សេដាក ជំរុញ ឲ្យកសិករ ដាំបន្លែផ្លែឈើ និងស្រូវ ប្រើជីធម្មជាតិ
ក្រុមកសិករនាំគ្នាដាក់តាំងលក់បន្លែផ្លែឈើដែលដាំដោយប្រើជីសរីរាង្គធម្មជាតិ ក្នុងពិធីតាំងពិព័រណ៍កសិផល នាស្តង់មុខសណ្ឋាគារសេរីភាព នៅខេត្តសៀមរាប កាលពីថ្ងៃទី១៨ ខែធ្នូ ឆ្នាំ២០១៣។
RFA/Hang Savyouth
ក្រុមកសិករប្រមាណ ៨០នាក់ មកពីស្រុកចំនួន៤ បាននាំយកកសិផលជាច្រើនប្រភេទមកធ្វើការតាំងពិព័រណ៍ និងដើរដង្ហែក្បួននៅតាមដងផ្លូវក្នុងទីក្រុងសៀមរាប ដោយបំផុសឱ្យប្រជាពលរដ្ឋជាច្រើនជួយគាំទ្របន្លែផ្លែឈើខ្មែរ ដែលផលិតដោយជីសរីរាង្គធម្មជាតិ។
«សំឡេង»
ក្បួនដង្ហែកសិផលនេះ គឺរៀបចំដោយអង្គការក្រៅរដ្ឋាភិបាលឈ្មោះ សេដាក ក្នុងបំណងជួយលើកកម្ពស់ជីវភាពកសិករខ្មែរដែលខិតខំដាំដំណាំតាមបែបធម្មជាតិ ព្រមទាំងចង់បង្វែរអារម្មណ៍ប្រជាពលរដ្ឋខ្មែរជាច្រើនទៀតដែលកំពុងទទួលទានបន្លែផ្លែឈើនាំចូលពីបរទេស ហើយប្រើជីគីមី ឱ្យពិចារណាឡើងវិញអំពីការប៉ះពាល់ដល់សុខភាព។
អ្នកសម្របសម្រួលគម្រោងនៃមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា សេដាក ប្រចាំខេត្តសៀមរាប គឺលោក ហួត ដុក។ លោកបានមានប្រសាសន៍ថា ជាច្រើនឆ្នាំមកហើយ អង្គការ សេដាក តែងជួយបណ្ដុះបណ្ដាលកសិករនៅតាមបណ្ដាស្រុកចំនួន៤ នៃខេត្តសៀមរាប ឱ្យចេះដាំបន្លែផ្លែឈើតាមរបៀបប្រើជីសរីរាង្គធម្មជាតិ ដោយមិនប្រើថ្នាំពុល និងជីគីមីដែលនាំឱ្យខាតទុនច្រើននោះទេ។ លោក ហួត ដុក បានបញ្ជាក់ថា បច្ចុប្បន្ន មានបន្លែ និងផ្លែឈើជាច្រើនដែលកសិករខ្មែរនៅស្រុកស្រីស្នំ អង្គរជុំ ស្រុកអង្គរធំ និងស្រុកបន្ទាយស្រី ខេត្តសៀមរាប ផលិតបាន។ ដូច្នេះ ការរៀបចំតាំងពិព័រណ៍កសិផលជីសរីរាង្គ គឺដើម្បីរកទីផ្សារជួយកសិករឱ្យកាន់តែផលិតឱ្យបានច្រើន។ ជាមួយគ្នានេះ អង្គការក៏បានគិតទៅដល់បញ្ហាសុខភាព ទាំងកសិករជាអ្នកផលិត និងអ្នកទិញកសិផលទៅប្រើប្រាស់ដែរ។
ក្រុមកសិករនាំគ្នាកាន់កសិផល ហើយដើរដង្ហែតាមដងផ្លូវក្នុងទីក្រុងសៀមរាប ខេត្តសៀមរាប កាលពីព្រឹកថ្ងៃទី១៨ ខែធ្នូ ឆ្នាំ២០១៣។ RFA/Hang Savyouth
