យុវជន ធ្វើសកម្មភាព ការពារព្រៃ នៅតំបន់ ទេសចរណ៍ ក្នុងខេត្ត សៀមរាប
ដោយ៖ ពៅ មេត្តា | ថ្ងៃសៅរ៍ ទី11 ខែមករា ឆ្នាំ2014, ម៉ោង 01:36 PM
យុវជន ប្រមាណ ជាង៣០នាក់ រៀបចំកម្មវិធីសប្បុរសធម៌ និងសិក្សា ស្វែងយល់ ពីព្រៃឈើ នៅក្នុងតំបន់ទេសចរណ៍នៅក្នុងស្រុកសូទ្រនិគម ខេត្តសៀមរាប ក្នុងគោលបំណង ឲ្យសាធារណជនចេះស្រលាញ់ និងថែរក្សាធនធានធម្មជាតិ។តាមសេចក្តីជូនដំណឹង របស់ ក្រុមយុវជន ឥន្ធនូ បានឲ្យដឹងថា យុវជនជាង៣០នាក់ នឹងធ្វើដំណើរកំសាន្តដើម្បី សកម្មភាព មនុស្សធម៌ នៅថ្ងៃទី១២ ខែមករា ឆ្នាំ២០១៤ ទៅភូមិគោល ឃុំពពេលស្រុក សូទ្រនិគម ខេត្តសៀមរាប។ ក្នុងដំណើរកំសាន្តនោះ យុវជន នឹងសិក្សា ពីអត្ថប្រយោជន៍ និងបញ្ហាប្រឈម របស់ព្រៃ សហគមន៍ រួចពួកគេនឹងដាំដើមឈើរួមគ្នា។
គោលបំណងនៃការធ្វើដំណើរកំសាន្តនេះ យុវជនឥន្ធនូ ចង់ឲ្យប្រជាជន ពិសេសយុវជនចូលរួមក្នុងកិច្ចការមនុស្សធម៌ឲ្យបានច្រើន និងបង្កើនការយកចិត្តទុកថែរក្សាព្រៃឈើ ជាសម្បត្តិរបស់ជាតិដែលកំពុងប្រឈមការបាត់បង់។
ផែនទីមានលក្ខណៈចលនា ដែលចេញមកពីរូបភាពផ្កាយរណបណាសា(NASA) និងត្រូវបានផ្សព្វផ្សាយលើគេហទំព័រ Open Development Cambodia បង្ហាញថា ចំនួនភាគរយព្រៃឈើនៅកម្ពុជា បានធ្លាក់ចុះពី៧២ភាគរយនៃផ្ទៃដីក្នុងឆ្នាំ១៩៧៣ មកនៅត្រឹម៤៦ភាគរយប៉ុណ្ណោះ ក្នុងឆ្នាំ២០១៣នេះ។ ផែនទីនេះ ក៏បានបង្ហាញ ការបំផ្លិចបំផ្លាញព្រៃឈើទូទាំងប្រទេស ភាគច្រើនកើតឡើងនៅភាគខាងជើង ភាគឥសាន ភាគខាងលិច និងភាគនិរតី។
មន្ត្រីស្រាវជ្រាវជាន់ខ្ពស់របស់មជ្ឈមណ្ឌលសិទ្ធិមនុស្សកម្ពុជា ដែលធ្វើការផ្តោតលើធនធានធម្មជាតិ លោក ឈឹម សាវុធ មានប្រសាសន៍ថា របាយការណ៍របស់អង្គការដែលបង្ហាញថាព្រៃឈើនៅកម្ពុជានៅសល់៤៦ភាគរយ មិនមែនជាតួលេខពិតប្រាកដទេ។ លោកបន្តថា ទំហំព្រៃឈើ នៅមានតិចជាងនេះ ដោយសារការផ្តល់ដីសម្បទានសេដ្ឋកិច្ច និងការកាប់ឈើអនាធិបេតយ្យ៕
No comments:
Post a Comment