អ្នកវិភាគ៖ ព្រះមហាក្សត្រី មិនអាចធ្វើជា នាយករដ្ឋមន្ត្រីឯករាជ្យបានទេ
ដោយ៖ អ៊ឹង ប៊ុនថន | ថ្ងៃអង្គារ ទី14 ខែមករា ឆ្នាំ2014 | 2 ម៉ោង មុន
ព្រះមហាក្សត្រីនរោត្តម មុនីនាថ សីហនុ
អ្នកវិភាគ បានលើកឡើងថា ព្រះមហាក្សត្រីប្រទេសកម្ពុជា មិនអាចយាងធ្វើជា នាយករដ្ឋមន្ត្រីឯករាជ្យបានទេ ដោយសារខុសនឹងច្បាប់រដ្ឋធម្មនុញ្ញ។
ការលើកឡើងនេះ គឺបន្ទាប់ពីអតីតឧបនាយករដ្ឋមន្ត្រីម្នាក់ មកពីគណបក្សហ្វ៊ុនស៊ិនប៉ិច ទួលព្រះមហាក្សត្រីនរោត្តម មុនីនាថ សីហនុ ទ្រង់ធ្វើជានាយករដ្ឋមន្ត្រីឯករាជ្យ ក្នុងរយៈពេលពីរឆ្នាំ ដើម្បីដោះស្រាយបញ្ហាជាប់គាំងនយោបាយនៅកម្ពុជា។
ប៉ុន្តែបណ្ឌិត វិទ្យាសាស្ត្រនយោបាយ លោក សុខ ទូច មានប្រសាសន៍ថា ការស្នើនេះមិនអាចទៅរួចទេ ដោយសារផ្ទុយនឹងរដ្ឋធម្មនុញ្ញ <<ព្រះសម្ដេចម៉ែលោក អត់មានធ្វើនយោបាយ ក៏អត់មានដែលធ្វើ យើងមានស្ដេច ចឹងបើប្រទេសជាតិស្ថិតនៅក្នុងភាពប្រកាសអាសន្នព្រះមហាក្សត្រលោកមានព្រះរាជតួនាទីធ្វើជាប្រមុខរដ្ឋរួចហើយ ចឹងគ្រាន់តែប្រមុខរាជរដ្ឋាភិបាលវាមិនសំខាន់ទេ កាលណាសម្ដេចម៉ែខុសនឹងរដ្ឋធម្មនុញ្ញ ឆ្ងាយណាស់ ឆ្ងាយមែនទែន ហ្នឹងមិននិយាយអំពីជីវប្រវត្ដិអីនាំតែទាក់ទិនទេ >> ។
ច្បាប់រដ្ឋធម្មនុញ្ញចែងថា ព្រះមហាក្សត្រទ្រង់គ្រងរាជតែមិនកាន់អំណាច។ ប៉ុន្តែច្បាប់កំពូលនេះ មិនមានចែងពីព្រះរាជតួនាទីរបស់ព្រះអគ្គមហេសីរបស់ព្រះមហាក្សត្រទេ។
នៅក្នុងលិខិតទូលថ្វាយព្រះមហាក្សត្រព្រះករុណា ព្រះបាទព្រះបរមនាថ នរោត្តម សីហមុនី ចុះថ្ងៃទី១២ ខែមករា ឆ្នាំ២០១៤ របស់លោក លឺ ឡាយស្រេង អតីតឧបនាយករដ្ឋមន្ត្រី មកពីគណបក្សហ្វ៊ុនស៊ិនប៉ិច បានសរសេរថា ក្រោយការបោះឆ្នោតថ្ងៃទី២៨ ខែកក្កដា ឆ្នាំ២០១៣ ភាពជាប់គាំងផ្នែកនយោបាយ បានធ្វើឲ្យប្រទេសកម្ពុជា ជួបនូវប្រទះនូវបញ្ហាដ៏ធ្ងន់ធ្ងរ។ លិខិតរបស់លោក លឺ ឡាយស្រេង បានផ្តល់នូវអនុសាសន៍ចំនួន ៤ចំណុច ក្នុងនោះ ស្នើឲ្យព្រះអង្គកោះអញ្ជើញគណបក្សជាប់ឆ្នោតទាំងពីរ ដោយត្រាស់បង្គាប់ឲ្យគណបក្សទាំងពីរនេះ ថាឈ្នះឆ្នោតទាំងអស់គ្នា ដឹកនាំរាជរដ្ឋាភិបាលពាក់កណ្តាលម្នាក់ ដែលឯករាជ្យពីគ្នា ហើយគណបក្សទាំងពីរត្រូវមានឧបនាយករដ្ឋមន្ត្រីស្មើៗគ្នា ក្រោមការដឹកនាំរបស់នាយករដ្ឋមន្ត្រីឯករាជ្យម្នាក់។
