ដោយ សូត សុខប្រាថ្នា / វិទ្យុអាស៊ីសេរី | ២២ មករា ២០១៤
កម្មកររោងចក្រ មេតថេក ខេមបូឌា (Medtecs Cambodia Co Ltd) នាំគ្នាធ្វើកូដកម្មមិនចូលធ្វើការ ទាមទារឲ្យតំណាងសហជីពចូលធ្វើការវិញ នាខេត្តកំពង់ចាម នៅថ្ងៃទី១៤ ខែមករា ឆ្នាំ២០១៤។
RFA/Saut Sokprathna
សហជីពនិងកម្មករ នៅកំពង់ចាម ត្រូវបាន បណ្ដេញចេញ ពីការងារ ជាបន្តបន្ទាប់
តំណាងកម្មករនៅរោងចក្រ មេតថេក ខេមបូឌា ឬ មេតហាតធេន (Medtecs Cambodia Co Ltd) នៅខេត្តកំពង់ចាម ជាច្រើននាក់ នៅតែមិនទាន់អនុញ្ញាតឱ្យចូលធ្វើការដូចដើមវិញឡើយ។ មិនតែប៉ុណ្ណោះ តំណាងសហជីព និងកម្មករជាច្រើននាក់នៅថ្ងៃទី២២ មករា ក៏ត្រូវបានភាគីរោងចក្របណ្ដេញចេញជាបន្តបន្ទាប់ថែមទៀត។
ស្ថានភាពបែបនេះកើតមានបន្ទាប់ពីមានការចរចារវាងភាគីតំណាងកម្មករ និងភាគីរោងចក្រ មេតថេក ខេមបូឌា ឬ មេតហាតធេន នៅមន្ទីរការងារខេត្តកំពង់ចាម កាលពីពេលកន្លងទៅ ត្រូវបរាជ័យ។
លោក ចន ធាង៖ «តាមអ្វីដែលពួកខ្ញុំធ្វើកូដកម្មហ្នឹង គឺជាសិទ្ធិសេរីភាពការងារមួយរបស់កម្មករកម្មការិនីយើងទាំងអស់ដែរ។ នៅក្នុងច្បាប់ គេបានចែងច្បាស់ដែរថា យើងមានសិទ្ធិគ្រប់គ្រាន់ក្នុងការធ្វើកូដកម្មធ្វើអ៊ីចឹង! ដោយសារបញ្ហាហ្នឹងហើយដែលថាការក្រុមហ៊ុនធ្វើហ្នឹងជាការរំលោភសិទ្ធិមួយដល់កម្មករយើងទាំងអស់»។
លោកបន្តថា នៅពេលដែលកម្មករធ្វើការដោយមិនមានសហជីពពួកលោកនោះ ភាគីរោងចក្របានធ្វើទុក្ខបុកម្នេញដល់កម្មករជាហូរហែ ហើយប្រសិនបើនរណាចេញមុខតវ៉ាត្រូវបណ្ដេញចេញ។ លោកបន្ថែមថា ក្រៅពីនេះ កម្មករដែលជាសមាជិកសហជីពសហព័ន្ធកម្ពុជា ត្រូវបានបង្ខំឱ្យចូលជាសមាជិកសហជីពផ្សេង ដែលមានទំនោរគាំទ្រភាគីរោងចក្រទៀតផង។
វិទ្យុអាស៊ីសេរី មិនទាន់អាចស្នើសុំការបកស្រាយពីភាគីរោងចក្រ គឺអ្នកបកប្រែភាសាចិន លោក សម សីហា បាននៅឡើយទេ នៅថ្ងៃទី២២ មករា។
ដោយឡែក អនុប្រធានមន្ទីរការងារខេត្តកំពង់ចាម លោក អ៊ុំ វេសនា បានមានប្រសាសន៍ថា បញ្ហាដែលកើតឡើងនៅរោងចក្រ មេតថេក ខេមបូឌា ជាបញ្ហាបច្ចេកទេស ហើយការចរចាកន្លងទៅ ត្រូវបរាជ័យនោះ ដោយសារតែភាគីទាំងសងខាងប្រកាន់គោលជំហររឹងរូសដូចគ្នា ហើយការចរចាមិនអាចចុះសម្រុងខាងមន្ទីរក៏បានបញ្ជូនករណីនេះទៅក្រុមប្រឹក្សាការងារអាជ្ញាកណ្ដាល ដើម្បីដោះស្រាយបន្តទៀត។
លោក អ៊ុំ វេសនា៖ «វាក៏ជាបច្ចេកទេសបន្តិចដែរ។ ហើយដោយសារមួយចំហៀងៗ គាត់ប្រកាន់ជំហរទាមទារតឹងរ៉ឹងរៀងខ្លួន។ ខាងក្រុមហ៊ុន គាត់ថាចាំលទ្ធផលពីខាងតុលាការ គេថាយ៉ាងម៉េចៗ គាត់នឹងពិចារណាឡើងវិញទាក់ទងទទួលយកមិនទទួលយកណា។ ខាងសហជីព ខាងកម្មករសហជីព គាត់ថាឱ្យចូលធ្វើការសិនទៅ ចាំតុលាការគេសម្រេចម៉េច ចាំគិតតាមហ្នឹងដែរ។ អ៊ីចឹង វាពិបាកដែរ វាពិបាកដោយសារម៉ាចំហៀងៗប្រកាន់គោលជំហរតឹងរ៉ឹងរៀងខ្លួន។ ខ្ញុំគិតថា ប្រសិនបើគាត់នៅតែមិនព្រមអ៊ីចឹងទេ យើងមានតែបញ្ជូនទៅក្រុមប្រឹក្សាអាជ្ញាកណ្ដាលហើយៗប្រសិនបើក្រុមប្រឹក្សាគេកាត់សេចក្តីថាយ៉ាងម៉េចយ៉ាងម៉ា ចាំគេតាមលទ្ធផលហ្នឹងទៅ»។
លោកបន្តថា ចំពោះការបណ្ដេញចេញសហជីព រួមនឹងកម្មករជាច្រើននាក់ និងការគាបសង្កត់ផ្សេងៗពីសំណាក់ថៅកែរោងចក្រនោះ ខាងមន្ទីរមិនទាន់ទទួលបានព័ត៌មាននោះនៅឡើយទេ ប៉ុន្តែប្រសិនបើជាមានករណីបែបនេះមែន គប្បីសហជីព ឬកម្មករដែលមានបញ្ហាទាំងនោះដាក់ពាក្យស្នើសុំមកខាងមន្ទីរការងារ ដើម្បីធ្វើការផ្សះផ្សា និងត្រួតពិនិត្យពីមូលហេតុឱ្យបានច្បាស់លាស់។
យ៉ាងណាក៏ដោយ ប្រធានសហជីព លោក ចន ធាង បានបញ្ជាក់ថា ទាំងសហជីព និងកម្មករ ដែលត្រូវបណ្ដេញចេញពីការងារគិតមកដល់ពេលនេះ គឺមានចំនួនប្រមាណជា ៥០នាក់ហើយ។ ដោយឡែក ខាងសហជីពលោកក៏បានត្រៀមខ្លួនក្នុងការជួបចរចាជាមួយភាគីរោងចក្រនៅឯក្រុមប្រឹក្សាអាជ្ញាកណ្ដាលរួចហើយដែរ ហើយប្រសិនបើជានៅតែមិនអាចដោះស្រាយសមស្របសម្រាប់ពួកលោកទេ នោះអាចនឹងមានការធ្វើបាតុកម្មដោយសន្តិវិធីបន្តទៀត៕
No comments:
Post a Comment