អ្នកមានជម្លោះដីធ្លីនៅរាជធានីភ្នំពេញ ធ្វើសន្និសីទកាសែត កាលពីព្រឹកមិញ (រូបភាពដោយ ញឹម សុខន)
អ្នកមាន ជម្លោះដីធ្លី៖ រដ្ឋាភិបាល កុហក សហគមន៍អន្តរជាតិ រឿងរំលោភដីធ្លី ពលរដ្ឋ
ដោយ៖ ញឹម សុខន / វីអូឌី | ថ្ងៃចន្ទ ទី3 ខែកុម្ភៈ ឆ្នាំ2014
អ្នកមានជម្លោះដីធ្លីនៅរាជធានីភ្នំពេញ ប្រមាណជា១០០នាក់ បង្ហាញការខកចិត្ត ចំពោះតំណាងរដ្ឋាភិបាល ដែលអះអាងប្រាប់សហគមន៍អន្តរជាតិ ថាជម្លោះដីធ្លីនៅកម្ពុជា ដែលអាជ្ញាធរ មិនអាចដោះស្រាយ ដោយរលូនបាន ដោយសារពលរដ្ឋខ្លួនឯងជាអ្នកបំប៉ោងទិន្នន័យ។
ក្នុងសន្និសីទសារព័ត៌មាននៅតំបន់បឹងកក់ ព្រឹកថ្ងៃចន្ទទី៣ ខែកុម្ភៈនេះ អ្នកមានជម្លោះដីធ្លីមកពី អតីសហគមន៍បុរីកីឡា ថ្មគោល បឹងកក់ និងសហគមន៍មួយចំនួនទៀត សម្ដែងនូវប្រតិកម្មរបស់ពួកគាត់ចំពោះតំណាងរដ្ឋាភិបាល ដែលទម្លាក់កំហុសមកលើពួកគាត់ ដែលជាជនរងគ្រោះនៃបញ្ហាវិវាទដីធ្លី។
ពួកគេអះអាងថា ក្នុងកិច្ចប្រជុំ របស់អង្គការសហប្រជាជាតិ នៅទីក្រុងហ្សឺណែវ ប្រទេសស្វីស កាលពីថ្ងៃទី២៨ ខែមករា តំណាងរដ្ឋាភិបាល លោក ម៉ក់ សម្បត្តិ បានអះអាងថា បញ្ហាដីធ្លីដែលអាជ្ញាធរ ក៏ដូចរាជរដ្ឋាភិបាលមិនអាចដោះស្រាយជូនប្រជាពលរដ្ឋបាន ដោយសារពលរដ្ឋចេះតែបង្កើនចំនួនគ្រួសារដោយខ្លួនឯង ពី៥០០នាក់ ទៅ១.០០០នាក់ ឬឡើងដល់ ១.៥០០នាក់ជាដើម ដែលធ្វើឲ្យអាជ្ញាធរពិបាកដោះស្រាយ។
តំណាងអ្នកភូមិបឹងកក់ អ្នកស្រី ទេព វន្នី ដែលត្រូវបានអញ្ជើញឲ្យចូលរួមក្នុងកិច្ចប្រជុំ របស់អង្គការសហប្រជាជាតិដែរនោះ អះអាងថា អ្វីដែលតំណាងរដ្ឋាភិបាល លោក ម៉ក់ សម្បត្តិ ព្យាយាមលាក់បាំងការពិត ហើយទម្លាក់កំហុសដាក់ពលរដ្ឋខ្លួនឯងនោះ អ្នកស្រីចាត់ទុកថា វាជាភាពអាម៉ាស់របស់រដ្ឋាភិបាលទៅវិញទេ នៅពេលដែលប្រទេសមហាអំណាចមួយចំនួន គេដឹងពីហេតុការណ៍ពិតនៅកម្ពុជានោះ «កុហកប្រជាពលរដ្ឋរបស់ខ្លួនឯងប៉ុណ្ណឹងគ្រប់គ្រាន់ហើយ កុំទៅកុហកអន្តរជាតិទៀត កុំឲ្យខ្មែរអាម៉ាសមុខដោយសារអស់លោកឯង ដែលគ្មានឆន្ទៈក្នុងការដោះស្រាយ ជូនប្រជាពលរដ្ឋ»។
អនុប្រធានគណៈកម្មាធិការសិទ្ធិមនុស្ស របស់រដ្ឋាភិបាល លោក ម៉ក់ សម្បត្តិ បកស្រាយថា ការលើកឡើងរបស់គាត់ គឺផ្អែកទៅតាមច្បាប់ភូមិបាល «អ្វីដែលខ្ញុំលើកនៅអង្គការសហប្រជាជាតិនោះ បញ្ហាដីធ្លី អ្វីៗដោះស្រាយតាមច្បាប់ ជាពិសេសច្បាប់ភូមិបាល ២០០១នោះ ដើម្បីឲ្យមានកំណត់ទិន្នន័យច្បាស់លាស់នូវប្រជាពលរដ្ឋប៉ុន្មាន មានរស់នៅពិតប្រាកដប៉ុន្មាននោះ អ៊ីចឹងឲ្យមានការបង្កើតសហគមន៍ របស់គាត់នោះ ដើម្បីយើងគិតគ្នាមើល កុំឲ្យថាថ្ងៃនេះប៉ុណ្នេះ ហើយរួចទៅប៉ុណ្ណោះ មានការពិបាក»។
ទោះជាយ៉ាងណានៅក្នុងកិច្ចប្រជុំនោះ លោក ម៉ក់ សម្បត្តិ បានសន្យាថា រាជរដ្ឋាភិបាល នឹងទទួលយកអនុសាសន៍របស់សហគមន៍អន្តរជាតិនៅពេលនេះ ដើម្បីសិក្សាធ្វើយ៉ាងណា ជំរុញឲ្យការគោរពសិទ្ធិមនុស្ស នៅកម្ពុជាមានលក្ខណល្អប្រសើរនាពេលអនាគត។
យ៉ាងហោចណាស់ មានប្រទេសជាសមាជិក៧៦ក្នុងចំណោម ជាង១០០ប្រទេស ដែលបានចូលប្រជុំ បានផ្តល់អនុសាសន៍ឲ្យកម្ពុជា ធ្វើកំណែទម្រង់ ពីការបោះឆ្នោត គោរពសិទ្ធិមនុស្ស សិទ្ធិប្រមូលផ្តុំ និងសិទ្ធដីធ្លីផងដែរ៕
No comments:
Post a Comment