លោក ហួត ដុក៖ «យើងជំរុញឱ្យគាត់ប្រើប្រាស់ធម្មជាតិ ដែលវាសំខាន់។ ហើយមួយទៀត យើងគិតថា ផលិតផលទាំងអស់ហ្នឹង វាអាចងាយស្រួលក្នុងការប្រកួតប្រជែងទីផ្សារដែរ ពិសេសជាមួយប្រទេសជុំវិញខ្លួន ដូចជាវៀតណាម ឬក៏ថៃ ដែលគេមានបច្ចេកទេសទំនើបៗ។ ប្រជាពលរដ្ឋយើងជាអ្នកក្រីក្រ អ៊ីចឹងបើយើងគិតអាស្រ័យលើខាងក្រៅខ្លាំងពេក វាមិនល្អ។ ម្យ៉ាងទៀត បើយើងគិតទៅលើរសជាតិនៃផលិតផលដែលគាត់បានផលិតនោះ គឺមានរសជាតិឆ្ងាញ់សម្រាប់ការប្រើប្រាស់។ មួយទៀត វាទាក់ទងនឹងការជួយបង្កើតចំណូលដែរ ផលិតបានល្អគាត់ចំណាយតិច បើវិភាគទៅលើសេដ្ឋកិច្ច ភាពចំណេញ គឺបានច្រើន»។
ប្រជាកសិករខ្លះនៅខេត្តសៀមរាប បានសម្ដែងការត្រេកអរចាប់តាំងពីគេចេះបច្ចេកទេសដាំបន្លែផ្លែឈើ ដោយប្រើជីសរីរាង្គធម្មជាតិ និងធ្វើឱ្យរកកម្រៃបានច្រើនជួយដល់គ្រួសារ។
កសិករម្នាក់នៅភូមិវត្ត ឃុំត្បែង ស្រុកបន្ទាយស្រី ក្នុងចំណោមកសិករមកពីស្រុកដទៃទៀត គឺអ្នកស្រី ផុន ភា បានមានប្រសាសន៍ថា មុនពេលដែលគាត់ចេះដាំបន្លែផ្លែឈើដោយប្រើជីធម្មជាតិ គឺជីវភាពគ្រួសារគាត់ពិបាករកចំណូលប្រចាំថ្ងៃណាស់។ ក៏ប៉ុន្តែ រយៈពេលជាច្រើនឆ្នាំមកនេះចាប់តាំងពីគាត់ចេះបច្ចេកទេសដាំបន្លែផ្លែឈើដោយប្រើជីធម្មជាតិមក គឺជីវភាពគ្រួសារគាត់អាចធូរធារមួយកម្រិត។ អ្នកស្រី ផុន ភា ឱ្យដឹងថា បច្ចុប្បន្នគាត់អាចរកប្រាក់បានចំនួនជាង ៤០ម៉ឺនរៀលក្នុង១ខែៗ ដោយសារការលក់បន្លែ និងផ្លែឈើ៖ «១៨មុខខ្ញុំដាំ! មានម្ទេស មានជី មានបន្លែហូបផ្លែ មានត្រប់ សណ្ដែក ត្រកួន និងស្ពៃគ្រប់មុខ។ ខ្ញុំចង់ឱ្យជួយទិញផលិតផលជីធម្មជាតិនេះ ឱ្យកសិករដាំបានយូរអង្វែង មានទីផ្សារ។ ឥឡូវនេះ អត់ឈ្នះផលិតផលបរទេសទេ ព្រោះអត់ទាន់មានទីផ្សារជួយលើកទឹកចិត្តឱ្យកសិករដាំបានច្រើនគ្នា ព្រោះទិញតែអ្នកស្រុកក្នុងភូមិរបស់ខ្ញុំ»។
ប្រជាកសិករជាច្រើនសុទ្ធតែបង្ហាញគោលបំណងដូចគ្នាថា គេចង់ឱ្យរដ្ឋាភិបាលជួយយកចិត្តទុកដាក់រកទីផ្សារសម្រាប់លក់ផលិតផល។
«សំឡេង»
ទោះយ៉ាងណា ពេលបច្ចុប្បន្ននេះការរកទីផ្សាររបស់កសិករខ្មែរ ដើម្បីលក់ផលិតផលដែលដាំដុះដោយប្រើជីធម្មជាតិនោះ គឺមិនចោទជាបញ្ហាទាំងស្រុងទេ ក៏ប៉ុន្តែអ្វីដែលនៅតែចោទជាបញ្ហានៅឡើយ គឺកសិករខ្លួនឯងមិនទាន់មានសមត្ថភាពគ្រប់គ្រាន់ក្នុងការផលិត ដើម្បីផ្គត់ផ្គង់ទៅតាមតម្រូវការទីផ្សារទៅវិញ។
