ទិសទីទាំងក្នុងនិងក្រៅប្រទេស ដើម្បីពង្រីករកអ្នកគាំទ្រកាន់តែច្រើនថែមទៀត។ គណបក្សសង្គ្រោះជាតិ ដែលជាគណបក្សប្រឆាំងដែលមានសំឡេងប្រកៀកប្រកិតគ្នាកាលពីបោះឆ្នោត នីតិកាលទី៥ កន្លងទៅ។ គណបក្សនេះ បានធ្វើសកម្មភាពទាំងក្នុងស្រុក និងក្រៅស្រុក។ មេដឹកនាំគណបក្សនេះ បានដឹកនាំតំណាងរាស្ត្ររបស់ខ្លួនយ៉ាងសស្រាក់សស្រាំចុះមូលដ្ឋានសួរ សុខទុកប្រជាពលរដ្ឋ និងបានបញ្ចេញសារនយោបាយផ្សេងៗ ដល់អ្នកគាំទ្ររបស់ខ្លួនក្នុងការទាញយកប្រជាប្រិយភាព និងត្រៀមប្រកួតប្រជែងជាមួយគណបក្សកាន់អំណាចនៅពេលខាងមុខ។ នៅពេលចុះមូលដ្ឋានម្តងៗ គណបក្សសង្គ្រោះជាតិ តែងតែបង្ហាញលទ្ធផលខ្លះៗជូនប្រជាពលរដ្ឋ បន្ទាប់ពីសមាជិកគណបក្សសង្គ្រោះជាតិ ចូលរដ្ឋសភា ជាពិសេសកំណែទម្រង់នៃការបោះឆ្នោត។
កាលពីថ្ងៃទី៣ ខែឧសភា ថ្មីៗនេះ ប្រធាន និងអនុប្រធានគណបក្សសង្គ្រោះជាតិ បានដឹកដៃគ្នាចុះជួបពលរដ្ឋមានជម្លោះដីធ្លីនៅស្រុកឆ្លូង ខេត្តក្រចេះ និងនៅស្រុកក្រូចឆ្មារ ខេត្តត្បូងឃ្មុំ ទៀត ដូចដែលមេដឹកនាំទាំងពីររូបនេះ ធ្លាប់បានចុះទៅខែត្រផ្សេងៗទៀត។ រីឯសកម្មភាពនៅបរទេសវិញ លោក កឹម សុខា និងលោក សម រង្ស៊ី ហាក់ផ្លាស់ប្ដូរគ្នាអញ្ជើញទៅបរទេស។ លោក កឹម សុខា ត្រឡប់មកពីសហរដ្ឋអាមេរិក កាលពីប៉ុន្មានខែមុន មិនយូរប៉ុន្មាន លោក សម រង្ស៊ី បានចេញទៅសហរដ្ឋអាមេរិក កាលពីថ្ងៃទី៧ ខែឧសភា ទៅជួបអ្នកគាំទ្រវិញម្ដង។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ អះអាងថា គណបក្សសង្គ្រោះជាតិ បានពលីគ្រប់បែបយ៉ាងដើម្បីប្រទេសជាតិ ប្រជាជន និងធ្វើឲ្យប្រទេសកម្ពុជា ក្លាយជាប្រទេសប្រកាន់របបលទ្ធិប្រជាធិបតេយ្យពិតប្រាកដ។
ការបោះឆ្នោតនៅអាណត្តិមុនៗ មជ្ឈដ្ឋានទូទៅសង្កេតឃើញថា មានតែអំឡុងពេលប៉ុន្មានខែមុនបោះឆ្នោត ជាពិសេសក្នុងពេលយុទ្ធនាការឃោសនាបោះឆ្នោតប៉ុណ្ណោះ ដែលអ្នកនយោបាយធ្វើសកម្មភាពក្នុងការចុះជួបប្រជាពលរដ្ឋ និងយកចិត្តអ្នកបោះឆ្នោតខ្លាំងជាងគេ។ ប៉ុន្តែក្រោយការបោះឆ្នោតបញ្ចប់ទៅ និងបានរៀបចំរដ្ឋាភិបាលសភាហើយនោះ សកម្មភាពរបស់អ្នកនយោបាយក៏ស្ងប់ស្ងាត់ទៅវិញជាធម្មតា ជារួមអ្នកនយោបាយកម្រទៅជួបពលរដ្ឋណាស់។
