«គ្រោះរាំងស្ងួត កំពុង គំរាមកំហែង ដល់វិស័យ កសិកម្ម នៅកម្ពុជា»
RFA / វិទ្យុ អាស៊ី សេរី | ២២ មេសា ២០១៦
ស្ថានភាពទឹកអូរមួយកន្លែងនៅក្នុងឃុំកំពង់ភ្លុក ស្រុកប្រាសាទបាគង ខេត្តសៀមរាប។ រូបថតថ្ងៃទី១ ខែមករា ឆ្នាំ២០១៦ / RFA/Chuop Sereyroth
ក្រសួង ធនធានទឹក និងឧតុនិយម បានឲ្យដឹង ថា, គ្រោះរាំងស្ងួត ដែលបណ្ដាល ឲ្យខ្វះទឹក ប្រើប្រាស់ កំពុង គំរាមកំហែង ដល់ ដំណើរការ ផលិតកម្ម កសិកម្ម និងធ្វើ ឲ្យប៉ះពាល់ ដល់ពលរដ្ឋ ប្រមាណ ជាង ៥ម៉ឺន គ្រួសារ នៅទូទាំងប្រទេស។ ករណីនេះ អ្នកជំនាញ កសិកម្ម និងកសិករ ទទូច ឲ្យរដ្ឋាភិបាល ចាត់វិធានការ ដោះស្រាយ បញ្ហា ប្រឈមនេះ ជាបន្ទាន់។
អ្នកធ្វើការ ពាក់ព័ន្ធ នឹងវិស័យ កសិកម្ម ព្រមទាំង កសិករ បារម្ភថា, ប្រសិនបើ បញ្ហា គ្រោះរាំងស្ងួត នេះ នៅតែ បន្តប្រឈម អាច នឹងបង្ក ជាក្តីបារម្ភ ដល់លទ្ធភាព ផ្គត់ផ្គង់ ស្បៀងអាហារ និងអាច ប៉ះពាល់ ដល់ការ អភិវឌ្ឍ វិស័យ កសិកម្ម នៅកម្ពុជា។ បញ្ហានេះ ត្រូវ បានលើកឡើង ក្រោយពេល កម្ដៅ បរិយាកាស បង្ក ឲ្យមាន គ្រោះរាំងស្ងួត នៅក្នុងប្រទេស កម្ពុជា បានកើនឡើង ខ្ពស់ ដែលបង្កឡើង ដោយរលក កម្ដៅ បាតុភូត អេលនីណូ (El Nino)។
តំណាងបណ្ដាញកសិករក្នុងវិស័យកសិកម្ម លោក ស៊ឹម រ៉ុម លើកឡើងថា បញ្ហាគ្រោះរាំងស្ងួតបានក្លាយជាឧបសគ្គរាំងស្ទះដល់ដំណើរការ ផលិតកម្ម ពិសេសជំរុញឲ្យគ្រួសារកសិករខ្នាតតូចនៅកម្ពុជា មួយចំនួនកាន់តែក្រីក្រទៅៗ។ ជាងនេះទៀត លោកថា គ្រោះរាំងស្ងួតក៏ជាមូលហេតុសំខាន់មួយក្នុងចំណោមមូលហេតុជាច្រើន ដែលជំរុញ និងកំពុងគំរាមកំហែងដល់ដំណើរការផលិតកម្មកសិកម្ម សុខភាពមនុស្ស សត្វ និងអាចប៉ះពាល់បន្តទៅដល់ជីវភាពរបស់ប្រជាជន និងការអភិវឌ្ឍសេដ្ឋកិច្ចជាតិ៖ «អាកាសធាតុរាំងស្ងួតធ្វើដាំដំណាំ និងបន្លែមិនបាន ព្រោះតែអាកាសធាតុក្ដៅខ្លាំង វាក៏ប៉ះពាល់ដល់សុខភាព មនុស្ស សត្វ ពិសេសធ្វើស្រែក៏មិនបាន ដោយសាររដូវវស្សាយឺតយ៉ាវពេក។»
