បក្សសង្គ្រោះជាតិ នៅតែ ប្រកាន់គោលការណ៍ របស់ ពលរដ្ឋ ដែលចង់ ឲ្យមាន ការផ្លាស់ប្ដូរ
RFA / វិទ្យុ អាស៊ី សេរី | ២១ មេសា ២០១៥
ប្រធាន គណបក្ស សង្គ្រោះជាតិ លោក សម រង្ស៊ី (ស្ដាំ)
និងអនុប្រធានបក្ស លោក កឹម សុខា នៅក្នុងវេទិកា ជួបជាមួយ ប្រជាពលរដ្ឋ
នាសង្កាត់ ព្រែកលៀប ខណ្ឌ ជ្រោយចង្វារ នៅព្រឹកថ្ងៃ ទី១៨ មករា ២០១៥។ RFA/Morm Moniroth
មន្ត្រី នាំពាក្យ នៃអង្គភាព ព័ត៌មាន និងប្រតិកម្មរហ័ស នៃទីស្ដីការ គណៈរដ្ឋមន្ត្រី ដែលតំណាង ដោយភាគី រដ្ឋាភិបាល នៅពុំទាន់ មានប្រតិកម្ម ប្រឆាំង សារនយោបាយ របស់ អនុប្រធាន គណបក្ស សង្គ្រោះជាតិ នៅឡើយទេ។
លោក កឹម សុខា ជាអនុប្រធាន ទីមួយ នៃរដ្ឋសភា និងជាអនុប្រធាន គណបក្ស សង្គ្រោះជាតិ ផង បញ្ជាក់ជំហរជា ថ្មី ទៀតថា, គណបក្សប្រឆាំង នៅតែ ប្រកាន់គោលការណ៍ របស់ ប្រជាពលរដ្ឋ ដែលទាមទារ ឲ្យមាន ការផ្លាស់ប្ដូរ។
នៅពេល លោក សម រង្ស៊ី ប្រធានគណបក្សសង្គ្រោះជាតិ ប្រកាសអំពីលទ្ធផលជាច្រើនបានមកពីការអនុវត្តគោលការណ៍វប្បធម៌សន្ទនា រវាងអ្នកដឹកនាំគណបក្សនយោបាយធំៗនៅកម្ពុជា នោះ លោក កឹម សុខា ថ្លែងជាសាធារណៈថា គណបក្សសង្គ្រោះជាតិ នឹងនៅតែប្រកាន់យុទ្ធសាស្ត្រនយោបាយនៃការផ្លាស់ប្ដូររបស់ខ្លួន ដូចជាការចង់បានរបស់ម្ចាស់ឆ្នោតបន្តទៀត។
លោក ទិត្យ សុធា មន្ត្រីនាំពាក្យនៃអង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី ដែលជាតំណាងដោយភាគីរដ្ឋាភិបាល ឲ្យដឹងកាលពីថ្ងៃទី២១ មេសា ដោយចាត់ទុកថា រហូតមកដល់ពេលនេះ គឺរដ្ឋាភិបាលនៅបន្តឃ្លាំមើលបន្តទៀតនូវសកម្មភាពរបស់ លោក កឹម សុខា ថាតើជាសារនយោបាយដើម្បីបង្អួតដល់អ្នកគាំទ្ររបស់ខ្លួន ឬក្នុងចេតនាអ្វីមួយ?
លោកថ្លែងបន្តថា ប្រសិនបើ លោក កឹម សុខា ធ្វើឲ្យមានភាពវឹកវរ ឬថានាំឲ្យប៉ះពាល់ដល់សណ្ដាប់ធ្នាប់ ដូចក្រោយថ្ងៃបោះឆ្នោត នោះប្រទេសមានច្បាប់នឹងមិនទុកឲ្យមានភាពអនាធិបតេយ្យកើតឡើងបាន ទេ។ ម្យ៉ាងទៀត សំណុំរឿងរបស់ លោក កឹម សុខា កំពុងឋិតនៅក្នុងដៃនៃតុលាការស្រាប់នៅឡើយផង។ លោក ទិត្យ សុធា បន្តថា «អ៊ីចឹងបើសិនជាសកម្មភាពណាដែលនាំឲ្យប៉ះពាល់ដល់ សន្តិសុខសណ្ដាប់ធ្នាប់សង្គមនោះ គឺលោក កឹម សុខា នឹងត្រូវប្រឈមចំពោះនីតិវិធីផ្លូវច្បាប់បន្តទៀត ពីព្រោះរឿងគាត់កំពុងតែឋិតនៅក្នុងសំណាញ់ផ្លូវច្បាប់នៅឡើយទេ។»
ព្រោះតែសារនយោបាយរបស់ លោក កឹម សុខា ដែលតែងថ្លែងម្ដងហើយម្ដងទៀត ដែលចង់ឲ្យមានការផ្លាស់ប្ដូរនេះហើយ នៅនាទីចុងក្រោយ លោកត្រូវបាន លោក ហ៊ុន សែន ប្រកាន់ និងចាត់ទុកថា ជាភាសាមួយដែលស្មើទៅនឹងការចង់ផ្ដួលរលំរដ្ឋាភិបាលដោយអំណាច ប្រជាពលរដ្ឋនោះ។
