លោក កឹម សុខា៖ ការចរចា រវាង បក្សជាប់ឆ្នោត ទាំងពីរ អាច នឹងបរាជ័យ ជាថ្មី ម្តងទៀត
ដោយ យន់ សាមៀន / RFA | ២៨ ឧសភា ២០១៤
សមាសភាព គណៈកម្មាធិការ ចម្រុះ មកពីគណបក្ស ប្រជាជនកម្ពុជា
(ជួរឆ្វេង) ជួបពិភាក្សា ជាមួយ មន្ត្រី គណបក្ស សង្គ្រោះជាតិ
នាវិមាន ព្រឹទ្ធសភា នៅព្រឹកថ្ងៃ ១០ មីនា ឆ្នាំ២០១៤។ RFA/Vohar Cheath
លោក កឹម សុខា អនុប្រធាន គណបក្ស សង្គ្រោះជាតិ ប្រកាស នៅថ្ងៃពុធ ទី២៨ ឧសភា នេះថា, ការចរចា នយោបាយ រវាង គណបក្ស ជាប់ឆ្នោត ទាំងពីរ គឺ គណបក្ស សង្គ្រោះជាតិ និងគណបក្ស ប្រជាជនកម្ពុជា អាច នឹងបរាជ័យ ជាថ្មី ម្តងទៀត ដោយសារ តែ គណបក្ស ប្រជាជនកម្ពុជា គ្មានឆន្ទៈ ពិតប្រាកដ ដើម្បី ដោះស្រាយ បញ្ហាជាតិ សំខាន់ៗ មួយចំនួន។
គណបក្ស ជាប់ឆ្នោត ទាំងពីរ បានយល់ព្រម បន្តការចរចា ឡើងវិញ កាលពីសប្ដាហ៍មុន បន្ទាប់ ពីក្រុម អ្នកជំនាញ ការបោះឆ្នោត ជប៉ុន ស្នើសុំ ឲ្យគណបក្ស ទាំងពីរ ដោះស្រាយ វិបត្តិ នយោបាយ មុន នឹងធ្វើការ កែទម្រង់ ការបោះឆ្នោត នៅកម្ពុជា។ ការចរចា រវាង តំណាង គណបក្ស ទាំងពីរ កាលពីថ្ងៃ ទី២២ ឧសភា បានពិភាក្សា អំពី ចំណុច មួយចំនួន ក្នុងចំណោម ១៤ចំណុច, ប៉ុន្តែ មិនបាន ឯកភាព លើបញ្ហា បង្កើត គណៈកម្មាធិការ ជាតិ រៀបចំ ការបោះឆ្នោតទេ។
លោក កឹម សុខា បន្តថា ការយល់ព្រមចូលរួមចរចារបស់គណបក្សកាន់អំណាច គ្រាន់តែជាការសាកល្បង ថាតើគណបក្សប្រឆាំងព្រមបន្ធូរបន្ថយការទាមទារកែទម្រង់នយោបាយឬទេ៖ «ធម្មតា គណបក្ស ប្រជាជនកម្ពុជា, គាត់ ចង់សាកល្បងយើង, គាត់ ដើរទាក់ទងនេះ ទាក់ទងនោះ ក្រែងយើងថយ, យើង ដូរ ដល់យើង អត់ដូរទៅ, គាត់ អត់ហ៊ានមក។»
សមាជិក ក្រុមការងារ បច្ចេកទេស ចរចា គណបក្ស ប្រជាជនកម្ពុជា លោក ជាម យៀប អះអាង ថា, តំណាង គណបក្ស ទាំងពីរ នឹងជួបគ្នា ក្នុងពេល ឆាប់ៗ ពីព្រោះ ថា គ្មាន ជម្រើសអ្វីល្អ ជាងការចរចាទេ ដើម្បី បញ្ចប់ជម្លោះ នយោបាយ។ ប៉ុន្តែ តំណាង ក្រុមចរចា គណបក្ស ជាប់ឆ្នោត ទាំងពីរ នៅមិនទាន់ កំណត់ពេលវេលា ចរចាគ្នា ជាថ្មី ឡើងវិញ នៅឡើយទេ នៅថ្ងៃ ពុធ នេះ៕
No comments:
Post a Comment