អ្នកវិភាគ៖ កម្ពុជា កំពុងចម្លង រូបមន្ត អតីតរបបយោធា ភូមា មកអនុវត្ត នៅកម្ពុជា ករណីសន្តិសុខ
ដោយ៖ នួន បូរិន / វិទ្យុ វីអូឌី | ថ្ងៃព្រហស្បតិ៍ ទី23 ខែមករា ឆ្នាំ2014
សមត្ថកិច្ចកម្ពុជា(ខាងឆ្វេង)ពេលបង្ក្រាបនៅទីលានប្រជាធិបតេយ្យ និងសមត្ថកិច្ចភូមា(រូបភាពពី Google.com)
ស្ថានការណ៍សន្ដិសុខក្នុងរាជធានីភ្នំពេញចាប់តាំងពីថ្ងៃដែលអាជ្ងាធរបង្ក្រាបទៅលើបាតុករកម្មករ និងទៅលើបាតុករគណបក្សសង្គ្រោះជាតិនៅទីលានប្រជាធិបតេយ្យហើយក្រោយមកចាប់ផ្ដើមរឹតបន្តឹងសន្តិសុខមិនឲ្យប្រជាពលរដ្ឋជួបជុំគ្នាចាប់ពី១០នាក់ឡើងទៅហើយត្រូវបានបង្ក្រាប និងចាប់ខ្លួន។
ករណីនេះត្រូវបានអ្នកវិភាគ និងអ្នកតាមដានសង្គម យល់ឃើញថា ស្ថានការណ៍ហាក់ដូចជារុញកម្ពុជាដើរថយក្រោយនៃការអនុវត្តន៍សិទ្ធិសម្ដែងមតិនិងការប្រមូលផ្ដុំ ដែលផ្ទុយនឹងរដ្ឋធម្មនុញ្ញ សិទ្ធិស៊ីវិល និងនយោបាយនៃអនុសញ្ញាអន្ដរជាតិ។
ក្រុមអ្នកវិភាគ និងតាមដានស្ថានការណ៍សង្គមបានប្រៀបធៀបប្រទេសកម្ពុជាទៅនឹងប្រទេសភូមាដែលស្ថិតនៅក្រោមការគ្រប់គ្រងរបស់អតីតពួកយោធានិយមកាលពីទសវត្ស ១៩៩០។ ក្នុងគ្រានោះពួកយោធាភូមាក៏បានប្រើច្បាប់អាជ្ងាសឹកដាក់បម្រាម ហាមការប្រមូលផ្ដុំមនុស្សពី៥នាក់ឡើងទៅហើយធ្វើឲ្យការគោរពសិទ្ធិមនុស្ស និងការសម្ដែងមតិនៃរបបអតីតយោធាធ្លាក់ចុះក្នុងភាពអន់ថយយ៉ាងខ្លាំង។
ប៉ុន្ដែបច្ចុប្បន្នប្រទេសភូមាបានដើរឆ្លងផុតពីគន្លងដ៏ខ្មៅងងឹតនេះទៅហើយ។ ភូមា គឺជាប្រទេសមួយក្នុងតំបន់អាស៊ីដូចកម្ពុជាដែរតែពេលនេះភូមាត្រូវបានអន្ដរជាតិទទួលស្គាល់ថា មានការអភិវឌ្ឈន៍ខាងការគោរពសិទ្ធិមនុស្សការបញ្ចេញមតិគួរឲ្យភ្ងាក់ផ្អើល។ ក្រុមអ្នកវិភាគពិនិត្យឃើញស្ថានភាពបច្ចុប្បន្ននេះនៅកម្ពុជាកំពុងដើរតាមគន្លងចាស់របស់អតីតយោធាភូមា។
លោក កែម ឡី អ្នកស្រាវជ្រាវបញ្ហាសង្គម និងអ្នកវិភាគឯករាជ្យបានហៅស្ថានការណ៍សន្ដិសុខនៅភ្នំពេញបច្ចុប្បន្ននេះថា កំពុងតែយកគំរូតាមប្រទេសភូមាតាមអតីតកាល គឺក្នុងចន្លោះទស្សវត្សរ៍១៩៩០ និងដើមទសវត្សរ៍ ឆ្នាំ២០០០ ដែលមានចរិតលក្ខណៈជារបបមួយ ដ៏គួឲ្យភ័យខ្លាច។
កាលពីថ្ងៃទី២១មករា យ៉ាងតិចណាស់សកម្មជន១១នាក់ត្រូវបានចាប់ខ្លួននៅខណៈដែលសហគមន៍អ្នកភូមិបឹងកក និងអង្គការសង្គមស៊ីវិលប្រហែលជា១០០អង្គការបានហែញតិ្ដទៅដាក់នៅស្ថានទូតលោកខាងលិចមួយចំនួនមាន អាមេរិក និងបារាំងជាដើមដោយពួកគេមានគ្នាប្រមាណជា៥០នាក់ ដើម្បីឲ្យស្ថានទូតទាំងនោះជួយអន្តរាគមន៍ដោះលែងមនុស្ស២៣នាក់ដែលអាជ្ងាធរចាប់ខ្លួនកាលពីថ្ងៃទី២ និងទី៣មករា កាលដែលពួកកម្មករធ្វើបាតុកម្មទាមទារប្រាក់ឈ្នួលសមរម្យ។
