កម្មកររងគ្រោះពេលសមត្ថកិច្ចបង្រ្កាបនៅផ្លូវវ៉េងស្រេង ថ្ងៃទី០៣ ខែមករា ឆ្នាំ២០១៤(រូបភាពដោយ តាត ឧត្ដម)
ក្រុមសហជីព ដែល ទាមទារប្រាក់ឈ្នួល ១៦០ដុល្លារ បង្កើត មូលនិធិ ជួយជនរងគ្រោះ ក្នុងព្រឹត្តិការណ៍ បាញ់ប្រហារ
ដោយ៖ ឡាយ សាមាន / វីអូឌី | ថ្ងៃសៅរ៍ ទី25 ខែមករា ឆ្នាំ2014
សហភាពការងារកម្ពុជាដែលជាបណ្តុំសហជីពជាច្រើន និងសហជីពធំៗ៨ទៀត បានសហការណ៍បង្កើតមូលនិធិស្វែងរកថវិកាជួយជនរងគ្រោះ ដែលបានស្លាប់ និងរបួសក្នុងព្រឹត្តិការណ៍បាញ់ប្រហារមួយ កាលពីថ្ងៃទី៣ ខែមករា ឆ្នាំ២០១៤។
ព្រឹត្តិការណ៍ប៉ះទង្គិចនៅពេលនោះ កម្មករយ៉ាងតិច៥នាក់ ត្រូវសមត្ថកិច្ចបាញ់សម្លាប់ ប្រមាណជា៤០នាក់រងរបួស និង២៣នាក់ត្រូវចាប់ខ្លួន។
ប្រធានសហភាពការងារកម្ពុជា លោក អាត់ ធន់ ឲ្យVODដឹងនៅថ្ងៃសៅរ៍ ទី២៥ ខែមករា ឆ្នាំ២០១៤នេះថា ការសហការណ៍គ្នាបង្កើតឲ្យមានមូលនិធិនេះ ដើម្បីចែករំលែកទុក្ខលំបាកដល់គ្រួសារសព និងជនរងគ្រោះ ក្នុងព្រឹត្តិការណ៍បាញ់ប្រហារកន្លងទៅ ដែលពេលនេះ ពួកគាត់កំពុងជួបការលំបាកផ្នែក ថវិកាសម្រាប់មើលថែអ្នកដែលកំពុងសម្រាប់ព្យាបាល។
លោក អាត់ ធន់ ឲ្យដឹងទៀតថា មូលនិធិនោះឈ្មោះសង្គ្រោះ និងការពារជួយកម្មកររងគ្រោះ ពីការបង្ក្រាបកាលពីថ្ងៃទី២ និងទី៣។ លោកថា មូលនិធិពេលនេះ ទទួលបានថវិកាពីសប្បុរសជនបានជាង២០លានរៀលហើយ ហើយក្រុមការងារនឹងយកទៅឧបត្ថម្ភដល់អ្នករងគ្រោះកំពុងសម្រាកនៅមន្ទីរពេទ្យ នៅរសៀលថ្ងៃសៅរ៍នេះ។
លោក អាត់ ធន់ អំពាវនាវឲ្យជនរួមជាតិ ដែលមានបំណងចង់ចូលរួមរំលែកទុក្ខដល់ជនរងគ្រោះ ក្នុងព្រឹត្តិការណ៍បាញ់ប្រហារនោះ អាចទាក់ទងទៅកាន់មូលនិធិតាមរយៈ ទូរស័ព្ទលេខ ០១២ ៩៩ ៨៩ ០៦ និង ០៦៦ ៣៣៣ ០៨១ ឬតាមរយៈ Email: clc.cambodia@online.com.kh ឬ thorn.clc@gmail.com។
ក្រៅពីការអំពាវនាវរកមូលនិធិ ក្រុមការងាររបស់សហជីព ក៏បានជំរុញឲ្យរដ្ឋាភិបាល និងក្រុមហ៊ុនដោះស្រាយបញ្ហានេះ ដោយសងជំងឺចិត្តអ្នករងគ្រោះ និងសងសំណងចំពោះអ្នកស្លាប់៕
No comments:
Post a Comment