លោក កឹម សុខា រិះគន់ រដ្ឋាភិបាល ថា, បរាជ័យ ក្នុងការដោះស្រាយ ជម្លោះដីធ្លី ជាង២០ឆ្នាំ
RFA / វិទ្យុ អាស៊ី សេរី | ៣ ឧសភា ២០១៥
លោក កឹម សុខា អនុប្រធានគណបក្សសង្គ្រោះជាតិ
និងជាអនុប្រធានទី១ រដ្ឋសភា
ថ្លែងក្នុងពេលជួបពលរដ្ឋមានបញ្ហាដីធ្លីនាឃុំដំរីផុង ស្រុកឆ្លូង
ខេត្តក្រចេះ នៅថ្ងៃទី៣ ខែឧសភា ឆ្នាំ២០១៥។ RFA/Brach Chev
លោក កឹម សុខា រិះគន់ រដ្ឋាភិបាល ថា, បរាជ័យ ក្នុងការដោះស្រាយ ជម្លោះដីធ្លី ក្នុងរយៈពេល ជាង២០ ឆ្នាំនេះ។ ប៉ុន្តែ មន្ត្រីរដ្ឋាភិបាល ឆ្លើយតប ថា, ការថ្លែងបែបនេះ បង្ហាញ ពីភាពល្ងង់ខ្លៅ របស់ លោក កឹម សុខា ដែលនិយាយ មិនពិនិត្យ របាយការណ៍ របស់ រដ្ឋាភិបាល។
ថ្លែងនៅចំពោះ មុខពលរដ្ឋ មានជម្លោះដីធ្លី ប្រមាណ ៤០០នាក់ ក្នុងស្រុក ឆ្លូង ខេត្ត ក្រចេះ, អនុប្រធាន គណបក្សប្រឆាំង ដែលធ្លាប់តែ រិះគន់ រដ្ឋាភិបាលនោះ នៅថ្ងៃ ទី៣ ខែឧសភា នេះ, លោក កឹម សុខា នៅតែ បន្តលើកឡើង ថា, រដ្ឋាភិបាល ពុំមាន លទ្ធភាព ដោះស្រាយ ជម្លោះដីធ្លី ដោយសារ ករណីជម្លោះដីធ្លី នៅតែ កើតឡើងដដែល។ លោកបន្តទៀតថា ករណីជម្លោះដីធ្លីកាន់តែកើតឡើង ខ្លាំង ពីមួយឆ្នាំ ទៅមួយឆ្នាំ, ហើយ ពលរដ្ឋ កំពុងតែ អស់សង្ឃឹម លើដំណោះស្រាយ របស់ អាជ្ញាធរ៖ «ខ្ញុំ ឃើញរយៈពេល ២០ឆ្នាំហើយ បញ្ហាដីធ្លី នៅតែ កើនឡើង ច្រើនទៅ, ពលរដ្ឋ មានបញ្ហាដីធ្លី អស់សង្ឃឹម នឹងដំណោះស្រាយ របស់ អាជ្ញាធរ។ ពេលនេះយើងមានតែវប្បធម៌សន្ទនាទេដោះស្រាយបញ្ហានេះ បើវប្បធម៌សន្ទនាដោះមិនចេញទេចប់ហើយ។»
ការថ្លែងរបស់ លោក កឹម សុខា នេះនៅក្រោយប៉ុន្មានថ្ងៃដែលលោកនាយករដ្ឋមន្ត្រី ហ៊ុន សែន ព្រមានថា បើ លោក កឹម សុខា នៅបន្តរិះគន់លោកទៀត លោកនឹងលុបវប្បធម៌សន្ទនាចោល។
រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ឆ្លើយតបថា នេះជាការបង្ហាញឥរិយាបថរិះគន់រដ្ឋាភិបាលទាំងមិនបានមើលរបាយការណ៍។ លោក ផៃ ស៊ីផាន អះអាងថា ករណីជម្លោះដីធ្លីទូទាំងប្រទេសដែលកើតឡើងរាប់ពាន់ករណី ប៉ុន្តែសព្វថ្ងៃនេះនៅសល់ជាង ៦០០ករណី៖ «ការថ្លែងនេះបង្ហាញនៅភាពល្ងង់ខ្លៅ និយាយគ្មានតួលេខ និយាយដើម្បីប្រឆាំងរដ្ឋាភិបាលប៉ុណ្ណោះ។»
ទោះបែបនេះក្តី អ្នកតាមដានព្រឹត្តិការណ៍សង្គមយល់ថា លោក កឹម សុខា និយាយត្រឹមត្រូវ ព្រោះតាមរបាយការណ៍របស់អង្គការសង្គមស៊ីវិលនានា ជម្លោះដីធ្លីនៅកើនឡើង។
អ្នកសិក្សាស្រាវជ្រាវសង្គម លោក កែម ឡី យល់ថា ជម្លោះដីធ្លីនៅតែកើនឡើងនេះ ព្រោះរដ្ឋាភិបាលដោះស្រាយនាពេលកន្លងមកគ្មានការចូលរួមពីសង្គម ស៊ីវិល និងបក្សប្រឆាំង។ លោក កែម ឡី ស្នើទៅរដ្ឋាភិបាល បើកទូលាយឲ្យមានការរិះគន់ពីគ្រប់មជ្ឈដ្ឋាននានា៖ «ខ្ញុំគិតថា បើរដ្ឋាភិបាលមិនបើកទូលាយបញ្ហានៅកើតឡើងចឹង។»
ដំណាលគ្នានៃការរិះគន់នេះ លោក សម រង្ស៊ី ដែលអង្គុយក្បែរ លោក កឹម សុខា ក្នុងពេលជួបជាមួយប្រជាពលរដ្ឋមានជម្លោះដីធ្លីក្នុងខេត្តក្រចេះ រំពឹងថា វប្បធម៌សន្ទនានឹងអាចដោះស្រាយជម្លោះដីធ្លីមានភាពល្អប្រសើរជាងមុន ដោយលោកនឹងប្រាប់ពីរឿងពិតទាំងនេះឲ្យ លោក ហ៊ុន សែន បានដឹង ដែលផ្ទុយពីអាជ្ញាធរស្រុក ខេត្ត តែងតែផ្តល់របាយការណ៍ភូតភរលោកនាយករដ្ឋមន្ត្រី ហ៊ុន សែន។ ជាងនេះទៅទៀត ប្រធានគណបក្សប្រឆាំងរូបនេះនិយាយថា បើគណបក្សលោកឈ្នះ នឹងដោះស្រាយករណីដីធ្លីឲ្យអស់៕
No comments:
Post a Comment