ការប្រកាន់ជំហរនៅស្ងប់ស្ងាត់របស់រដ្ឋាភិបាលនៅពេលនេះ ធ្វើឡើងក្រោយពេលដែល លោក កឹម សុខា និងលោក សម រង្ស៊ី ចូលរួមប្រកាសសុពលភាពប្រធាន និងអនុប្រធានក្រុមការងារគណបក្សសង្គ្រោះជាតិ ប្រចាំខេត្តបាត់ដំបង កាលពីព្រឹកថ្ងៃទី២១ មេសា។
នៅក្នុងពិធីនោះ លោក កឹម សុខា ដែលជាអនុប្រធានគណបក្សប្រឆាំងមួយនេះថ្លែងថា គណបក្សសង្គ្រោះជាតិ នឹងមិនប្រែប្រួលយុទ្ធសាស្ត្រ និងគោលនយោបាយនៃការផ្លាស់ប្ដូររបស់ខ្លួនទេ។ លោកចាត់ទុកថា ប្រជាពលរដ្ឋចង់ឲ្យមានការផ្លាស់ប្ដូរមួយដ៏ពិតប្រាកដ។ ហេតុនេះ ថ្នាក់ដឹកនាំគណបក្សសង្គ្រោះជាតិ នឹងនៅតែអនុវត្តនៃការផ្លាស់ប្ដូរនេះដូចការទាមទាររបស់ប្រជាពលរដ្ឋ មិនប្រែប្រួលឡើយ។ លោក កឹម សុខា បន្តថា «ក្នុងនាមជាសកម្មជន ទាំងអស់ យើងកុំភ្លេចៗខ្លួនថា ប្រជាពលរដ្ឋដែលគាំទ្រយើងនេះដោយសារអ្វី? ដោយសារគាត់ចង់ឲ្យមានការផ្លាស់ប្ដូរ។ ប៉ុន្តែបើយើងងាកចេញពីអ្វីដែលគាត់ចង់បាន គាត់ក៏ងាកចេញពីយើងដែរ។ មិនមែនបងប្អូន? អ៊ីចឹងយើងខ្ញុំចង់បញ្ជាក់ជូនបងប្អូនជនរួមជាតិថា គណបក្សសង្គ្រោះជាតិ រក្សាគោលជំហរដដែល ឥតងាកចេញពីឆន្ទៈប្រជាពលរដ្ឋជាដាច់ខាត។»
គេសង្កេតឃើញថា តុលាការក្រុងភ្នំពេញ បានចាត់វិធានការភ្លាមៗប្រឆាំងសារនយោបាយរបស់ លោក កឹម សុខា នេះ ក្រោយពីមានការថ្លែងរិះគន់តែប៉ុន្មានថ្ងៃរបស់ លោក ហ៊ុន សែន រួចមក។ លោកនាយករដ្ឋមន្ត្រីចាត់ទុកថា សម្ដីមួយម៉ាត់នេះនឹងមិនអាចអត់ឱនឲ្យបានឡើយ ព្រោះជាសារដែលស្មើទៅនឹងការផ្ដួលរំលំរដ្ឋាភិបាលដោយពិតប្រាកដ។ លោក ហ៊ុន សែន យល់ឃើញថា បើសារនយោបាយនៃការផ្លាស់ប្ដូរនេះ ធ្វើឡើងនៅមុនពេលយុទ្ធនាការបោះឆ្នោត គឺជារឿងត្រឹមត្រូវ ក៏ប៉ុន្តែនេះជាយុទ្ធនាការកម្លាំងមហាជន តាមរយៈការធ្វើបាតុកម្មក្រោយការបោះឆ្នោត។
យ៉ាងណាក៏ដោយ លោក រស់ រ៉ាវុធ បណ្ឌិតវិទ្យាសាស្ត្រនយោបាយ មានប្រសាសន៍ថា នេះជារបៀបរបស់អ្នកនយោបាយ ហើយសារដូចនេះ ប្រទេសនៅលើពិភពលោកគេតែងប្រើប្រាស់ជាទម្លាប់ ជាពិសេសបរិបទនយោបាយជាសាកល ការផ្លាស់ប្ដូរ គឺជារឿងធម្មតាទៅហើយ។ ហេតុនេះ ភាសាផ្លាស់ប្ដូរ គឺពុំមែនជាសម្ដីមួយដ៏អាក្រក់ជូរជាតិ ឬថាផ្ទុយទៅនឹងគោលការណ៍ច្បាប់ជាសាកលឡើយ។ លោក រស់ រ៉ាវុធ បន្តថា «បើ យើងធៀបទៅនឹងភាសានិយាយរបស់ លោក កឹម សុខា ហើយនិងការផ្លាស់ប្ដូរឆ្នាំ១៩៧៥ ស្មើនឹងបដិវត្ត គឺវាផ្ទុយគ្នា។ ផ្ទុយគ្នាយ៉ាងម៉េច? ផ្ទុយគ្នាទៅនឹងគេហៅថា ឆ្នាំ១៩៧៥ គឺការធ្វើបដិវត្តសម្លាប់ប្ដូរកម្លាំងប្រជាជន។ ប៉ុន្តែកម្លាំងប្រជាជនកើតឡើងដោយការឈឺចាប់ ពីការលួចឆក់ប្លន់របស់ទ័ព និងការទម្លាក់គ្រាប់បែករបស់សហរដ្ឋអាមេរិក។»
អ្នកវិភាគនយោបាយយល់ឃើញថា ការខ្វែងគំនិតគ្នារឿងឯកភាពជាតិឲ្យក្លាយជាធ្លុងមួយ នៅតែកើតមានចំពោះអ្នកនយោបាយខ្មែរ បើទោះជាអ្នកនយោបាយជាន់ខ្ពស់ម្នាក់ៗ ព្យាយាមជំរុញឲ្យមានចរន្តនៃវប្បធម៌សន្ទនាក៏ដោយ៕
No comments:
Post a Comment