កាសែត ភ្នំពេញប៉ុស្តិ៍ ប្រកាន់ ជំហរ មិន កែតម្រូវ អត្ថបទ ដែលថា, លោក ហ៊ុន សែន ជាអធិរាជ ហ្វេសប៊ុក
RFA / វិទ្យុ អាស៊ី សេរី | ២០ មេសា ២០១៦
អត្ថបទរបស់កាសែតភ្នំពេញប៉ុស្តិ៍ ចុះផ្សាយនៅថ្ងៃទី២០ ខែមេសា ឆ្នាំ២០១៦។ Photo: RFA
និពន្ធនាយក កាសែត ភ្នំពេញប៉ុស្តិ៍ ផ្នែកភាសាខ្មែរ ប្រកាន់ជំហរ ថា នឹងមិន កែតម្រូវ អត្ថបទ ដែលបានចុះផ្សាយ រួចហើយទេ ពាក់ព័ន្ធ នឹងប្រតិកម្ម របស់ លោក ហ៊ុន សែន, ក៏ប៉ុន្តែ និពន្ធនាយក របស់ កាសែតនេះ អះអាង ថា, ខ្លួន នឹងចុះផ្សាយ ទាំងស្រុង តែ ទៅលើខ្លឹមសារ ដែលស្នើ ឲ្យកែតម្រូវ ប៉ុណ្ណោះ។
អ្នកជំនាញ ផ្នែកវិស័យ សារព័ត៌មាន យល់ឃើញ ថា, ប្រសិនបើ ការចុះផ្សាយ ដំណឹងនោះ ជាការពិត ដូចអ្វី ដែលលោក ហ៊ុន សែន និយាយមែន, ហើយ បែរ ជាកាសែត កែតម្រូវវិញ គឺ ជាកំហុសឆ្គង ដ៏ធ្ងន់ធ្ងរ និងប្រាសចាក ពីវិជ្ជាជីវៈ របស់ខ្លួន។
ក្រោយ ពីកាសែត ភ្នំពេញប៉ុស្តិ៍ សរសេរ ថា, លោក ហ៊ុន សែន តាំងខ្លួន ជាអធិរាជ ហ្វេសប៊ុក (Facebook), មិនបាន ២៤ម៉ោង ស្រួលបួល ផងនោះ ស្រាប់តែ ខុទ្ទកាល័យ របស់លោក នាយករដ្ឋមន្ត្រី ក៏ចាប់ផ្ដើម ទាមទារ ឲ្យកាសែតនេះ ចេញមុខ កែតម្រូវ ជាកំហិត អំពី ខ្លឹមសារ ដែលបានចុះផ្សាយ រួចហើយនេះ។ ក៏ប៉ុន្តែ និពន្ធនាយក នៃកាសែត ភ្នំពេញប៉ុស្តិ៍ អះអាង ថា, ខ្លួន នឹងមិន កែតម្រូវ តាមការទាមទារ នោះឡើយ។ ផ្ទុយទៅវិញ នឹងចុះផ្សាយ តែ ចំពោះ ខ្លឹមសារ ទាំងស្រុង នៃលិខិត ដែលបានស្នើ ឲ្យកែតម្រូវ ប៉ុណ្ណោះ។
និពន្ធនាយកកាសែតភ្នំពេញប៉ុស្តិ៍ផ្នែកភាសាខ្មែរ លោក កៃ គឹមសុង បញ្ជាក់ជំហរនៅថ្ងៃទី២០ មេសា ថា ផ្អែកលើខ្លឹមសារនៃអត្ថបទដែលបានចុះផ្សាយរួចហើយ គឺរកមិនឃើញពីមន្ទិល ឬកំហុសឆ្គងដូចការទាមទារឲ្យកែកុនអត្ថបទ ដូចការស្នើសុំពីខុទ្ទកាល័យរបស់ លោក ហ៊ុន សែន ឡើយ។ លោកបន្តថា អ្វីដែលស្ថាប័នផ្នែកព័ត៌មានមួយនេះត្រូវធ្វើនោះ គឺត្រូវចុះផ្សាយទាំងស្រុងតែអំពីខ្លឹមសារ ដែលបានស្នើសុំប៉ុណ្ណោះ។ ម្យ៉ាងក្នុងខ្លឹមសារដែលស្នើឲ្យកែតម្រូវនោះ មានន័យគ្រប់គ្រាន់រួចទៅហើយ ដែលមិនចាំបាច់កែអ្វីទៀតឡើយ។ លោកបន្តថា «យើងចុះផ្សាយអ្វីដែលខុទ្ទកាល័យ របស់សម្ដេចនាយកស្នើសុំ ហើយយើងមិនបានធ្វើការកែតម្រូវអីលើអត្ថបទយើងនោះទេ ព្រោះថាធម្មតា ចុះផ្សាយហើយនៅក្នុងខ្លឹមសារនោះ ក៏ដូចជាបានបកស្រាយនៅក្នុងលិខិតហ្នឹងអស់ហើយដែរ។ បានសរុបរួមនៅក្នុងលិខិតដែលបានស្នើសុំឲ្យកែតម្រូវនោះតែម្ដង ហើយ ក៏ដូចជាមានន័យថា បានកែតម្រូវហើយដែរ ក៏ប៉ុន្តែជាអ្វីដែលសេចក្ដីប្រាថ្នាខាងខុទ្ទកាល័យ។»
