សេចក្ដីព្រាង វិសោធនកម្ម ធម្មនុញ្ញ នៅតែ បង្ហាញភាព មិនច្បាស់លាស់
រដ្ឋសភា នៃប្រទេស កម្ពុជា, RFA
អង្គការ ធ្វើការងារ ពាក់ព័ន្ធ នឹងការបោះឆ្នោត ជំរុញ ឲ្យគណបក្ស ជាប់ឆ្នោត ទាំង២ ជជែកគ្នា ឡើងវិញ ចំពោះ សេចក្ដីព្រាង វិសោធនកម្ម រដ្ឋធម្មនុញ្ញ មាត្រា៧៦ និងការរៀបចំ អង្គការ បោះឆ្នោតនោះ ជាថ្មីទៀត, ដ្បិត នៅមាន ចំណុចខ្វះខាត មួយចំនួន ដែលទាមទារ ឲ្យចែង ឲ្យបាន ច្បាស់លាស់។
លោក គល់ បញ្ញា នាយកប្រតិបត្តិ នៃគណៈកម្មាធិការ ដើម្បី ការបោះឆ្នោត ដោយសេរី និងយុត្តិធម៌ នៅកម្ពុជា (ហៅកាត់ ថា ខុមហ្រ្វែល, COMFREL) ថ្លែងរិះគន់ សេចក្ដីព្រាង វិសោធនកម្ម រដ្ឋធម្មនុញ្ញ ថា នៅខ្វះខាត ការចែង ឲ្យច្បាស់ ពីដែនសមត្ថកិច្ច របស់ គ.ជ.ប. និងអភ័យឯកសិទ្ធិ របស់ សមាជិកស្ថាប័ននេះ។ លើសពីនេះ ការជ្រើសរើស សមាសភាព គ.ជ.ប. ក៏មិនច្បាស់លាស់។ លោក គល់ បញ្ញា បន្តថា ការដែល មិនបានចែង ឬចែងមិនច្បាស់ ក្នុងរដ្ឋធម្មនុញ្ញ នឹងធ្វើ ឲ្យច្បាប់ ដែលចែង បន្តមានច្បាប់ បោះឆ្នោត ជាដើម នឹងមានភាព មិនច្បាស់លាស់ដែរ។
លោក គល់ បញ្ញា៖ «ហើយ យើង ទៅសរសេរ ក្នុងរដ្ឋធម្មនុញ្ញ ថា ក្រុមណាក៏ រើសសមាសភាព, គណបក្សក៏ រើសសមាសភាព, គណៈអចិន្ត្រៃយ៍ក៏ រើសសមាសភាព ប្រជុំពេញអង្គសភាក៏រើសសមាសភាព។ យើង អត់បានកំណត់ ច្បាស់លាស់ ចឹងអាចបញ្ហា។ ទី២ យើងអត់និយាយពីក្របខ័ណ្ឌសិទ្ធិអំណាចរបស់ គ.ជ.ប. ហ្នឹង។ យើង អត់បាននិយាយពីរឿងមួយដែលជាបញ្ហាស្នូល សព្វថ្ងៃនេះឈ្លោះគ្នារឿងថា តើ គ.ជ.ប. នឹងជាអ្នកដែលប្រកាសមិនមែនតែលទ្ធផលបោះឆ្នោតទេ គឺប្រកាសអំពីបញ្ជីអ្នកតំណាងរាស្ត្រ បានន័យថា យើងនឹងត្រូវអោយ គ.ជ.ប ប្រកាសតែម្ដងទៅ ដែលមិនចាំបាច់ត្រូវអោយទៅមានរឿងទៅប្រជុំពេញអង្គអី ស្បថអី នាំអោយមានជម្លោះដូចបច្ចុប្បន្ន ថាតើកំណត់ថាជាអ្នកតំណាងរាស្ត្រនៅពេលណា។»
ទស្សនៈរបស់ លោក គល់ បញ្ញា កើតឡើងបន្ទាប់ពីក្រុមការងារវិសោធនកម្មរដ្ឋធម្មនុញ្ញ រវាងគណបក្សប្រជាជនកម្ពុជា និងគណបក្សសង្គ្រោះជាតិ កាលពីល្ងាចថ្ងៃសុក្រ បានព្រមព្រៀងលើចំណុចមួយចំនួន ពាក់ព័ន្ធការរៀបចំវិសោធនកម្មមាត្រា៧៦ និងការបង្កើតជំពូកថ្មី ទាក់ទងនឹងអង្គការរៀបចំការបោះឆ្នោតនៅក្នុងរដ្ឋធម្មនុញ្ញ។ ក្រុមការងារគណបក្សទាំងពីរ បានឯកភាពគ្នាថា សមាជិក គ.ជ.ប ថ្មី មិនមានអភ័យឯកសិទ្ធិដូចគណបក្សសង្គ្រោះជាតិ បានស្នើសុំនោះឡើយ។
យ៉ាងណាក៏ដោយ ក្រុមការងារគណបក្សទាំងពីរ បានឯកភាពគ្នាក្នុងការរៀបចំឲ្យមានខ្លឹមសារជាការការពារផ្លូវ ច្បាប់នៅក្នុងច្បាប់ស្ដីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត ចំពោះការអនុវត្តតួនាទីរបស់សមាជិកគណៈកម្មាធិការជាតិរៀបចំការបោះ ឆ្នោត តាមស្មារតីដូចការការពារផ្លូវច្បាប់ ចំពោះសមាជិកក្រុមប្រឹក្សាធម្មនុញ្ញ និងចៅក្រម។ ជាមួយគ្នានោះ ក្រុមការងារគណបក្សទាំងពីរ បានខ្វែងគំនិតគ្នាលើការផ្តល់ស្វ័យភាពការងារដល់សមាជិក គណៈកម្មាធិការជាតិរៀបចំការបោះឆ្នោត នៅក្នុងជំពូកថ្មីនេះ។ ចំពោះចំណុចដែលពុំឯកភាពគ្នានេះ ក្រុមការងារគណបក្សទាំងពីរ ទុកជូនថ្នាក់ដឹកនាំគណបក្សទាំងពីរសម្រេច។
បើទោះជាយល់ឃើញថា មានការខ្វះខាតដែរ ក៏ លោក ហង្ស ពុទ្ធា នាយកប្រតិបត្តិអង្គការឃ្លាំមើលការបោះឆ្នោត និកហ្វិច (Nicfec) មានប្រសាសន៍ថា ការតាក់តែងក្របខ័ណ្ឌច្បាប់បន្តទៀត គឺចាំបាច់ធ្វើអោយមានភាពច្បាស់លាស់ជាងពេលនេះ ហើយលោកសង្ឃឹមថា គណបក្សទាំង២ នឹងអាចរកចំណុចព្រមព្រៀងគ្នា ដើម្បីអោយ គ.ជ.ប មានឯករាជ្យពិតប្រាកដ៕
No comments:
Post a Comment