មន្ត្រីពាក់ព័ន្ធ ផ្នែកវិស័យការងារ និងអាជ្ញាធរ ប្រជុំបន្ទាន់ នៅថ្ងៃត្រង់នេះ ខណៈកើតមាន ហិង្សា នៅផ្លូវវ៉េងស្រេង
ដោយ៖ ញឹម សុខន / វិទ្យុវីអូឌី | ថ្ងៃសុក្រ ទី3 ខែមករា ឆ្នាំ2014
មន្ត្រីធ្វើការពាក់ព័ន្ធផ្នែកវិស័យការងារ និងអាជ្ញាធរ នៅម៉ោង ១២ថ្ងៃត្រង់នេះ បានជួបប្រជុំបន្ទាន់នៅសាលារាជធានីភ្នំពេញ ដើម្បីស្វែងរកដំណោះស្រាយ ជុំវិញការផ្ទុះបាតុកម្មដោយហិង្សានៅផ្លូវវ៉េងស្រេង ទាមទារដំឡើងប្រាក់ឈ្នួលគោល ១៦០ដុល្លារក្នុងមួយខែ។
លោក អាត់ ធន់ ប្រធានសហជីពសហភាពការងារ បានឲ្យដឹងថា នៅម៉ោង ១២ថ្ងៃត្រង់នេះ តំណាងអង្គការសហប្រជាជាតិប្រចាំនៅកម្ពុជា មន្ត្រីសហជីព តំណាងរោងចក្រកាត់ដេរ និងអាជ្ញាធរក្រុង បានបើកកិច្ចប្រជុំបន្ទាន់មួយ ដើម្បីរកដំណោះស្រាយ ខណៈដែលកម្មកររាប់ម៉ឺននាក់ធ្វើការនៅរោងចក្ររាប់រយ ផ្ទុះការតវ៉ាស្ទើទូទាំងប្រទេស និងកន្លែងខ្លះ ឈានទៅដល់ការប្រើហិង្សា។
កិច្ចប្រជុំបន្ទាន់នេះ បានធ្វើឡើងបន្ទាប់ពីមានការប៉ះទង្គិចគ្នាដោយហិង្សារវាងកម្លាំងសមត្ថកិច្ចរាប់រយនាក់ និងកម្មកររាប់ពាន់នាក់នៅផ្លូវវ៉េងស្រេង ខណ្ឌដង្កោ រាជធានីភ្នំពេញ នៅព្រឹកថ្ងៃសុក្រនេះ បណ្តាលឲ្យមានកម្មករស្លាប់ និងរងបួសធ្ងន់ស្រាលជាច្រើននាក់៕
No comments:
Post a Comment