គណបក្ស សង្គ្រោះជាតិ នឹងធ្វើបាតុកម្ម ទ្រង់ទ្រាយធំ រយៈពេល បីថ្ងៃ ជាប់គ្នានៅចុងសប្តាហ៍នេះ
ដោយ៖ ពេជ្រ សុធារី / វិទ្យុ វីអូឌី | ថ្ងៃព្រហស្បតិ៍ ទី2 ខែមករា ឆ្នាំ2014
បាតុករគណបក្សសង្គ្រោះជាតិនៅទីលានប្រជាធិបតេយ្យ កាលពីថ្ងៃទី២៩ធ្នូ (រូបថត ពេជ្រ សុធារី)
គណបក្សសង្គ្រោះជាតិ គ្រោងធ្វើបាតុកម្មទ្រង់ទ្រាយធំរយៈពេលបីថ្ងៃជាប់គ្នា ដើម្បីទាមទារឲ្យសមត្ថកិច្ចដោះលែងព្រះសង្ឃ និងសកម្មជនសហជីពទាំង ១៥អង្គ/នាក់ និងទាមទារឲ្យរដ្ឋាភិបាលដំឡើងប្រាក់ឈ្នួលដល់កម្មករចំនួន ១៦០ដុល្លារក្នុងមួយខែ។
លោក កឹម សុខា អនុប្រធានគណបក្សសង្គ្រោះជាតិ មានប្រសាសន៍ថា ការប្រើប្រាស់អំពើហិង្សាពីសំណាក់អាជ្ញាធរទៅលើបាតុករ និងព្រះសង្ឃនៅមុខរោងចក្រយ៉ាកជីន បណ្តាលឲ្យរងបួសជាច្រើននាក់នោះ និងការចាប់ខ្លួនសកម្មជនសហជីព បាតុករ និងព្រះសង្ឃ ចំនួន១៥អង្គ/នាក់ នៅថ្ងៃនេះ គឺជាការរំលោភសិទ្ធិមនុស្សយ៉ាងធ្ងន់ធ្ងរ។ លោកទាមទារឲ្យសមត្ថកិច្ចដោះលែងសកម្មជនសហជីព បាតុករ និងព្រះសង្ឃជាបន្ទាន់ ហើយបានព្រមានធ្វើហែក្បួនបាតុកម្មទ្រង់ទ្រាយធំរយៈពេលបីថ្ងៃជាប់គ្នា គឺនៅថ្ងៃទី០៥ ទី០៦ និងទី០៧ ខែមករា ខាងមុខនេះ។
គណបក្សសង្គ្រោះជាតិ នៅថ្ងៃព្រហស្បតិ៍នេះ ក៏បានប្រកាសផ្អាកភ្លាមៗនូវគម្រោងចរចាជាមួយក្រុមការងារតំណាងគណបក្សប្រជាជនកម្ពុជាផងដែរ ដោយសារតែសមត្ថកិច្ចប្រើហិង្សាទៅលើកម្មករ និងចាប់ព្រះកាយព្រះសង្ឃ តំណាងសហជីពកម្មករ មួយចំនួនទៀត ដែលទាមទារដំទ្បើងប្រាក់ឈ្នួលនៅមុខរោងចក្រយ៉ាកជីននេះ។
កាលពីយប់ថ្ងៃទី០១ខែមករា លោកសម រង្ស៊ី បានគំរាមថា នឹងមានការផ្ទុះការតវ៉ាទូទាំងប្រទេស ប្រសិនបើមេដឹកនាំសហជីពណាមួយ ត្រូវបានចាប់ខ្លួន ក្នុងករណីជួយការពារផលប្រយោជន៍កម្មករក្នុងតវ៉ាឲ្យមានការដំឡើងប្រាក់ឈ្នួលការងារ ១៦០ដុល្លារអាមេរិក៕
No comments:
Post a Comment