សម្រាប់គណបក្សប្រជាជនកម្ពុជា ក្រោយទទួលរងទណ្ឌកម្មពីម្ចាស់ឆ្នោតដែលធ្វើឲ្យគណបក្សនេះបាត់បង់ អាសនៈជាង ២០អាសនៈនៅក្នុងរដ្ឋសភានោះ លោកនាយករដ្ឋមន្ត្រី ហ៊ុន សែន បានប្រកាសធ្វើកំណែទម្រង់ស្ថាប័នរដ្ឋភ្លាមៗ បន្ទាប់ពីលោកបានស្បថចូលកាន់តំណែងជាថ្មីនៅក្រោយពេលបោះឆ្នោត នោះ។ លោក ហ៊ុន សែន បានណែនាំដល់មន្ត្រីខ្លួនអោយងូតទឹក ដុសក្អែល និងឆ្លុះកញ្ចក់ខ្លួនឯងផង។ តាំងពីពេលនោះ មន្ត្រីទាំងថ្នាក់ជាតិ និងថ្នាក់ក្រោមជាតិ បានធ្វើវេទិកាសាធារណៈនៅតាមមូលដ្ឋានមិនសូវដាច់ឡើយ ដើម្បីស្ដាប់សំណូមពរ និងដោះស្រាយបញ្ហាសុខទុក្ខប្រជាពលរដ្ឋដើម្បីជាការលួងចិត្ត។
ទោះជាយ៉ាងនេះក្ដី នៅក្នុងការដឹកនាំរដ្ឋរបស់គណបក្សប្រជាជនកម្ពុជា ជាង ៣០ឆ្នាំមកនេះ មានរឿងរ៉ាវជាច្រើនដែលគណបក្សនេះដោះស្រាយជូនម្ចាស់ឆ្នោតបានទាំង ស្រុងនោះទេ។ នៅមានបញ្ហាជាច្រើនទៀតដែលរដ្ឋាភិបាលមិនទាន់ធ្វើកំណែទម្រង់បាន នៅឡើយ ដូចជា ការដោះស្រាយបញ្ហាជម្លោះដីធ្លី ការទប់ស្កាត់បទល្មើសព្រៃឈើ ប្រព័ន្ធយុត្តិធម៌ និងការលុបបំបាត់អំពើពុករលួយជាដើម។
អ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ មានប្រសាសន៍ថា តាំងពីដើមមកគណបក្សកាន់អំណាចបានចុះជួបប្រជាពលរដ្ឋរហូត ដើម្បីដោះបញ្ហានានាជូនពួកគាត់។ លោកបន្តថា គណបក្សប្រជាជនកម្ពុជា ជាគណបក្សធ្វើមិនមែនសន្យាខ្យល់ឡើយ។
គណបក្សហ៊្វុនស៊ិនប៉ិចវិញ ក៏មិននៅស្ងៀមដែរ ក្រោយបង្រួមបង្រួមគ្នាឡើងវិញ បន្ទាប់ពីបែកបាក់គ្នាអស់មួយទសវត្ស។ សម្ដេចក្រុមព្រះ នរោត្តម រណឫទ្ធិ តែងតែដឹកនាំមន្ត្រីបក្សចុះជួបប្រជានុរាស្ត្រស្ទើរគ្រប់ខេត្តក្រុង ដើម្បីកៀរគរអ្នករាជានិយម និងសីហនុនិយមឡើងវិញ។ នៅចំពោះមុខសមាជិក សមាជិកា សហជីវិន សហជីវី កន្លងទៅ អតីតនាយករដ្ឋមន្ត្រីទីមួយកាលពីអាណត្តិទីមួយ គឺសម្ដេចក្រុមព្រះ នរោត្តម រណឫទ្ធិ តែងតែរម្លឹកពីសមិទ្ធផលមួយចំនួនដែលជាស្នាព្រះហស្តរបស់ព្រះអង្គ ក្នុងគ្រាកាន់អំណាច។