លិខិតដដែលបន្តថា ចំពោះនាយករដ្ឋមន្ត្រីឯករាជ្យ គួរជ្រើសរើសព្រះមហាក្សត្រី នរោត្តម មុនីនាថ សីហនុ ជាអ្នកទទួលភារកិច្ចបណ្តោះអាសន្នក្នុងរយៈពេលពីរឆ្នាំ សម្រាប់ទទួលសំណើរពីរដ្ឋមន្ត្រីនីមួយៗ ហើយកងកម្លាំងប្រដាប់អាវុធទាំងអស់ ត្រូវស្ថិតនៅក្រោមការគ្រប់គ្រងរបស់ព្រះមហាក្សត្រ និងជ្រើសរើសសមាជិក គជប ឯករាជ្យថ្មីមួយ ដែលមានភាពយុត្តិធម៌។
អតីតព្រះរាជលេខាផ្ទាល់សម្តេចឪ នរោត្តម សីហនុ ព្រះអង្គម្ចាស់ស៊ីសុវត្ថិ ធម្មិកោ បានគាំទ្រគំនិតរបស់លោក លឺ ឡាយស្រេង ប៉ុន្តែបញ្ហាត្រង់ថា សំណើរនោះផ្ទុយនឹងរដ្ឋធម្មនុញ្ញ<<ខ្ញុំសូមសរសើរឯកឧត្ដម លឺ ឡាយស្រេង គំនិតគាត់ល្អណាស់ ប៉ុន្ដែបញ្ហាត្រង់យើងមានរដ្ឋធម្មនុញ្ញ ហើយរដ្ឋធម្មនុញ្ញបានចែងច្បាស់ថា នាយករដ្ឋមន្ដ្រីត្រូវតែជាតំណាងរាស្ដ្រជាប់ឆ្នោត ហើយនឹងចេញពីគណបក្សដែលឈ្នះឆ្នោតដូច្នេះការស្នើរបស់ឯកឧត្ដម លឺ ឡាយស្រេង ហ្នឹងវាមានឧបសគ្គជាមួយរដ្ឋធម្មនុញ្ញ>> ។
ទោះជាយ៉ាងណា ព្រះអង្គម្ចាស់ស៊ីសុវត្ថិ ធម្មិកោ បានលើកអនុសាសន៍មួយទៀត គឺធ្វើវិសោធនកម្មច្បាប់រដ្ឋធម្មនុញ្ញ <<ហើយនឹងចេញរួចពេលណាដែលគណបក្សទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិបានជួបគ្នា ឯកភាពគ្នា ឧទាហរណ៍ថា ព្រះមហាក្សត្រជាសាក្សី ហើយជាអ្នកណែនាំមូលមាត់គ្នាថា ឥឡូវយើងប្រជុំសភា ជាផ្លូវការដើម្បីធ្វើវិសោធនកម្មរដ្ឋធម្មនុញ្ញ ដើម្បីអនុម័តការស្នើរបស់ឯកឧត្ដម លឺ ឡាយស្រេង អាហ្នឹងអាចហ្នឹងចេញរួច>> ។
ក្រុមមន្ត្រីគណបក្សប្រជាជនកម្ពុជា និងសង្គ្រោះជាតិ មិនអាចទាក់ទងបានទេនៅព្រឹកថ្ងៃអង្គារនេះ។
សម្រាប់លោក គល់ បញ្ញា នាយកអង្គការឃ្លាំមើលការបោះឆ្នោតមួយ ហៅកាត់ថាខុមហ្រ្វែល មានប្រសាសន៍ថា អ្វីៗអាចធ្វើទៅបាន អាស្រ័យលើ ឆន្ទៈរបស់មេដឹកនាំគណបក្សជាប់ឆ្នោតទាំងពីរ៕
No comments:
Post a Comment