ACU ថា, លោក ស៊ុត ឌីណា មានមាស និងលុយ រាប់លាន ដុល្លារ
RFA / វិទ្យុ អាស៊ី សេរី | ៧ មេសា ២០១៦
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង
ថ្លែងទៅកាន់ក្រុមយុវជនក្នុងកម្មវិធីប្រកាសលទ្ធផលនៃការធ្វើ
កោសល្យវិច័យខ្សែអាត់សំឡេងដែលគេចោទថា ជាសំឡេងរបស់លោក កឹម សុខា
ជាមួយស្រីកំណាន់ នៅថ្ងៃទី២៤ មីនា ឆ្នាំ២០១៦។ RFA/Cheu Sideth
អង្គភាព ប្រឆាំង អំពើ ពុករលួយ (ACU) បង្ហាញថា, ឯកអគ្គរាជទូត កម្ពុជា ប្រចាំ ប្រទេស កូរ៉េ ខាងត្បូង លោក ស៊ុត ឌីណា មានមាស និងលុយ រាប់លាន ដុល្លារ ដែលអង្គភាពនេះ ថា, នេះ ជាអំពើ ពុករលួយ ចំនួន ២ បទល្មើស។
សេចក្ដីប្រកាស ព័ត៌មាន របស់ អង្គភាព ប្រឆាំង អំពើ ពុករលួយ ចុះថ្ងៃទី៧ មេសា បញ្ជាក់ថា, លោក ស៊ុត ឌីណា មានលុយ ដុល្លារ ជាសាច់ប្រាក់ នៅក្រៅធនាគារ ចំនួន ៧.២លាន ដុល្លារ សហរដ្ឋអាមេរិក ដែលកាល ពីឆ្នាំ២០១៣ លោក ស៊ុត ឌីណា មានលុយ ៤.២លាន ដុល្លារ និងកើនឡើង ចុងក្រោយ បន្ទាប់ ពីកាន់តំណែង ចំនួន ៣លាន ដុល្លារ និងមាសសុទ្ធ ជាមាស គីឡូ ចំនួន ៣៣៩ តម្លឹង។
ការបង្ហាញ របស់ អង្គភាពប្រឆាំងអំពើពុករលួយនៅពេលនេះដែរ គ្រាន់តែជាការឆ្លើយតបទៅនឹងអ្នកប្រើប្រាស់ហ្វេស៊បុក (Facebook) មួយ ចំនួនដែលថា លោក ស៊ុត ឌីណា ជាមនុស្សស្អាតស្អំ និងជាអ្នកក្រជាដើម ដោយអង្គភាពនេះ ចាត់ទុកថាក្រុមអ្នកប្រើប្រាស់ហ្វេស៊បុកនោះ ថា ជាដៃជើង និងទទួលប្រាក់ឧបត្ថម្ភពីលោក ស៊ុត ឌីណា ហើយក៏ជាអ្នកញុះញង់គំរាមកំហែង ដុតបញ្ឆេះសាធារណមតិទៅវិញ។
ទោះបីជាយ៉ាងណាក្ដីអង្គភាពនេះ មិនបានបង្ហាញភស្តុតាងពីប្រភពព័ត៌មានដែលទទួលបានទេ ក្រៅពីយោងបណ្ដឹងរបស់ពលករនៅកូរ៉េ បណ្ដឹងរបស់មន្ត្រីស្ថានទូត និងនៅក្រសួងការបរទេស កំណត់ហេតុសវនកម្មនៃប្រតិភូចម្រុះ របស់ក្រសួងសេដ្ឋកិច្ច និងក្រសួងការបរទេស និងការចុះស៊ើបអង្កេតរបស់អង្គភាពប្រឆាំងអំពើពុករលួយ រួមនឹងចម្លើយរបស់លោក ស៊ុត ឌីណា និងសាក្សីជាច្រើនទៀតជាដើម។
ប៉ុន្តែអង្គភាពនេះនឹងធ្វើសន្និសីទកាសែតពីករណីនេះ នៅរសៀលម៉ោង៣ ថ្ងៃទី៧ មេសា។
នៅព្រឹកថ្ងៃនេះ អង្គភាពប្រឆាំងអំពើពុករលួយ បានបញ្ជូនលោក ស៊ុត ឌីណា មកកាន់សាលាដំបូងរាជធានីភ្នំពេញហើយ ដើម្បីប្រគល់តួនាទីឲ្យព្រះរាជអាជ្ញា និងចៅក្រមសាកសួរ ក្រោយពីអង្គភាពនេះបានចាប់ខ្លួនលោក ស៊ុត ឌីណា កាលពីថ្ងៃទី៤ មេសា ដោយចោទប្រកាន់ពាក់ព័ន្ធនឹងអំពើពុករលួយ។
No comments:
Post a Comment