មានក្រុមហ៊ុនក្នុងស្រុកខ្លះ បានដើរប្រមូលទិញកសិផលខ្មែរដែលមិនប្រើប្រាស់ជីគីមី ក៏ប៉ុន្តែក្រុមហ៊ុនកំពុងជួបការលំបាក ដោយសារតែកសិករខ្មែរមិនអាចផលិតផ្គត់ផ្គង់ទៅតាមតម្រូវការបាន។
អ្នកគ្រប់គ្រងផ្នែកទីផ្សាររបស់ក្រុមហ៊ុន តែ កម្ពុជា គ្រូប គឺលោក លី ពិសី បានមានប្រសាសន៍ថា លោកកំពុងចង់ជួយកសិករខ្មែរនៅខេត្តសៀមរាប ដោយទិញយកមើមខ្ញី និងស្លឹកគ្រៃប្រមាណ ៥០០គីឡូក្រាម ក្នុង១ខែៗ ដើម្បីយកទៅធ្វើតែ។ លោក លី ពិសី បានបញ្ជាក់ថា ក្រុមហ៊ុនរបស់លោកកំពុងត្រូវការទិញកសិផលដោយប្រើជីធម្មជាតិ ប្រសិនបើកសិករអាចផលិតសម្រាប់ផ្គត់ផ្គង់ឱ្យបាន គឺក្រុមហ៊ុននឹងធ្វើកិច្ចសន្យាជាមួយគ្នា៖ «ខ្ញុំជួយបានផ្កាម្លិះ ខ្ញី ស្លឹកគ្រៃ ឥឡូវមានកាហ្វេ គ្រាប់ស្វាយចន្ទី ម្រេច ហើយនឹងបន្តទៅទៀត គឺព្នៅ ម្រះ ហើយនិងប្រភេទដំណាំផ្សេងទៀត គឺខ្ញុំកំពុងតែពិសោធន៍។ យើងច្នៃបានប្រភេទតែ ហើយនិងអាហារស្ងួតទេសម្រាប់ក្រុមហ៊ុនរបស់ខ្ញុំ ហើយខ្ញុំឥឡូវកំពុងតែកុម្ម៉ង់ប្រភេទគ្រឿងម៉ាស៊ីនគ្រឿងអីពីចិន មក ដើម្បីដំឡើងរោងចក្រឱ្យធំ ដើម្បីស្រូបយកប្រភេទដំណាំស្រុកខ្មែរឱ្យច្រើនទៅៗតាមដែលសមត្ថភាពខ្ញុំអាចធ្វើបាន»។
រយៈពេលជាង ១០ឆ្នាំមកនេះ មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា សេដាក ដែលបានជំនួយពីសហភាពអឺរ៉ុប និងអង្គការ ជី.អាយ.ហ្សិត (GIZ) បានចំណាយថវិកាប្រហែល ៣លានដុល្លារអាមេរិក ក្នុង១ឆ្នាំៗ ដើម្បីបណ្ដុះបណ្ដាលកសិករខ្មែរនៅ ១៦ខេត្តក្នុងប្រទេសកម្ពុជា ឱ្យចេះដាំបន្លែ និងស្រូវ ដែលប្រើជីសរីរាង្គធម្មជាតិ។
យុទ្ធសាស្ត្រនៃការជំរុញឱ្យដាំបន្លែ និងស្រូវប្រើជីធម្មជាតិនេះ បំណងដើម្បីឱ្យផលិតផលកសិករខ្មែរអាចប្រកួតប្រជែងទីផ្សារបានជាមួយនឹងប្រទេសជិតខាង ដែលមានបច្ចេកទេសកសិកម្មទំនើប និងជួយដល់សុខភាពសង្គម ព្រមទាំងអាចលើកកម្ពស់ជីវភាពកសិករឱ្យចេញផុតពីភាពក្រីក្រផង៕
No comments:
Post a Comment