ការប្រកាន់ជំហរនៅពេលនេះរបស់ លោក កៃ គឹមសុង គឺបន្ទាប់ពីខុទ្ទកាល័យរបស់ លោក ហ៊ុន សែន ទទួលបន្ទុកផ្នែកហ្វេសប៊ុក ប្រតិកម្មដោយស្នើឲ្យកាសែតភ្នំពេញប៉ុស្តិ៍ កែតម្រូវជាបន្ទាន់។
លិខិតចុះថ្ងៃទី២០ មេសា ក្នុងថ្ងៃតែមួយដែលកាសែតបានចុះផ្សាយដែរនោះ បន្តថា កាសរសេរដែលនិយាយថា លោក ហ៊ុន សែន អួតខ្លួនជាអធិរាជហ្វេសប៊ុកនោះ គឺបំភ្លៃគ្មានការពិត និងគ្មានការទទួលខុសត្រូវលើវិជ្ជាជីវៈ។
បើទោះបីជាមានប្រតិកម្មបែបនេះក៏ដោយចុះ កាលពីថ្ងៃទី១៩ មេសា នៅក្នុងពិធីសម្ពោធរោងចក្រស្ករសនៅខេត្តព្រះវិហារ គឺមុនមួយថ្ងៃនៃប្រតិកម្មនេះ លោក ហ៊ុន សែន ក៏ប្រើពាក្យថា អធិរាជនេះផងដែរ។ លោក ហ៊ុន សែន ថ្លែងដោយមោទនភាពថា គណនេយ្យហ្វេសប៊ុករបស់លោកមានអ្នកចុចចូលចិត្ត (Like) ជាង ៣លាននាក់រួចទៅហើយ ហើយក៏ជាហ្វេសប៊ុកដែលឈរលំដាប់ជួរមុខក្នុងចំណោមមេដឹកនាំពិភពលោកថែមទៀតផង។ លោកបន្តថា «មានអ្នកណាមួយគេចូលទៅគេថា Like ឲ្យលោកនេះទេ ប៉ុន្តែទៅចូលនៅក្នុងផេករបស់ លោក ហ៊ុន សែន។ អ្ហា! អូ! ហ្វេសប៊ុកនៅលើពិភពលោកអ៊ីចឹងអី? បើល្ងង់ណាស់មកសួរ ហ៊ុន សែន វិញ។ អធិរាជហ្វេសប៊ុក។ វាឆ្កួតឡប់អីវា រួចខ្ញុំនេះត្រូវគេបញ្ចូលទៅក្នុងថប់ហ្វាយ (Top 5) ពិភពលោក។ ថ្ងៃខ្លះខ្ញុំលេខ១ ពិភពលោកណា។»
ជុំវិញបញ្ហានេះ អ្នកឯកទេសផ្នែកវិស័យសារព័ត៌មានយល់ឃើញថា ប្រសិនបើសារដែលប្រមុខរដ្ឋាភិបាលថ្លែងនោះជាការពិត ហើយបែរជាកាសែតកែតម្រូវមែន នោះស្មើក្បត់វិជ្ជាជីវៈ និងក្រមសីលធម៌របស់ខ្លួន។
នាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង ចាត់ទុកថា នេះជាសញ្ញានៃការគំរាមកំហែងទៅលើវិស័យសារព័ត៌មាន ទោះការគំរាមកំហែងនោះធ្វើឡើងដោយផ្ទាល់ ឬប្រយោលក៏ដោយ។ លោកបន្តថា «ខ្ញុំ មើលខុទ្ទកាល័យលោកនាយករដ្ឋមន្ត្រីចេញលិខិតហ្នឹង គឺសំដៅទៅលើការគំរាមកំហែងទៅក្រុមអ្នកសារព័ត៌មានហ្នឹង។ គាត់យល់ថាអាហ្នឹងវាជារឿងពិតហើយ បានជាព័ត៌មានផ្សាយ។ គាត់ជំរុញឲ្យមានការកែតម្រូវ ប៉ុន្តែគាត់បង្ហាញនូវអំណាចចំពោះការគំរាមដោយប្រយោល។»
ច្បាប់ស្ដីពីរបបសារព័ត៌មានមាត្រា១០ កំណត់ថា ជនណាម្នាក់ដែលយល់ថា អត្ថបទណាមួយទោះជាសរសេរបញ្ឆិតបញ្ឆៀងដោយរូបគំនូរ ឬរូបថតខុសពីការពិត ដែលធ្វើឲ្យប៉ះពាល់ដល់កិត្តិយស ឬសេចក្ដីថ្លៃថ្នូរ ជននោះមានសិទ្ធិឲ្យសារព័ត៌មានកែតម្រូវ។ ចម្លើយដែលកែតម្រូវ ឬឆ្លើយតប ត្រូវចុះផ្សាយក្នុងរយៈពេល ៧ថ្ងៃយ៉ាងយូរ ឬនៅលេខបន្ទាប់ ក្រោយទទួលបានការទាមទារឲ្យកែតម្រូវ ឬឆ្លើយតប៕
អធិរាជ ស្ថាន នរក is more like it!!! Vas-y, tout droit à l'enfer!!!
ReplyDelete