ក្រុមហ៊ុន មួយចំនួន កាត់បន្ថយ បរិមាណ នាំចេញអង្ករ
RFA / វិទ្យុ អាស៊ី សេរី | ២០ មេសា ២០១៦
ស្រូវ និងអង្ករផ្ការំដួល
ត្រូវបានគេដាក់តាំងបង្ហាញក្នុងវេទិកាស្រូវអង្ករកម្ពុជា លើកទី៥
នារាជធានីភ្នំពេញ កាលពីថ្ងៃទី២៥ ខែមករា ឆ្នាំ២០១៦។ RFA/Tha Kitya
ក្រុមហ៊ុន នាំអង្ករចេញ ទៅកាន់ ទីផ្សារ អន្តរជាតិ លើកឡើង ថា, ការឡើងកម្ដៅ អាកាសធាតុ មិនត្រឹមតែ គំរាមកំហែង ដល់សន្តិសុខ ស្បៀង ក្នុងស្រុក ប៉ុណ្ណោះទេ, បញ្ហានេះ ក៏កំពុង បង្កផលប៉ះពាល់ ដល់ការ នាំចេញ អង្ករ ទៅកាន់ ទីផ្សារ អន្តរជាតិ ថែមទៀត។
ទន្ទឹមគ្នានេះ ក្រុមហ៊ុន នាំអង្ករចេញ នៅកម្ពុជា មួយចំនួន អះអាង ថា, ខ្លួន បានកាត់បន្ថយ បរិមាណ នាំចេញ ទៅកាន់ ទីផ្សារ អន្តរជាតិ។
ម្ចាស់ក្រុមហ៊ុន នាំអង្ករចេញ ទៅកាន់ ទីផ្សារ អន្តរជាតិ អះអាង ថា, ការកាត់បន្ថយ បរិមាណ នាំចេញ អង្ករ ប្រមាណ ៥០% នៃផែនការ នាំចេញ អង្ករ សរុប ទៅកាន់ ទីផ្សារ អន្តរជាតិ ដោយសារ ការថយចុះ បរិមាណ ផលិតស្រូវ នៅក្នុងស្រុក និងកង្វះ ស្រូវ ស្តុកទុក សម្រាប់ នាំចេញ។ ការលើកឡើងនេះ កើតមាន ក្រោយពេល កម្ដៅ បរិយាកាស នៅក្នុងប្រទេស កម្ពុជា បានកើនឡើង ខ្ពស់ ដែលបង្កឡើង ដោយរលក កម្ដៅ បាតុភូត អេលនីណូ (El Nino) ដែលខ្លាំង បំផុត ក្នុងប្រវត្តិសាស្ត្រ។
ម្ចាស់រោងម៉ាស៊ីនកិនស្រូវ និងជាអគ្គនាយកក្រុមហ៊ុន អេមរុ រ៉ាយ [AMRU RICE (CAMBODIA) Co., LTD.] ដែលជាក្រុមហ៊ុននាំចេញអង្ករធំមួយនៅកម្ពុជា លោក សុង សារ៉ន បានប្រាប់វិទ្យុអាស៊ីសេរី នៅថ្ងៃទី១៩ ខែមេសា ថា បញ្ហាឡើងកម្ដៅអាកាសធាតុដែលបង្កឲ្យរាំងស្ងួត មានផលប៉ះពាល់ខ្លាំងដល់កសិករកម្ពុជា។ ជាក់ស្ដែង សម្រាប់ត្រីមាសទី២ ចាប់ពីខែមេសា ដល់ខែមិថុនា ក្រុមហ៊ុនលោកបានសម្រេចកាត់បន្ថយបរិមាណនាំចេញអង្ករប្រមាណ ៥០% នៃផែនការសរុបសម្រាប់នាំចេញអង្ករទៅកាន់ទីផ្សារអន្តរជាតិ៖ «សម្រាប់ ក្រុមហ៊ុនខ្ញុំកាត់បន្ថយនាំចេញអង្ករប្រមាណ ៥០% ព្រោះយើងមិនអាចទទួលការបញ្ជាទិញពីប្រទេសនៅលើពិភពលោកបាន ព្រោះខ្លាចមិនមានស្រូវកិនជាអង្ករគ្រប់គ្រាន់។»
អគ្គនាយកក្រុមហ៊ុននាំចេញអង្កររូបនេះ ឲ្យដឹងដែរថា បញ្ហាឡើងកម្ដៅអាកាសធាតុធ្វើឲ្យប្រទេសមួយចំនួននៅអាស៊ីអាគ្នេយ៍ ឬអាស៊ាន កំពុងជួបបញ្ហា ក្នុងនោះមានប្រទេសថៃ វៀតណាម និងកម្ពុជា ជាដើម។ ដោយឡែកសម្រាប់ប្រទេសថៃ និង វៀតណាម មិនសូវប្រឈមបញ្ហាដូចកម្ពុជា នោះទេ ព្រោះប្រទេសទាំងពីរមានបរិមាណស្រូវស្តុកទុកច្រើនសម្រាប់ផែនការ នាំចេញ ពីព្រោះថា ប្រទេសទាំងនេះ រដ្ឋាភិបាលបានឧបត្ថម្ភទុនដល់ម្ចាស់ក្រុមហ៊ុននាំអង្ករចេញ។
