លោក កឹម សុខា (រូបថត តាំង វីដា)
លោក កឹម សុខា គ្រោងប្តឹង ករណីអាជ្ញាធរ ប៉ងសម្លាប់ លោក ទៅ ICC
ដោយ៖ ឡាយ សាមាន និងតាំង វីដា / វីអូឌី | ថ្ងៃអាទិត្យ ទី26 ខែមករា ឆ្នាំ2014
ប្រធានស្តីទីគណបក្សសង្គ្រោះជាតិ លោក កឹម សុខា ប្រកាសយកករណីកម្លាំងសមត្ថកិច្ច ប៉ុនប៉ងសម្លាប់រូបលោក ក្រោយរំសាយវេទិកាជួបអ្នកគាំទ្រនៅខេត្តកំពង់ចាម នៅព្រឹកថ្ងៃអាទិត្យ ដាក់ក្នុងឯកសាររួម ប្តឹងទៅកាន់តុលាការព្រហ្មទណ្ឌអន្តតិ (ICC)។
លោក កឹម សុខា អះអាងបែបនេះ ក្រោមមូលហេតុថា រថយន្តរបស់កងទ័ពនៅខេត្តកំពង់ចាម បានបរយ៉ាងលឿន ដេញពីក្រោយ និងមកពីខាងមុខ ប្រុងនឹងបុករថយន្តរបស់លោក ខណៈធ្វើដំណើរពីខេត្តកំពង់ចាម ត្រលប់មកកាន់រាជធានីភ្នំពេញវិញ ដែលករណីនេះ លោកសង្ស័យថា ជាការប៉ុនប៉ងគំរាមរូបលោកផ្ទាល់។
ប្រធានស្តីទីគណបក្សនេះ បន្តថា លោក នឹងចាត់មេធាវីរបស់ខ្លួនរៀបចំឯកសារ និងប្រមូលភ័ស្តុតាងករណីនេះ គួបផ្សំនឹងករណីហេតុការណ៍ប៉ះទង្គិចរវាងកម្មករ និងសមត្ថកិច្ច កាលពីថ្ងៃទី២ និងទី៣ ខែមករា បញ្ជូនទៅកាន់តុលាការព្រហ្មទណ្ឌអន្តរជាតិ ក្នុងពេលឆាប់ៗនេះ ដើម្បីផ្តន្ទាទោសជនល្មើស និងបញ្ចប់និទណ្ឌភាពនៅកម្ពុជា។
លោក កឹម សុខា ក៏ប្រកាសថ្កោលទោស ទង្វើនៃការដាក់ពង្រាយកម្លាំងសមត្ថកិច្ច ជាការរំលោភរដ្ឋធម្មនុញ សិទ្ធិននយោបាន និងសិទ្ធិពលរដ្ឋ។ លោក គូសបញ្ជាក់ថា លោក មិនខ្លាចការគំរាមកំហែងនេះទេ ហើយលោក នឹងបន្តទៅចុះជួបសំណេះសំណាលជាមួយអ្នកគាំទ្ររបស់ខ្លួន នៅខេត្តកំពង់ធំ នៅថ្ងៃស្អែកនេះ។
កាលពីព្រឹកមិញនេះ វេទិកាសំណេះសំណាលគណបក្សសង្គ្រោះជាតិ ជាមួយអ្នកគាំទ្រ នៅទីក្រុងកំពង់ចាម ខេត្តកំពង់ចាម ត្រូវបានប្រកាសរំសាយ ខណៈដែលសមត្ថកិច្ចក្រោមការដឹកនាំរបស់គណបក្សប្រជាជនកម្ពុជា បានចល័តកងកម្លាំងប្រដាប់អាវុធ និងកៀងគរប្រជាពលរដ្ឋប្រមាណ១ពាន់នាក់ បញ្ជូនមកដាក់នៅខាងមុខទីស្នាក់ការគណបក្សសង្គ្រោះជាតិ ក្នុងក្រុងកំពង់ចាម ដើម្បីបង្កចលាចល និងបំភិតបំភ័យប្រជាពលរដ្ឋផ្សេងទៀត៕
No comments:
Post a Comment