សាលាដំបូង រាជធានី ភ្នំពេញ មិនអនុញ្ញាត ឲ្យថ្នាក់ដឹកនាំ គណបក្សសង្គ្រោះជាតិ ជួប អ្នកជាប់ឃុំ ២៣នាក់
ដោយ៖ ពេជ្រ សុធារី / វិទ្យុ វីអូឌី | ថ្ងៃអង្គារ ទី21 ខែមករា ឆ្នាំ2014
ចៅក្រមស៊ើបសួរនៃសាលាដំបូងរាជធានីភ្នំពេញ មិនអនុញ្ញាតឲ្យថ្នាក់ដឹកនាំគណបក្សសង្គ្រោះជាតិ ចូលសួរសុខទុក្ខជនត្រូវចោទទាំង ២៣រួប ដែលកំពុងជាប់ឃុំនៅពន្ធនាគារត្រពាំងផ្លុង ខេត្តកំពង់ចាមនោះទេ។
នៅក្នុងលិខិតរបស់ចៅក្រមស៊ើបសួរ ជា សុខហៀង ផ្ញើជូនប្រធានគណៈកម្មាធិការប្រតិបត្តិគណបក្សសង្គ្រោះជាតិ នៅថ្ងៃទី២១ ខែមករានេះ ឲ្យដឹងថា ជនត្រូវចោទឈ្មោះជា សារ៉ាត់ ប៊ូ សារិទ្ធ យោន ជា និងកូកនមួយចំនួនទៀត ជាប់ចោទពីបទ ហិង្សាដោយចេតនាមានស្ថានទម្ងន់ទោស ធ្វើឲ្យខូចខាតដោយចេទនាមានស្ថានទម្ងន់ទោស ប្រើមធ្យោបាយបង្កឧបសគ្គដល់ចរាចរណ៍សាធារណៈ និងការប្រមាថ ដែលប្រព្រឹត្តនៅមុខសួនឧស្សាហកម្មកាណាឌីយ៉ា រាជធានីភ្នំពេញ តាមមាត្រា ២១៥, មាត្រា ៤១១, មាត្រា ៥០២នៃក្រមព្រហ្មទណ្ឌ និងមាត្រា ៧៨ នៃច្បាប់ស្តីពីចរាចរណ៍ផ្លូវគោក។
កាលពីថ្ងៃទី១៥ខែមករា គណបក្សសង្គ្រោះជាតិ បានដាក់លិខិតមួយច្បាប់ទៅតុលាការសាលាដំបូងរាជធានីភ្នំពេញ ស្នើសុំឲ្យគណៈប្រតិភូគណបក្សចំនួន២០រូប ទៅសួរសុខទុក្ខជនដែលត្រូវបានឃុំខ្លួនទាំង ២៣រូប នៅពន្ធនាគារត្រពាំងផ្លុង ខេត្តកំពង់ចាម ក្នុងគោលបំណងលើកទឹកចិត្ត និងជំរុញឲ្យមានការដោះលែងពួកគេទាំងនោះ។
អ្នកទាំង២៣នាក់ ដែលកំពុងឃុំខ្លួននៅពន្ធនាគារត្រពាំងផ្លុងនោះ មានលោកវន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក ចាន់ ពុទ្ធិស័ក្ត ជាតំណាងសហគមន៍បឹងកក់ លោក ថេង សាវឿន ប្រធានបណ្តាញកសិករ និងកម្មករចំនួន ២០នាក់ទៀត ត្រូវបានចាប់ខ្លួនកាលពីថ្ងៃទី២និងទី៣ ខែមករា នៅពេលដែលពួកគេចូលរួមតវ៉ាជាមួយកម្មករ ដែលទាមទារប្រាក់ខែអប្បបរមា ១៦០ដុល្លារក្នុងមួយខែ នៅតំបន់សេដ្ឋកិច្ចពិសេសភ្នំពេញ ខាងមុខរោងចក្រយ៉ាកជីង និងនៅមុខសួនឧស្សាហកម្មកាណាឌីយ៉ា ផ្លូវវ៉េងស្រេង រាជធានីភ្នំពេញ៕
No comments:
Post a Comment