គណៈប្រតិភូ សហភាព សហជីព អន្តរជាតិ ជំរុញ ឲ្យរដ្ឋាភិបាល បើកកិច្ចពិភាក្សា ឡើងវិញ លើប្រាក់ឈ្នួល អប្បបរមា
VOD | ១៣ មករា ២០១៤
គណៈប្រតិភូ សហភាព សហជីព អន្តរជាតិ
ប្រចាំកម្ពុជា (ITUC-CC) នៅថ្ងៃចន្ទនេះ ជំរុញ ឲ្យរដ្ឋាភិបាល
និងក្រសួងការងារ
បើកកិច្ចចរចា លើការដំឡើង ប្រាក់ឈ្នួលគោល ដល់កម្មករ បន្ថែម,
ដោះលែង ជនជាប់ចោទ ទាំងទាំង ២៣នាក់, និងបញ្ឈប់ ការគំរាមកំហែង លើសហជីព។
តំណាងគណៈប្រតិភូសហភាពសហជីពអន្តរជាតិប្រចាំកម្ពុជា លោក JAAP WIENEN
មានប្រសាសន៍ក្នុងសន្និសីទសារព័ត៌មានថា សហជីព
មានការព្រួយបារម្ភយ៉ាងខ្លាំងចំពោះស្ថានភាពនៅកម្ពុជាពីការសម្លាប់
និងការចាប់ខ្លួនមនុស្ស
និងការបិទការពិភាក្សាដំឡើងប្រាក់ឈ្នួល។លោកបន្តថា
ប្រាក់ឈ្នួល១០០ដុល្លារសម្រាប់កម្មករ គឺមិនទាន់គ្រប់គ្រាន់ទេ
សម្រាប់ការរស់នៅដ៏សមរម្យសម្រាប់កម្មករទេ។
លោក JAAP WIENEN
ឲ្យដឹងទៀតថា«លោកនាយករដ្ឋមន្ត្រី
បានរៀបចំការឲ្យមានគណៈកម្មការក្នុងការសិក្សាប្រាក់ឈ្នួលអប្បបរមា
ដែលវាជារឿងល្អមួយ តែមិនមានតម្លៃទេ ប្រសិនបើគណៈកម្មាធិការនេះ
ចំណាយពេលមួយខែហើយទៅមួយខែទៀតក្នុងការសិក្សា
ដោយសារសព្វថ្ងៃមនុស្សរំពឹងថានឹងទទួលបានប្រាក់ឈ្នួលបន្ថែម។
បើមិនមានការពិភាក្សាទេ ដូច្នេះមូលដ្ឋាននៃការប្រឈម និងហិង្សា
នឹងមិនចប់ទេ»។ លោក អំពាវនាវឲ្យដកការគម្រាមកំហែងដល់សហជីព
ដោះលែងមនុស្សទាំង២៣នាក់ តាមដែលអាចធ្វើទៅបាន
និងដកការចោទប្រកាន់ទៅលើលោក រ៉ុង ឈុន។
លិខិតចំហរួមគ្នារបស់សហជីពទាំង៨
ចុះថ្ងៃទី១២ ខែមករា បានឲ្យដឹងថា ក្រោយពីមានការបង្ក្រាប
ដោយហិង្សាយ៉ាងឃោរឃៅយង់ខ្នង និងហួសចិត្តមិនគួរឲ្យជឿ
ពីកម្លាំងរដ្ឋាភិបាល លើកម្មករទាមទារ ដំឡើងប្រាក់ឈ្នួល១៦០ដុល្លារ
បណ្តាលឲ្យមនុស្ស៤នាក់ស្លាប់ ៤០នាក់របួស
និង២៣នាក់ត្រូវបានឃុំខ្លួន។ សហជីពទាំងនេះអំពាវនាវ ឲ្យរដ្ឋាភិបាល
និងភាគីរោងចក្រ រៀបចំបើកការចរចាពីការដំឡើងប្រាក់ឈ្នួលបន្តទៀត
បង្កើតគណៈកម្មការឯករាជ្យស៊ើបអង្កេតដល់កងកម្លាំង
និងអ្នកបញ្ជាឲ្យបាញ់លើកម្មករនោះ មកផ្តន្ទាទោស
និងសងសំណងដល់ជនរងគ្រោះ រួមទាំងដោះលែងអ្នកចាប់ខ្លួនទាំង២៣នាក់
និងស្នើឲ្យភាគីតំណាងរោងចក្រ
ដកពាក្យបណ្តឹងដែលប្តឹងមន្ត្រីសហជីព។
(ក្រាហ្វិកប្រាក់ឈ្នួលកម្មកររោងចក្រ ដែលត្រូវបានដំឡើងចាប់ពីឆ្នាំ២០០០/ដោយ ស៊ុន ណារិន)
នៅក្នុងសេចក្តីថ្លែងការណ៍មួយចេញដោយ
អង្គភាពព័ត៌មាន
និងប្រតិកម្មរហ័សនៅទីស្តីការគណៈរដ្ឋមន្ត្រីចុះថ្ងៃទី១០ ខែមករា
ឲ្យដឹងថា លោកនាយករដ្ឋមន្ត្រី ហ៊ុន សែន
បានដាក់ឲ្យលោក គាត ឈន់ អតីតរដ្ឋមន្ត្រីក្រសួងហិរញ្ញវត្ថុ
ពិភាក្សាជាមួយស្ថាប័ន
និងភាគីពាក់ព័ន្ធអំពីលទ្ធភាពនៃការដំឡើងប្រាក់បៀរវត្សរ៍ដល់
មន្ត្រីរាជការ និងប្រាក់ឈ្នួលអប្បបរមាដល់កម្មករ។
ប្រធានសហភាពសហជីពកម្ពុជា លោក រ៉ុង
ឈុន មានប្រសាសន៍ថា សហភាពសហជីពអន្តរជាតិ
មានតួនាទីសំខាន់បំផុតសម្រាប់បេសកកម្មនៅកម្ពុជាក្នុងការទាមទារ
ប្រាក់ឈ្នួលគោល ១៦០ ដុល្លារ ដល់កម្មករកម្មការិនី ។ លោកសង្ឃឹមថា
សហភាពសហជីពអន្តរជាតិនឹងចូលរួមជួយជំរុញឲ្យស្ថានភាពកម្ពុជាផ្តល់
ដំណោះស្រាយជូនកម្មករកម្មការិនីឲ្យបានសមរម្យ។
សហភាពសហជីពអន្តរជាតិ តំណាងឲ្យកម្មករ១៧៥លាននាក់នៃ១៥០ប្រទេស នៅលើពិភពលោក៕
No comments:
Post a Comment