តំណាងបណ្ដាញកសិករក្នុងវិស័យកសិកម្មរូបនេះ ឲ្យដឹងទៀតថា បច្ចុប្បន្នកសិករនៅទីជនបទនៅតែធ្វើស្រែតាមទម្លាប់បុរាណ ធ្វើកសិកម្មរំពឹងទឹកភ្លៀង ឬហៅថា កសិកម្មប្រវាស់មេឃនោះ។ លោកបន្តថា ទម្លាប់ទាំងនេះមិនបានផ្តល់ផលចំណេញ និងជួយដោះស្រាយបញ្ហាប្រឈមក្នុងវិស័យកសិកម្មនោះទេ ខណៈកម្ពុជា បន្តជួបគ្រោះរាំងស្ងួតដែលអូសបន្លាយក្នុងប៉ុន្មានឆ្នាំចុងក្រោយ នេះ។ ហេតុនេះ លោកជំរុញឲ្យរដ្ឋាភិបាល និងស្ថាប័នពាក់ព័ន្ធ ត្រូវគិតគូរ និងដោះស្រាយបញ្ហារាំងស្ងួតនេះជាបន្ទាន់៖ «ខ្ញុំសូមសំណូមពរដល់រដ្ឋាភិបាល គួរតែចុះពិនិត្យផ្ទាល់ដល់កន្លែងដែលរងគ្រោះខ្លាំង ពិសេសតំបន់ដែលខ្វះទឹក យ៉ាងហោចណាស់ឲ្យគាត់អាចមានលទ្ធភាពខ្លះដោះស្រាយជីវភាព និងការដាំដុះបានខ្លះ។»
នាយកប្រតិបត្តិមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា លោក សម វិទូ មានប្រសាសន៍ថា គ្រោះរាំងស្ងួតដែលបណ្ដាលមកពីរលកកម្ដៅបាតុភូតអេលនីណូ ដែលបានអូសបន្លាយ ២ឆ្នាំជាប់គ្នាមកនេះ មិនត្រឹមតែប៉ះពាល់ដល់ការដាំដុះ ការចិញ្ចឹមសត្វប៉ុណ្ណោះទេ តែគ្រោះរាំងស្ងួតក៏ជាមូលហេតុចម្បងជំរុញឲ្យមានការថយចុះកម្លាំង ពលកម្មក្នុងវិស័យកសិកម្ម ពិសេសយុវជនផងដែរ។ បញ្ហានេះ នឹងប៉ះពាល់ដល់ការធានាតុល្យភាពស្បៀងទៅថ្ងៃមុខ។
លោកបញ្ជាក់ដែរថា ខណៈកម្ពុជា ជួបគ្រោះរាំងស្ងួត លោកសង្កេតឃើញប្រព័ន្ធធារាសាស្ត្រកម្ពុជា ភាគច្រើនពឹងផ្អែកទាំងស្រុងតែទៅលើទឹកភ្លៀងប៉ុណ្ណោះ មិនទាន់ឃើញមានយន្តការច្បាស់លាស់ក្នុងការប្រើប្រាស់ទឹកឲ្យមាន ប្រសិទ្ធភាព ដូចជា ប្រព័ន្ធធារាសាស្ត្រ ការរៀបចំប្រព័ន្ធទឹកបង្ហូរចូលស្រែ ឬទាញដើម្បីប្រយោជន៍ដល់វិស័យកសិកម្ម និងការប្រើប្រាស់ប្រចាំថ្ងៃរបស់កសិករកម្ពុជា នៅឡើយ៖ «ប្រព័ន្ធ ធារាសាស្ត្រនៅកម្ពុជា សព្វថ្ងៃនេះ មិនអាចផ្គត់ផ្គង់សម្រាប់កសិករទេ ប្រព័ន្ធធារាសាស្ត្រដែលមានសព្វថ្ងៃនេះ ក៏នៅតែពឹងផ្អែកតែទៅលើទឹកភ្លៀងដដែល ហើយខ្ញុំគិតថា ប្រព័ន្ធធារាសាស្ត្រដែលយកល្អមែន គួរតែយើងមានប្រព័ន្ធប្រឡាយមេ ដែលយើងអាចភ្ជាប់ទៅនឹងបឹង និងទន្លេ ដែលអាចរក្សាទឹកជាប់ជាប្រចាំ ទើបអាចបម្រើវិស័យកសិកម្មបាន។»