ទាក់ទងនិងបញ្ហានេះ មន្ត្រីអ្នកនាំពាក្យគណបក្សហ៊្វុនស៊ិនប៉ិច លោក ញ៉េប ប៊ុនជិន មានប្រសាសន៍ប្រាប់វិទ្យុអាស៊ីសេរីថា បើទោះបីជាសម្ដេចក្រុមព្រះ នរោត្តម រណឫទ្ធិ អវត្តមាននៅតាមកម្មវិធីសំណេះសំណាលបន្ទាប់ពីជួបគ្រោះថ្នាក់ចរាចរណ៍ ក្តី ប៉ុន្តែអនុប្រធាននៃគណបក្សនេះ នៅតែបន្តចុះជួបប្រជាពលរដ្ឋដដែល។ លោកអនុប្រធានមានសារនយោបាយជាច្រើនត្រូវបានបង្ហើរតាមឧគ្ឃោសនស័ព្ទ ជូនម្ចាស់ឆ្នោត។
អ្នកវិភាគនយោបាយ និងជាអ្នកស្រាវជ្រាវផ្នែកអភិវឌ្ឍន៍សង្គម លោកបណ្ឌិត កែម ឡី មើលឃើញថា ការចុះទៅមូលដ្ឋានរបស់អ្នកនយោបាយនោះ មានរូបភាពពីរ គឺទីមួយ ជួយដោះស្រាយបញ្ហាសុខទុក្ខរបស់ប្រជាពលរដ្ឋពិតប្រាកដ និងទី២ ចុះធ្វើនយោបាយប្រជាភិថុតិ ដើម្បីបន្តបោកប្រាស់សន្លឹកឆ្នោតប្រជាពលរដ្ឋ។
យ៉ាងណាក៏ដោយ លោក កែម ឡី បញ្ជាក់ថា បច្ចុប្បន្ននេះ ប្រជាជនកម្ពុជា ចាប់ផ្ដើមយល់ពីនយោបាយកាន់តែច្បាស់ និងមិនសូវចាញ់បោកអ្នកនយោបាយដូចមុនទៀតឡើយ។ ដូច្នេះការធ្វើនយោបាយសង្គ្រាមពាក្យសម្ដីធ្ងន់ៗ ប្រជាភិថុតិ និងការធ្វើនយោបាយបង្ហូរឈាមគ្នា លែងមានន័យទៀតហើយ ពោលគឺអ្នកនយោបាយត្រូវតែពង្រឹងគុណភាពនយោបាយអោយកាន់តែខ្លាំងជាង មុនដែរ ដើម្បីជោគជ័យនៅអាណត្តិក្រោយ។
របាយការណ៍នៃសកម្មភាពតំណាងរាស្ត្ររបស់គណបក្សនៅក្នុងរដ្ឋសភាទាំង ពីរដែលឃ្លាំមើលដោយគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (Comfrel) ឆ្នាំ២០១៤ បានបង្ហាញថា គណបក្សប្រជាជនកម្ពុជា បានចុះមូលដ្ឋានចំនួន ៦៦០ដង ចំណែកឯគណបក្សសង្គ្រោះជាតិ ចុះមូលដ្ឋានបានចំនួន ៦៦៤ដង បើប្រៀបធៀបនឹងឆ្នាំ២០១៣ មានការកើនឡើង។
ប្រធានកំណែទម្រង់ការបោះឆ្នោត ហៅកាត់ថា អឺរ៉ា (ERA) លោក គល់ បញ្ញា និងជានាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា លោក គល់ បញ្ញា បញ្ជាក់ថា កំណើននៃសកម្មភាពចុះមូលដ្ឋាននេះ គឺដោយសារសម្ពាធនៃការប្រកួតប្រជែង និងកម្រិតនៃការទាមទារឲ្យមានការដោះស្រាយបញ្ហារបស់ប្រជាពលរដ្ឋ ច្រើន៕
No comments:
Post a Comment