ពលរដ្ឋ អំពាវនាវ ឲ្យទប់ស្កាត់ ជនជាតិ វៀតណាម នេសាទ ខុសច្បាប់ នៅព្រៃវែង
RFA / វិទ្យុ អាស៊ី សេរី | ០១ ឧសភា ២០១៥
សកម្មភាពនេសាទត្រីរបស់ជនជាតិវៀតណាម
នៅខាងលិចវត្តពោធិ៍ថ្មី ភូមិពោធិ៍ថ្មី ឃុំកោះសំពៅ ស្រុកពាមជរ
ខេត្តព្រៃវែង កាលពីថ្ងៃទី១៧ ខែសីហា ឆ្នាំ២០១៣។ RFA/Hum Chamroeun
ពលរដ្ឋរស់នៅឃុំពាមមានជ័យ ស្រុកពាមរ៍ ខេត្តព្រៃវែង អំពាវនាវឲ្យអាជ្ញាធរពាក់ព័ន្ធ បង្ក្រាបបទល្មើសនេសាទបង្កដោយជនជាតិវៀតណាម ដោយប្រើឧបករណ៍អួនក្នុងទំហំធំលើសពីច្បាប់កំណត់។
ការអំពាវនាវនេះ ធ្វើឡើងស្របពេលដែលអ្នកភូមិសង្កេតឃើញជនជាតិវៀតណាម ដែលនេសាទនៅទន្លេមេគង្គក្នុងតំបន់អ្នកលឿងផ្នែកខាងលើ ប្រើប្រាស់ឧបករណ៍នេសាទជាទ្រង់ទ្រាយធំយ៉ាងអនាធិបតេយ្យ។ ជនជាតិវៀតណាម ទាំងនោះអាចប្រមូលផលត្រីបានម្តងរាប់តោន ដែលអាចជាបញ្ហាបង្កឲ្យធនធានជលផលទន្លេមេគង្គធ្លាក់ចុះយ៉ាងគំហុក។ ចំណែកមន្ត្រីសង្គមស៊ីវិលលើកឡើងថា មន្ត្រីជំនាញ និងអាជ្ញាធរនៅតំបន់នោះ ត្រូវទទួលខុសត្រូវបញ្ហានេះ។
ពលរដ្ឋរស់នៅភូមិបន្លេច ឃុំពាមមានជ័យ បារម្ភធនធានមច្ឆជាតិនៅទន្លេមេគង្គ ប្រឈមការបាត់បង់ ព្រមទាំងប្រភេទត្រីកម្រមួយចំនួនត្រូវផុតពូជ បើមន្ត្រីជំនាញនៅតែបណ្តែតបណ្តោយឲ្យជនជាតិវៀតណាម នេសាទដោយប្រើឧបករណ៍ខុសច្បាប់ជាទ្រង់ទ្រាយធំ។
អ្នកភូមិអះអាងថា វៀតណាម បានប្រើឧបករណ៍នេសាទមានបណ្តោយជាង ៥០០ម៉ែត្រ និងទទឹងជាង ២០០ម៉ែត្រ ជម្រៅដល់បាតទន្លេ អាចនេសាទតាមទំហំនៃទន្លេទាំងរដូវប្រាំង និងរដូវវស្សា ព្រមទាំងប្រមូលត្រីទាំងតូចទាំងធំម្តងៗរាប់តោន។ ពលរដ្ឋបន្តថា ជនជាតិវៀតណាម កំពុងនេសាទទាំងយប់ទាំងថ្ងៃនៅឃុំពាមមានជ័យ រហូតដល់កោះចម្រើន បន្ទាប់ពីជនជាតិវៀតណាម ទាំងនោះបាននេសាទនៅទន្លេមេគង្គ ស្រុកកៀនស្វាយ និងស្រុកលើកដែក ខេត្តកណ្ដាល កន្លងទៅ។