បញ្ហាគ្រោះរាំងស្ងួតនេះដែរ ឯកអគ្គរដ្ឋទូតសហភាពអឺរ៉ុប ប្រចាំប្រទេសកម្ពុជា លោក ច្សច អេដហ្គា (George EDGAR) មានប្រសាសន៍ថា បញ្ហាអាកាសធាតុឡើងកម្ដៅ ឬក៏គ្រោះរាំងស្ងួត បានបង្កផលប៉ះពាល់ខ្លាំងដល់កសិករកម្ពុជា។ លោកឲ្យដឹងថា ដោយមើលឃើញពីផលប៉ះពាល់នៃការប្រែប្រួលអាកាសធាតុនេះ សហភាពអឺរ៉ុប បានប្ដេជ្ញាជំរុញឲ្យបណ្ដាប្រទេសលើពិភពលោកចូលរួមកាត់បន្ថយបញ្ហា នេះឲ្យបាន ៩០% នៅត្រឹមឆ្នាំ២០៥០។ ប៉ុន្តែលោកក៏ជំរុញឲ្យកម្ពុជា គួរតែរិះរកវិធានការកសាងហេដ្ឋារចនាសម្ព័ន្ធឲ្យបានឆាប់រហ័ស ដើម្បីសម្របខ្លួននឹងបញ្ហានេះ។
អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា ឲ្យដឹងថា គ្រោះរាំងស្ងួតដែលបណ្ដាលឲ្យខ្វះទឹកប្រើប្រាស់ បានធ្វើឲ្យប៉ះពាល់ដល់ផលដំណាំកសិកម្ម និងពលរដ្ឋជាង ៥ម៉ឺនគ្រួសារនៅទូទាំងប្រទេស។ លោកបញ្ជាក់ថា ខេត្តដែលប៉ះពាល់ខ្លាំងជាងគេ គឺខេត្តកំពង់ធំ និងខេត្តឧត្តរមានជ័យ ដែលមានរហូតជាង ២ម៉ឺនគ្រួសារ។ លោកបញ្ជាក់ទៀតថា ប្រព័ន្ធធារាសាស្ត្រនៅកម្ពុជា មិនទាន់អាចគ្របដណ្ដប់ និងមានលទ្ធភាពស្រោចស្រពលើផ្ទៃដីកសិកម្មបាន ១០០% នៅឡើយទេ ជាក់ស្ដែងបានត្រឹមជាង ៥០% ប៉ុណ្ណោះ។
ទោះជាយ៉ាងណាក៏ដោយ លោកថា ដើម្បីទប់ស្កាត់បញ្ហានេះ រដ្ឋាភិបាលបានកសាងបណ្ដាញប្រព័ន្ធធារាសាស្ត្រមេទឹកសំខាន់ៗ ក្នុងនោះដូចជានៅខេត្តស្វាយរៀង កំពង់ធំ ពោធិ៍សាត់ និងបាត់ដំបង ជាដើម៖ «ក្រសួង ធនធានទឹក នៅតែចាត់ទុកបញ្ហាខ្វះទឹកជារឿងដែលជាអាទិភាព ដែលយើងតែងយកចិត្តទុកដាក់ ហើយយើងបានកំពុងតែកសាងប្រព័ន្ធធារាសាស្ត្រ និងហេដ្ឋារចនាសម្ព័ន្ធរាល់ថ្ងៃជាក់ស្ដែង។ យើងបានកសាងហេដ្ឋារចនាសម្ព័ន្ធខ្នាតធំ គឺគម្រោងវ៉ៃកូ ដែលបានគ្របដណ្ដប់លើមួយផ្នែកនៃខេត្តត្បូងឃ្មុំ កំពង់ចាម និងព្រៃវែង ហើយយើងនឹងតភ្ជាប់មកទន្លេវ៉ៃកូ ខេត្តស្វាយរៀង បន្ថែមទៀត អ៊ីចឹងរដ្ឋាភិបាលកំពុងគិតគូរខ្លាំងណាស់លើវិស័យនេះ។»
