ក្រុមគ្រួសារ សព អំពាវនាវ ឲ្យ អាជ្ញាធរ និងសង្គមស៊ីវិល ស្វែងរក ជនដៃដល់ យកមក ផ្តន្ទាទោស តាមច្បាប់
ដោយ៖ ឡាយ សាមាន / វីអូឌី | ថ្ងៃសុក្រ ទី24 ខែមករា ឆ្នាំ2014
ក្រុមគ្រួសារជនរងគ្រោះដែលរងការបាញ់សម្លាប់នៅផ្លូវ វ៉េងស្រេង បណ្តាលឲ្យមនុស្សស្លាប់ យ៉ាងតិច ៤នាក់ និងរបួសប្រមាណ៤០នាក់ អំពាវនាវឲ្យអាជ្ញាធរ និងអង្គការសង្គមស៊ីវិលពាក់ព័ន្ធទាំងអស់ វែកមុខរកជនដៃដល់មកផ្តន្ទាទោសតាមច្បាប់។
លោក សួស សំអុល អាយុ ៥២ឆ្នាំ ឪពុករបស់សពលោក គឹម ផល្លីន នៅខេត្តកពង់ស្ពឺ ប្រាប់ VOD ថាកូនរបស់លោកធ្វើជាកម្មករនៅរោងចក្រ Clory ច្រើនឆ្នាំមកហើយ មិនមែនជាជនអានាធិបតេយ្យដូចអ្វីដែល អាជ្ញាធរបានចោទប្រកាន់នោះទេ។ លោកថា រដ្ឋាភិបាលត្រូវស្វែករកជនដៃដល់មកផ្តន្ទាទោសតាមច្បាប់ ដើម្បីស្វែងរកយុត្តិធម៌ជូនគ្រួសារជនរងគ្រោះ «ប៉ិនមកដល់ថ្ងៃទី០៣ខែមករាឆ្នាំ២០១៤ហ្នឹង គឺថា ផ្ទុះបាតុកម្មសុំប្រាក់ខែ១៦០ហ្នឹង ដើម្បីឲ្យជីវភាពរស់នៅហ្នឹងវាបានធូរធាបន្ដិច ប៉ុន្ដែមិនទាន់បានបាតុកម្មគេយ៉ាងណាៗផង ត្រូវកងកម្លាំងឆ័ត្រយោង៩១១ហ្នឹងគេបាញ់កាំភ្លើងពិតគ្រប់ពិតទៅលើគ្នាគឺកន្លែងត្រូវហ្នឹងចំកន្លែងដែលមានអាចព្យាបាលបាន ពីខាងក្រោមដោះខាងស្ដាំទៅក្រោមដោះខាងឆ្វេង»។
ប្រធានអង្គការសិទ្ធិមនុស្សលីកាដូ លោកស្រី ពុង ឈីវកេក មានប្រសាសន៍ថា ករណីនេះ គឺអាស្រ័យលើឆន្ទៈរបស់រដ្ឋាភិបាល ក្នុងការស្វែងរកការពិត ដើម្បីបញ្ចប់និទណ្ឌភាពនៅកម្ពុជា។ លោកស្រីយល់ថា កម្ពុជា ជាប្រទេសនីតិរដ្ឋ ដូច្នេះយុត្តិធម៌ ត្រូវមានសម្រាប់ជនរងគ្រោះ «បើសិនជាមានហេតុការណ៍អីស្លាប់អីចឹង គឺត្រូវតែមានការស៊ើបអង្កេតឲ្យច្បាស់លាស់ពីអាជ្ញាធរមានសមត្ថកិច្ចមិនបាច់បង្កើតអីគណៈកម្មការអីផ្សឹងទៀតក៏បានដែរ គឺអាជ្ញាធរមានសមត្ថកិច្ចដែលមានស្រាប់ហ្នឹងគឺមានកាតព្វកិច្ចត្រូវតែស៊ើបអង្កេតហើយមិនចាំបាច់មានពាក្យបណ្ដឹងទេ មិនចាំបាច់មានគ្រួសារណាដាក់ពាក្យបណ្ដឹងទេ»។
នាយកប្រតិបត្ដិក្រុមអ្នកច្បាប់ការពារសិទ្ធិមនុស្សកម្ពុជា លោក សុក សំអឿន ចាត់ទុកថានេះការអសមត្ថភាព និងជាការគេចវេសរបស់អាជ្ញាធរក្នុងការស្វែងរកជនល្មើស។
តាមរបាយការណ៍បានបង្ហាញថា ក្នុងហេតុការណ៍ប៉ះទង្គិចរវាងសមត្ថកិច្ច ជាមួយកម្មករកាលពីថ្ងៃទី២ និងទី៣ ខែមករា បណ្តាលឲ្យមនុស្សស្លាប់យ៉ាងតិច៤នាក់ លោកគឹម ផល្លី កម្មកររោងចក្រ (Clory) លោក សំ រ៉ាវី កម្មកររោងចក្រ (New Minda) លោក យាន ឬទ្ធី កម្មកររោងចក្រ (សិន ចូវ) និង លោក ផេង កុសល កម្មកររោងចក្រ (Y tech) និងអ្នករងរបួសប្រមាណ ៤០នាក់ទៀត នៅពេលទាមទារប្រាក់ខែគោលអប្បបរមា ១៦០ដុល្លារក្នុងមួយខែ៕
No comments:
Post a Comment