តំណាងអ្នកភូមិដែលមានមុខរបរជាអ្នកនេសាទ លោក យាន់ សុថាន ឲ្យដឹងថ្ងៃទី១ ឧសភា ថា បន្ទាប់ពីវៀតណាម ចាប់ផ្ដើមនេសាទប្រើប្រាស់ឧបករណ៍ខុសច្បាប់យ៉ាងអនាធិបតេយ្យ លោកអង្កេតឃើញថា បរិមាណត្រីធ្លាក់ចុះយ៉ាងគំហុក។ លោកបន្តថា សកម្មភាពនេសាទរបស់វៀតណាម ប្រើទូកធុនធំចំនួនពីរគ្រឿង សម្រាប់អូសទាញ និងសំណាញ់ស្វិតមានជម្រៅជ្រៅ ដែលអាចចាប់យកត្រីបានស្ទើរទាំងអស់ និងគ្រប់ប្រភេទ ដែលអាចធ្វើឲ្យប្រភេទត្រីកម្រមួយចំនួនត្រូវផុតពូជ។ លោកថា សកម្មភាពនេសាទនេះកើតឡើងជាច្រើនឆ្នាំមកហើយ បង្កឲ្យពលរដ្ឋមានមុខរបរនេសាទជាលក្ខណៈគ្រួសារបាត់បង់ចំណូល។ ជាងនេះទៀតសោត ឧបករណ៍នេសាទរបស់វៀតណាម បានបំផ្លាញឧបករណ៍នេសាទជាលក្ខណៈគ្រួសាររបស់ពលរដ្ឋនៅតំបន់នោះ ដូចជាមងជាដើម ដោយគ្មានការទទួលខុសត្រូវ៖ «យួន វារកត្រីបាន យើងប្រជាជនឃើញត្រីវារកបាន ស្ដាយជំនួស បណ្ដោយតែពួកវារកតែពីរឆ្នាំទៀតត្រីអស់។ តែឥឡូវដាច់ពូជអស់ ស្ងាត់អស់ហើយតាំងពីវាអូសអាហ្នឹងមក ពាយត្រីអស់ហើយ បើបណ្តោយឲ្យតែវារកគ្មានសល់ទេត្រី បើរកគ្មានខ្លាចប្រជាជនម្ចាស់ស្រុក គ្មានខ្លាចសមត្ថកិច្ចគិតតែរក។»
កាលពីឆ្នាំ២០១២ រដ្ឋាភិបាលលុបបំបាត់ការនេសាទជាលក្ខណៈទ្រង់ទ្រាយធំ និងអនុញ្ញាតឲ្យនេសាទជាលក្ខណៈគ្រួសារដោយប្រើឧបករណ៍នេសាទមាន ប្រវែងមិនលើសពី ៥០ម៉ែត្រ។ ចំណែកអធិការស្រុកពាមរ៍ លោក សេង ពន្លក ទទួលស្គាល់ថា ពិតជាមានការនេសាទនៅតំបន់នោះពិតមែន ប៉ុន្តែលោករង់ចាំការសហការជាមួយអាជ្ញាធរខេត្តកណ្ដាល និងអភិបាលស្រុក ព្រមទាំងមន្ត្រីជំនាញជាមុនសិន ព្រោះទីតាំងនេសាទខុសច្បាប់នោះភាគខ្លះឋិតនៅខេត្តព្រៃវែង និងភាគខ្លះទៀតឋិតក្នុងខេត្តកណ្ដាល៖ «ជលផលគេមានទូកមានផ្នែកខ្ញុំមានកម្លាំងអាវុធ ទាំងប៉ូលិស និងប៉េអិម មានតែកម្លាំងទេ តែយើងកំពុងសហការគ្នា។»
ក្នុងករណីនេះ អនុប្រធានរដ្ឋបាលជលផល លោកស្រី កាំង ឃីម មានប្រសាសន៍ថា លោកស្រីមិនទាន់ទទួលបានដំណឹងនេសាទខុសច្បាប់របស់ជនជាតិវៀតណាម ទេ ព្រោះមន្ត្រីមូលដ្ឋាននៅតំបន់នោះមិនបានផ្តល់ដំណឹង។ លោកស្រីធានាថា នឹងឲ្យមន្ត្រីមូលដ្ឋាននៅតំបន់នោះចាត់វិធានការតាមច្បាប់លើករណី នេះ បន្ទាប់ពីទទួលបានដំណឹងនេះ៖ «យើងខ្វះមន្ត្រី គ្នាយើងមានមន្ត្រីទៅឈរជើងណានៅហ្នឹង ២៤ម៉ោងនៅកន្លែងដែននេសាទ ហើយមានតែប្រជានេសាទនៅហ្នឹងឯង។»
