រដ្ឋាភិបាលកម្ពុជាបានចោទប្រកាន់គណបក្សសង្គ្រោះជាតិ ថាបានអូសទាញ និងញុះញង់កម្មករ កម្មការិនីអោយចូលរួមបាតុកម្ម ហើយដែលបានបង្កអោយមានអសន្តិសុខ និងការគំរាមកំហែងដល់ស្ថិរភាពសង្គម និងសេដ្ឋកិច្ចជាតិទៀតផង។ ការចោទប្រកាន់ត្រូវបានធ្វើឡើងនៅក្នុងសេចក្តីអំពាវនាវរបស់រដ្ឋាភិបាលដែលចេញផ្សាយកាលពីល្ងាចថ្ងៃសៅរ៍។ ការអំពាវនាវរបស់រដ្ឋាភិបាលដែលបានកើតឡើងប៉ុន្មានម៉ោង មុនការរៀបចំធ្វើបាតុកម្មទ្រង់ទ្រាយធំរបស់គណបក្សសង្គ្រោះជាតិ ដោយមានការចូលរួមពីសហជីពកម្មករ និងអង្គការក្រៅរដ្ឋាភិបាលជាច្រើន។
លោកហូ វ៉ាន់ តំណាងរាស្ត្រជាប់ឆ្នោត និងជាអ្នកទទួលខុសត្រូវរៀបចំបាតុកម្មរបស់គណបក្សសង្គ្រោះជាតិ បដិសេធរាល់ការចោទប្រកាន់របស់រដ្ឋាភិបាល។ លោកហូ វ៉ាន់បានស្នើរដ្ឋាភិបាលបញ្ជាក់រាល់ចំនុចទាំងឡាយណា ដែលរដ្ឋាភិបាលឃើញថា គណបក្សសង្គ្រោះជាតិរៀបចំបាតុកម្មខុសច្បាប់នោះ។ ហើយថាប្រសិនបើរដ្ឋាភិបាលចោទប្រកាន់គណបក្សសង្គ្រោះជាតិថា បានអូសទាញកម្មករកាត់ដេរអោយចូលរួមធ្វើបាតុកម្មជាមួយខ្លួននោះ លោកហូ វ៉ាន់ពន្យល់ថា គោលនយោបាយរបស់គណបក្សសង្គ្រោះជាតិ វាបានដូចគ្នានឹងការទាមទាររបស់កម្មករ។ ដូច្នេះ សម្រាប់តំណាងរាស្ត្រជាប់ឆ្នោតរបស់់គណបក្សសង្គ្រោះជាតិរូបនេះ វាច្បាស់ណាស់ថា កម្មករកាត់ដេរត្រូវចូលរួមគាំទ្រគណបក្សលោកនោះ។
សូមបញ្ជាក់ផងដែរថា នៅក្នុងសេចក្តីអំពាវនាវរបស់ខ្លួន រដ្ឋាភិបាលបានស្នើអោយអ្នកដឹកនាំ ក៏ដូចជា អ្នកចូលរួមបាតុកម្ម ត្រូវប្រកាន់ខ្ជាប់ឥរិយាបទគោរពច្បាប់ និងមិនត្រូវប្រើសិទ្ធិរបស់ខ្លួនដោយរំលោភបំពាន មិនត្រូវបង្ខំពលរដ្ឋអោយចូលរួមបាតុកម្ម ព្រមទាំងចៀសវាងការប្រើអំពើហិង្សាគ្រប់បែបយ៉ាងទៀតផង។ រដ្ឋាភិបាលក៏អំពាវនាវដល់សហជីពកម្មករ អោយប្រកាន់ជំហរអព្យាក្រឹត និងមិនត្រូវធ្វើសកម្មភាពលាយឡំជាមួយគណបក្សនយោបាយឡើយ។
រដ្ឋាភិបាលក៏អំពាវនាវអោយកងកម្លាំងសមត្ថកិច្ចប្រកាន់សីលធម៌ វិជ្ជាជីវៈ និងការអត់ធ្មត់ខ្ពស់ដែរ ហើយស្នើអោយពលរដ្ឋទូទៅមិនអោយចូលរួមក្នុងបាតុកម្ម ឬសកម្មភាពខុសច្បាប់ឡើយ៕
No comments:
Post a Comment