លោក នី ចរិយា អ្នកតាមដានបញ្ហាសង្គម និងជាប្រធានផ្នែកស៊ើបអង្កេតសមាគម អាដហុក មានប្រសាសន៍ថា ស្ថានភាពសន្ដិសុខនៅភ្នំពេញបច្ចុប្បន្ននេះ គឺអាក្រក់ដូចប្រទេសភូមាកាលពីស្ថិតនៅក្រោមរបបពួកយោធានិយម។ លោកបញ្ចាក់ថា កម្ពុជាកំពុងដើរទៅរករបបផ្ដាច់ការហើយ។
កាលនៅក្នុងរបបយោធា ប្រទេសភូមាត្រូវបានសហគមន៍អន្តរជាតិ ហ៊ុំព័ទ្ធសេដ្ឋកិច្ច ព្រោះតែប្រទេសនេះ មុនទទួលយកសម្ពាធពីអន្តរជាតិដែលសុំឲ្យ មានការបើកចំហសេរីភាពបញ្ចេញមតិ និងការជួបជុំរបស់ពលរដ្ឋ ហើយមិនតែរបបយោធាភូមា បានចាប់ខ្លួន ក្រុមប្រឆាំងជាច្រើនរយនាក់ដាក់ពន្ធនាគារ ពីបទបង្កអសន្តិសុខសង្គម។ ប៉ុន្តែបច្ចុប្បន្ននេះ ភូមាបានដោះដូររបបគ្រប់គ្រងពីកងទ័ព មករដ្ឋាបាលស៊ីវិល ហើយកំពុងធ្វើដំណើរទៅរកការបោះឆ្នោតប្រធានាធិបតីនៅឆ្នាំ២០១៥ ដែលគេរំពឹង លោកស្រី អ៊ុងសាន សូជី មេដឹកនាំបក្សប្រឆាំងនឹងឈ្នះការបោះឆ្នោតនោះ។
លោក ហង្ស ពុទ្ធា អ្នកតាមដានស្ថានការណ៍នយោបាយសង្គម និងជានាយកអង្គការឃ្លាំមើលការបោះឆ្នោតមួយនៅកម្ពុជាហៅថា និកហ្វិចពិនិត្យឃើញថា កម្ពុជាមិនត្រូវជ្រើសរើសផ្លូវដែលរបបផ្ដាច់ការនៅភូមាបោះបង់ចោលនោះទេ។
បើទោះជាយ៉ាងណាក្រសួងមហាផ្ទៃបានចេញសេចក្ដីប្រកាសពត៌មានកាលពីថ្មីៗនេះថា ការចេញបម្រាមដូចនេះ គឺដើម្បីការពារសន្ដិសុខតែប៉ុណ្ណោះព្រោះអាជ្ងាធរទប់ស្កាតអំពើហិង្សាណាមួយ ដែលអាចកើតឡើងជាយថាហេតុ។ ទាំលោក ខៀវ សុភក៌ អ្នកនាំពាក្យក្រសួងមហាផ្ទៃ និង មន្ត្រីជាន់ខ្ពស់គណបក្សប្រជាជន ជាច្រើនទៀតធ្លាប់បានបដិសេធម្ដងរួចហើយ ទល្ហីកណាដែលថា កម្ពុជាដើរតាមរបបយោធាភូមា។ ប៉ុន្តែលោកនាយរដ្ឋមន្ត្រីកម្ពុជា លោក ហ៊ុន សែន កាលពីនៅក្នុងពិធីមួយនៅខេត្តក្រចេះ នៅថ្ងៃទី១៨មករា បានព្រមានថា នឹងមិនបណ្ដោយឲ្យកម្ពុជា ដើរតាមប្រទេសបដិវត្តផ្ការីក នៅពិភពអារ៉ាប់ជាដាច់ខាត។
យ៉ាងនេះក្ដីលោក យឹម សុវណ្ណ អ្នកនាំពាក្យគណបក្សសង្គ្រោះជាតិមានប្រសាសន៍ថា កាលៈទេសៈនេះគឺមិនបានឈរលើគោលការណ៍ប្រទេសនីតិរដ្ឋ និងប្រជាធិបតេយ្យឡើយ។ លោករិះគន់ថា វាជាសកម្មភាពដែលប្រទេសភូមាធ្លាប់អនុវត្តន៍កាលពីអតីតកាលហើយបែរជាកម្ពុជាជ្រើសរើសមកអនុវត្តជំនួសវិញនោះ។
ក្រុមអ្នកវិភាគ និងអ្នកតាមដានសង្គមបានធ្វើការព្រមានដូចៗគ្នាថា ប្រសិនបើសហគមន៍អន្ដរជាតិមិនជួយបំបែកភាពទាល់ច្រកនយោបាយនៅកម្ពុជាឲ្យទាន់ពេលវេលាទេនោះ គឺកម្ពុជានឹងធ្លាក់ចូលការគ្រប់គ្រងមួយ បែបផ្ដាច់ការ៕
No comments:
Post a Comment