របាយការណ៍ហានិភ័យឆ្នាំ២០១៥ របស់អង្គការសហប្រជាជាតិ ឲ្យដឹងថា ប្រទេសកម្ពុជា គឺជាប្រទេសទី៩ ដែលងាយរងគ្រោះជាងគេដោយសារគ្រោះមហន្តរាយនៅលើពិភពលោក ដែលជាឧបសគ្គដល់ដំណើរការអភិវឌ្ឍសម្រាប់ប្រទេសនេះ។ ករណីនេះ បានធ្វើឲ្យខូចខាតដល់វិស័យសំខាន់ៗមួយចំនួន ដូចជា កសិកម្ម សេដ្ឋកិច្ច សុខភាព និងអប់រំជាដើម។ ជាងនេះទៀត បើតាមតួលេខព្យាករណ៍របស់អង្គការសុខភាពពិភពលោក នៅរវាងពីឆ្នាំ២០៣០ ដល់ឆ្នាំ២០៥០ ការប្រែប្រួលអាកាសធាតុ នឹងអាចបង្កឲ្យមានមនុស្សស្លាប់បន្ថែមប្រមាណ ២៥ម៉ឺននាក់ (២៥០.០០០នាក់) ក្នុងមួយឆ្នាំៗ ក្នុងនោះជិត ៤ម៉ឺននាក់ (៣៨.០០០នាក់) ស្លាប់ដោយសារកម្ដៅខ្លាំង ជិត ៥ម៉ឺននាក់ (៤៨.០០០នាក់) ដោយការរាករូស ៦ម៉ឺននាក់ដោយរោគគ្រុនចាញ់ និងជិត ១០ម៉ឺននាក់ (៩៥.០០០នាក់) ជាកុមារដោយសារកង្វះចំណីអាហារ។
កាលពីថ្ងៃទី១១ ខែមេសា ឆ្នាំ២០១៦ កន្លងទៅ ប្រមុខរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន ក៏បានណែនាំដល់ក្រសួងស្ថាប័នពាក់ព័ន្ធ និងអាជ្ញាធរគ្រប់ជាន់ថ្នាក់ រួមនឹងមន្ទីរធនធានទឹកបង្កើនការយកចិត្តដាក់ដោះស្រាយបញ្ហាកង្វះ ទឹកជូនប្រជាពលរដ្ឋរហូតដល់ពេលមានភ្លៀងធ្លាក់ ពិសេសក៏អំពាវនាវឲ្យកសិករសន្សំសំចៃទឹកទុកប្រើប្រាស់ ដោយសារតែកម្ពុជា ជួបគ្រោះក្ដៅខ្លាំងហើយអូសបន្លាយរយៈពេលយូរ។ ប៉ុន្តែកសិករ និងអ្នកធ្វើការពាក់ព័ន្ធក្នុងវិស័យកសិកម្មយល់ថា ទោះបីជាកន្លងមកមានការអំពាវនាវពីលោកនាយករដ្ឋមន្ត្រី ហ៊ុន សែន ទៅកាន់មន្ត្រីពាក់ព័ន្ធ និងមានការសន្យាជាច្រើនលើកច្រើនសាពីស្ថាប័នពាក់ព័ន្ធ ថានឹងចាត់វិធានការដោះស្រាយបញ្ហារាំងស្ងួតក្ដី តែហាក់នៅតែគ្មានប្រសិទ្ធភាព។ ផ្ទុយទៅវិញ វិស័យកសិកម្មនៅកម្ពុជា នៅតែអន់ខ្សោយ បើធៀបនឹងប្រទេសជិតខាង ពិសេសការថយចុះកម្លាំងពលកម្មក្នុងវិស័យនេះ នៅតែកើនឡើងពីមួយឆ្នាំទៅមួយឆ្នាំ ហើយប្រជាកសិករកម្ពុជា នៅតែរស់នៅក្នុងស្ថានភាពក្រីក្រ៕
No comments:
Post a Comment