ទន្ទឹមនឹងការលើកឡើងនេះ តំណាងសហគមន៍កសិករមកពីខេត្តកំពង់ស្ពឺ លោក ស៊ឹម រ៉ុម លើកឡើងថា បញ្ហាឡើងកម្ដៅនេះ មិនត្រឹមតែធ្វើឲ្យបរិមាណផលិតស្រូវកសិករថយចុះប៉ុណ្ណោះទេ វាក៏ប៉ះពាល់ដល់ដាំដុះដំណាំ និងបន្លែដទៃទៀតផងដែរ។ បន្ថែមពីនេះទៀត បញ្ហាឡើងកម្ដៅ ក៏ជំរុញឲ្យកសិករមួយចំនួនលែងចង់ប្រកបរបរកសិកម្ម ដោយសារតែគ្មានការអន្តរាគមន៍ពីស្ថាប័នពាក់ព័ន្ធ៖ «ខ្ញុំសូម សំណូមពរដល់រដ្ឋាភិបាល គួរតែចុះពិនិត្យផ្ទាល់ដល់កន្លែងដែលរងគ្រោះខ្លាំង ពិសេសតំបន់ដែលខ្វះទឹក យ៉ាងហោចណាស់ឲ្យគាត់អាចមានលទ្ធភាពខ្លះដោះស្រាយជីវភាព និងការដាំដុះបានខ្លះ។»
ចំណែកឯអគ្គលេខាធិការសហព័ន្ធស្រូវអង្ករកម្ពុជា លោក មូល សារិទ្ធី ទទួលស្គាល់ថា បញ្ហាអាកាសធាតុឡើងកម្ដៅ មិនមែនប៉ះពាល់តែកម្ពុជាប៉ុណ្ណោះទេ ព្រោះបញ្ហានេះគឺជាបញ្ហាពិភពលោក។ ប៉ុន្តែលោកយល់ថា ខណៈនេះ រដ្ឋាភិបាលកម្ពុជា និងដៃគូអភិវឌ្ឍន៍ត្រូវជួយកសាងសមត្ថភាព និងចែករំលែកមូលនិធិសម្រាប់ជួយសហគមន៍មូលដ្ឋាន ដើម្បីឲ្យពួកគាត់មានលទ្ធភាពក្នុងការឆ្លើយតបនឹងបញ្ហាប្រែប្រួល អាកាសធាតុ។
ឆ្លើយតបនឹងការលើកឡើងនេះ លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម មានប្រសាសន៍ថា ការឡើងកម្ដៅអាកាសធាតុ និងភាពរាំងស្ងួតនៅកម្ពុជា មិនបង្កផលប៉ះពាល់ធ្ងន់ធ្ងរដល់ផលិតកម្មស្រូវនោះទេ ប៉ុន្តែលោកទទួលស្គាល់ថា បញ្ហានេះបានធ្វើឲ្យដំណាំកសិកម្មមួយចំនួនរងគ្រោះ។ លោកថា ដើម្បីទប់ស្កាត់បញ្ហានេះ រដ្ឋាភិបាលបានកសាងបណ្ដាញប្រព័ន្ធធារាសាស្ត្រមេទឹកសំខាន់ៗ ក្នុងនោះដូចជានៅខេត្តស្វាយរៀង កំពង់ធំ ពោធិ៍សាត់ និងបាត់ដំបង ជាដើម៖ «ទាំង ស្រូវវស្សា និងស្រូវប្រាំង យើងបានប្រមូលពីបងប្អូនកសិករប្រមូលចូលជង្រុកបានជិត ១០០% ហើយ អ៊ីចឹងបញ្ហាឡើងកម្ដៅវាមិនបង្កបញ្ហាធ្ងន់ធ្ងរដល់ដំណាំស្រូវនោះ ទេ។»
ទន្ទឹមនឹងនេះដែរ ក្រសួងធនធានទឹក និងឧតុនិយម ក៏ស្វាគមន៍សេចក្ដីសម្រេចរបស់រដ្ឋាភិបាលចិន ក្នុងការបើកបង្ហូរទឹកជាថ្មីពីទំនប់វារីអគ្គិសនីជីងហុង ខេត្តយូណាន ចូលមកទន្លេមេគង្គក្រោមសម្រាប់ការប្រើប្រាស់បន្ទាន់ ខណៈអាកាសធាតុនៅកម្ពុជា កំពុងឡើងកម្ដៅ និងរាំងស្ងួត។ ក្រសួងក៏រំពឹងដែរថា ការបើកបង្ហូរទឹកជាថ្មីរបស់ចិន នឹងជួយដល់វិស័យកសិកម្មនៅកម្ពុជា។
ទោះបីជាយ៉ាងណាក៏ដោយ ក្រុមម្ចាស់រោងម៉ាស៊ីនកិនស្រូវ និងក្រុមហ៊ុននាំចេញអង្ករ យល់ថា ការបើកបង្ហូរទឹកពីទំនប់វារីអគ្គិសនីរបស់ចិន នឹងជួយដល់វិស័យកសិកម្មកម្ពុជា បានតិចតួចប៉ុណ្ណោះ ដោយសារកម្ពុជា គ្មានយន្តការច្បាស់លាស់ក្នុងការប្រើប្រាស់ទឹកឲ្យមានប្រសិទ្ធភាព ដូចជាប្រព័ន្ធធារារាស្ត្រ ការរៀបចំប្រព័ន្ធទឹកទន្លេមេគង្គ បង្ហូរចូលស្រែជាដើម។
ក្រុមហ៊ុននាំចេញអង្ករ ក៏ស្នើរដ្ឋាភិបាលត្រូវមានកញ្ចប់ថវិកា សម្រាប់បន្សាំការប្រែប្រួលអាកាសធាតុដើម្បីសម្រេចទិសដៅនាំចេញអង្ករ ឲ្យបាន ១លានតោនក្នុងមួយឆ្នាំៗ៕
No comments:
Post a Comment