ទាក់ទិនករណីនេះ នាយកប្រតិបត្តិអង្គការសម្ព័ន្ធភាព ដើម្បីអភិរក្សធនធានជលផល លោក ឱម សារ៉ាត់ ដាក់ការទទួលខុសត្រូវលើបញ្ហានេះលើអាជ្ញាធរមូលដ្ឋាន និងមន្ត្រីពាក់ព័ន្ធ។ លោកបន្តថា ការនេសាទរបស់ជនជាតិវៀតណាម កំពុងបង្កឲ្យធនធានជលផលវិនាសយ៉ាងធ្ងន់ធ្ងរ និងបង្កជាគុណវិបត្តិយ៉ាងធំដល់សង្គម ពិសេសគឺមុខរបរទទួលទាន រួមទាំងជីវភាពរបស់ពលរដ្ឋជាដើម។ ដោយឡែកប្រភេទត្រីកម្រមួយចំនួន ក៏ប្រឈមនឹងផុតពូជកាន់តែច្រើន បើមន្ត្រីជំនាញនៅតែព្រងើយ។ លោកអំពាវនាវឲ្យមន្ត្រីជំនាញ ចុះត្រួតពិនិត្យសកម្មភាពនេសាទរបស់ជនជាតិវៀតណាម ទាំងនោះ និងអនុវត្តតាមច្បាប់៖ «សមត្ថកិច្ចជំនាញទៀតសោតគួរតែចាត់ វិធានការឲ្យទាន់ពេលវេលា កុំទុកឱកាសឲ្យជនល្មើសជនខិលខូចប្រមូលយកផលនេសាទ ឬក៏ធ្វើបាបដល់អ្នកនេសាទក្រីក្រដូចដាច់មងគាត់ឈឺចាប់ណាស់។»
មន្ត្រីជំនាញផ្នែកច្បាប់ជលផល លោក សំ សត្យា យល់ថា ពលរដ្ឋតាមមូលដ្ឋានក៏មានសិទ្ធិឃាត់បទល្មើសនេសាទបានដែរ យោងតាមច្បាប់ជលផល។ លោកថា ច្បាប់នេះបានកំណត់អាជ្ញាយុកាល៖ «គឺយើង មានប្រកាសច្បាប់ជលផលបានកំណត់ឲ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ហ្នឹង ចេញជាប្រកាស ហើយកំណត់ឧបករណ៍ បាទ! ទាំងសមុទ្រទាំងទឹកសាប ហើយបើសិនអត់មានក្នុងប្រកាសហ្នឹងទេ មានន័យថា ឧបករណ៍ហ្នឹងសុទ្ធតែជាឧបករណ៍ខុសច្បាប់ហើយ។»
សហគមន៍សេសាន ភូមិពាមមានជ័យ អះអាងថា កាលពីឆ្នាំ២០១២ នគរបាលប៉ុស្តិ៍ឃុំពាមមានជ័យ ចុះបង្ក្រាបជនជាតិវៀតណាម នេសាទខុសច្បាប់នៅទន្លេមេគង្គក្នុងតំបន់អ្នកលឿងផ្នែកខាងលើ ឋិតនៅឃុំពាមមានជ័យ តែត្រូវបានជនល្មើសបាញ់តទល់ជាមួយសមត្ថកិច្ច ក៏ប៉ុន្តែមិនមានភាគីខាងណាមានរបួសឡើយ។ ចំណែកនគរបាលចាប់ជនជាតិវៀតណាម បាន ៣នាក់ តែត្រូវដោះលែងវិញ ដោយមិនបានបញ្ជូនទៅតុលាការទេ៕
No comments:
Post a Comment