សហជីពពហុវិស័យ ព្រមានប្រមូលផ្តុំ និងហែក្បួនជាថ្មី បើរដ្ឋាភិបាល មិនដោះលែងជនជាប់ឃុំទាំង ២៣នាក់
ដោយ៖ តាំង វីដា | ថ្ងៃសុក្រ ទី10 ខែមករា ឆ្នាំ2014
, ម៉ោង 03:26 PM
សហជីពពហុវិស័យចំនួន៧ បើកសន្និសីទសារព័ត៌មាន ថ្ងៃទី១០ ខែមករា ឆ្នាំ២០១៤(រូបភាពដោយ តាំង វីដា)
សហជីពពហុវិស័យ ចំនួន៧ នៅព្រឹកថ្ងៃសុក្រនេះ ព្រមានធ្វើការប្រមូលផ្តុំគ្នា និងដង្ហែក្បួនជាថ្មី នៅទីសាធារណៈ ដោយមានអ្នកចូលរួមរាប់ម៉ឺននាក់ ប្រសិនបើរដ្ឋាភិបាល មិនព្រមដោះលែងជនត្រូវបានឃុំខ្លួនទាំង២៣នាក់ ដែលសមត្ថកិច្ច បានចាប់ឃុំក្នុងហេតុការណ៍ប៉ះ ទង្គិចកន្លងមក។
បន្ទាប់ពីពិធីបង្សុកូលគោរពវិញ្ញាណក្ខន្ធគម្រប់៧ថ្ងៃរបស់កម្មករ ដែលបានបាត់បង់ជីវិតក្នុងព្រឹត្តការណ៍ប៉ះទង្គិចនៅទី៣ ខែមករា ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា លោក ស ម៉ូរ៉ា ថ្លែងក្នុងសន្និសីទសារព័ត៌មានថា បណ្តាញពហុវិស័យ ដែលមានសមាគមចំនួន៧ជាសមាជិក ទទូចឲ្យរដ្ឋាភិបាលកម្ពុជា ដោះលែងសកម្មជនសិទ្ធិមនុស្ស និងកម្មករទាំង២៣នាក់ ដែលត្រូវឃុំនៅពន្ធនាគារត្រពាំងថ្លុង ខេត្តកំពង់ចាម ដោយគ្មានលក្ខខណ្ឌ ក្រោមហេតុផលថា ជនទាំងនោះ គ្រាន់តែជាអ្នកឃ្លាំមើលការគោរពសិទ្ធិមនុស្ស និងជាអ្នកសម្របសម្រួលការទាមទារតែប៉ុណ្ណោះ មិនមែនជាអ្នកញុះញង់ឲ្យកើតមានហិង្សា ដូចការចោទប្រកាន់នោះទេ។
(រូបភាពដោយ តាំង វីដា)
លោក ស ម៉ូរ៉ា អះអាងថា សមាជិកបណ្តាញសហជីពរាប់ម៉ឺននាក់ នឹងបន្តយន្តការជួបប្រជុំ សម្តែងមតិនៅទីសាធារណៈ ហើយអាចនឹងដង្ហែក្បួន ៣ថ្ងៃម្តង បើការទាមទាររបស់ពួកគេ មិនត្រូវបានដោះស្រាយ <<ហើយផែនការ បងប្អូនគេបាយទាក់ទងមក ថាគេចង់ជួបជុំឲ្យធំ គេចង់ជួបជុំរាប់ម៉ឺននាក់ ហើយយើងក៏ទទួលសំណើររបស់បងប្អូនហ្នឹងដែរ ហើយយើងនឹងរៀបចំ ហើយនឹងជូនដំណឹងទៅបងប្អូនដើម្បីជំរុញឲ្យមានការដោះលែងអ្នកទាំងអស់គ្នាហ្នឹង ហើយសកម្មភាពរបស់យើងមិនមែនគ្រាន់តែធ្វើសកម្មភាពតាមទីសាធារណៈខាងក្រៅទេ នីតិវិធីតាមផ្លូវច្បាប់ក៏យើងធ្វើដែរ >> ។
លេខាធិការនៃសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក ហេង សំអ៊ន ឲ្យដឹងថា សហជីពទាំង៧ គ្រោងនឹងរៀបចំបណ្តឹងទៅកាន់អង្គការពលកម្មអន្តរជាតិ ILO តុលាការឧក្រិដ្ឋកម្មអន្តរជាតិ ICC និងអ្នកបញ្ជាទិញអន្តរជាតិ ដើម្បីថ្កោសទោស ចំពោះទង្វើសមត្ថកិច្ច ដែលបង្ក្រាបលើកម្មករដោយអាវុធកន្លងមកនោះ <<យើងកំពុងតែស្វែងរកអ្នកច្បាប់ដើម្បីស្វែងរកលទ្ធភាព ដាក់ពាក្យបណ្ដឹងទៅតុលាការព្រហ្មទណ្ឌអន្ដរជាតិផងដែរ តើករណីប៉ុណ្ណឹងតើតុលាការព្រហ្មទណ្ឌអន្ដរជាតិ គាត់ទទួលយក ឫគាត់ចាត់វិធានការយ៉ាងម៉េច កំពុងតែសិក្សានៅឡើយទេ>> ។
ទាក់ទងនឹងករណីនេះ លោក ខៀវ សុភ័គ អ្នកនាំពាក្យរបស់ក្រសួងមហាផ្ទៃ មានប្រសាសន៍ថា ការសម្រេចដោះលែង ឬមិនដោះលែងកម្មករទាំង២៣នាក់នោះ ឋិតនៅក្នុងដែនសមត្ថកិច្ចរបស់តុលាការ <<រឿងដោះលែង មិនដោះលែង មិនមែនអ្នកនាំពាក្យក្រសួងមហាផ្ទៃទេ រឿងតុលាការ ពូ[ខៀវ សុភ័គ]មិនហ៊ានComment ទេ ហើយសួរពូ ពូឆ្លើយម៉េចកើត មិនមែនសមត្ថកិច្ចរបស់ពូទេ >> ។
ទន្ទឹមនឹងការទាមទារឲ្យដោះលែងជនទាំង ២៣នាក់នោះ បណ្តាញសហជីពទាំង៧ ក៏នៅតែប្រកាន់ជំហរ ទាមទាររដ្ឋាភិបាល អន្តរាគមន៍ផ្តល់ប្រាក់ឈ្នួលគោល ១៦០ដុល្លារ សម្រាប់កម្មករគ្រប់វិស័យផងដែរ។
កាលពីសប្តាហ៍មុន សមត្ថកិច្ចបានចាប់ខ្លួនមនុស្សចំនួន ២៣នាក់ ក្នុងហេតុការណ៍ប៉ះទង្គិចគ្នាជាមួយកម្លាំងទ័ពឆ័ត្រយោង៩១១ នៅមុខរោងចក្រយ៉ាកជីន ក្នុងខណ្ឌពោធិសែនជ័យ និងនៅខាងមុខសួនឧស្សាហកម្មកាណាឌីយ៉ា ផ្លូវវ៉េងស្រេង រាជធានីភ្នំពេញ ខណៈកម្មករទាមទារដំឡើងប្រាក់ឈ្នួល១៦០ដុល្លារ ក្នុងនោះមាន លោក វន់ ពៅ ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក ថេង សាវឿន សកម្មជនសហជីព លោក ចាន់ ពុទ្ធិស័ក្កិ ជាសកម្មជនដីធ្លី រួមនឹងកម្មករ២០នាក់ផ្សេងទៀត៕
No comments:
Post a Comment