ថ្ងៃទី 23 មករា 2014, ម៉ោង 09:43:AM) | ដោយ: លី សិលា
ក្រុមសមាគម និងអង្គការជាតិ-អន្តរជាតិ សរុបចំនួន ១៨១ ស្ថាប័ន បានរួមគ្នា ដាក់ញត្តិតាមស្ថានទូតបរទេសនានា ដើម្បីស្នើសុំឲ្យមានការដោះលែងបាតុករ ២៣ នាក់ ដែលរួមមានទាំងលោក វនពៅ
ក្រុមសមាគម និងអង្គការ សង្គមស៊ីវិលជាតិ-អន្តរជាតិ ដាក់ញត្តិ ស្នើសុំអន្តរាគមន៍ ឲ្យដោះលែង បាតុករ ២៣ នាក់
ភ្នំពេញ: ក្រុមសមាគម និងអង្គការជាតិ-អន្តរជាតិ សរុបចំនួន ១៨១ ស្ថាប័ន បានរួមគ្នា ដាក់ញត្តិតាមស្ថានទូតបរទេសនានា ដើម្បីស្នើសុំឲ្យមានការដោះលែងបាតុករ ២៣ នាក់ ដែលរួមមានទាំងលោក វនពៅផង នាព្រឹកថ្ងៃទី២៣មករា។ មកដល់ម៉ោង ៩ និង ៣០ នាទី ព្រឹកនេះ ក្រុមអង្គការសង្គមស៊ីវិល បានដាក់ញត្តិរួចរាល់ហើយ នៅស្ថានទូតអាល្លឺម៉ង់ ស៊ុយអ៊ែត និងកូរ៉េខាងត្បូង។
ក្រុមអង្គការសមាគមក្រៅរដ្ឋាភិបាល ប្រមាណ ៥០ រូប ដែលដឹកនាំដោយលោកស្រី ធីតា ឃឹះ បានដើរថ្មើជើង ដាក់ញត្តិតាមបណ្តាស្ថានទូត ដោយគ្មានការរារាំងអ្វីទេ។
បន្ទាប់ពីស្ថានទូតកូរ៉េខាងត្បូង ក្រុមអង្គការសង្គមស៊ីវិល ធ្វើដំណើរឆ្ពោះទៅកាន់ស្ថានទូតអូស្ត្រាលី ដែលស្ថិតនៅខាងត្បូងជាប់រដ្ឋសភា។ ប៉ុន្តែអាជ្ញាធរ មិនអនុញ្ញាតឲ្យពួកគេ ធ្វើដំណើរឆ្លងកាត់ផ្ទះរបស់សម្តេចហ៊ុនសែន នៅជិតវិមានឯករាជ្យឡើយ។
សូមរម្លឹកថា អង្គការសង្គមស៊ីវិល បានប្រកាសបើកយុទ្ធនាការដាក់ញត្តិ តាមស្ថានទូតបរទេស ចាប់ពីថ្ងៃទី២៣ ដល់ថ្ងៃទី២៤ ខែមករា ឆ្នាំ២០១៤។ ញត្តិទៅកាន់ស្ថានទូតបរទេសនោះ ដើម្បីសុំអន្តរាគមន៍ ឲ្យរដ្ឋាភិបាលកម្ពុជា បញ្ឈប់អំពើហិង្សា អំពាវនាវឲ្យមានការដោះលែង ការស៊ើបអង្កេត និងផ្តល់សំណង ដល់ជនរងគ្រោះ ក្នុងអំពើបង្ក្រាបបាតុកម្ម កម្មករកាត់ដេរ កាលពីថ្ងៃទី២ និងថ្ងៃទី៣ មករា។
សេចក្តីប្រកាសព័ត៌មាន បានលើកឡើងថា ញត្តិដូចគ្នានេះ ត្រូវបានសហគមន៍ដីធ្លី និងសហគមន៍សិទ្ធិមនុស្ស នាំយកទៅដាក់ នៅស្ថានទូតអាមេរិក បារាំង ស្ថានទូតអង់គ្លេស អង្គការ យូនីសេហ្វ និងអង្គការលើកលែងទោសអន្តរជាតិ កាលពីព្រឹកថ្ងៃទី២១ មករា ហើយមានការឃាត់ខ្លួន មួយរយៈខ្លី នូវមនុស្សចំនួន ១១ នាក់។
ក្រុមសង្គមស៊ីវិល ក៏បានប្រកាសថា យុទ្ធនាការដាក់ញត្តិដដែលនេះ នឹងធ្វើឡើងម្តងទៀត ទៅកាន់ដៃគូអភិវឌ្ឍន៍ ឬម្ចាស់ជំនួយ នៅថ្ងៃទី២៣ មករា ថ្ងៃទី២៤ មករា និងថ្ងៃទី២៧ ព្រមទាំងថ្ងៃទី២៨ មករា។ ក្នុងនោះ នៅថ្ងៃទី២៣ មករា គឺចាប់ផ្តើមដាក់ញត្តិ នៅព្រឹកម៉ោង ៨ និង ៣០ នាទី នៅស្ថានទូតអាល្លឺម៉ង់ ស្ថានទូតស៊ុយអ៊ែត ទូតកូរ៉េខាងត្បូង និងស្ថានទូតអូស្ត្រាលី៕
No comments:
Post a Comment