សិស្សកំពុងប្រឡងបាក់ឌុប
© សុវណ្ណារ៉ា/RFI
ការលួចលក់ សៀវភៅ សិក្សាគោល នាំឲ្យ ប៉ះពាល់ ដល់ ការសិក្សា របស់ សិស្ស
សិស្សអនុវិទ្យាល័យ និងវិទ្យាល័យនៅទូទាំងប្រទេសកម្ពុជាកំពុងខ្វះខាតសៀវភៅ សិក្សាគោល បើទោះបីជាក្រសួងអប់រំបានចំណាយថវិកាជាតិប្រមាណជា ៥លានដុល្លាអាមេរិក សម្រាប់ទិញ និងចែកចាយសៀវភៅសិក្សាគោលដល់គ្រូ និងសិស្សក៏ដោយ។ ប៉ុន្តែ សៀវភៅសិក្សាគោលមួយចំនួនធំបែរជាត្រូវបានគេលួចយកទៅលក់នៅតាមទីផ្សារទៅវិញ។ ការស្រាវជ្រាវរបស់អង្គការសង្គមស៊ីវិលបានរកឃើញថា បញ្ហានេះបានធ្វើឲ្យប៉ះពាល់ដល់ការសិក្សារបស់សិស្ស។
ការស្រាវជ្រាវមួយបានរកឃើញថា សិស្សចំនួន ៤៧% បានបង្ខំចិត្តទិញសៀវភៅសិក្សាគោល រឺហៅថាសៀវភៅពុម្ព ពីផ្សារ ដោយពួកគេត្រូវចំណាយលុយពី ចន្លោះ ៥ពាន់រៀល ទៅ ៥ម៉ឺនរៀល ក្នុងមួយឆ្នាំ។ លទ្ធផលនេះ ត្រូវបាន វិទ្យាស្ថានខ្មែរសម្រាប់អភិវឌ្ឍន៍ជាតិ និងសម្ព័ន្ធគណនេយ្យភាពសង្គម អាស៊ីបូព៌ា និងប៉ាស៊ីហ្វិក ស្រាវជ្រាវរកឃើញ និងត្រូវបានបង្ហាញនៅក្នុងសន្និសីទសាព័ត៌មាន នៅព្រឹកថ្ងៃទី ១២កុម្ភៈនេះ។
ការស្រាវជ្រាវត្រូវបានធ្វើឡើងនៅក្នុងតំបន់គោលដៅ ដែលមានវិទ្យាល័យចំនួន ៣៣ ក្នុងស្រុក ខណ្ឌចំនួន ១៥ ដែលមាននៅក្នុងរាជធានីភ្នំពេញ ខេត្តកំពត កំពង់ស្ពឺ និងកំពង់ចាម ហើយសិក្សាលើសិស្សានុសិស្សចំនួន ៤៨៩ នាក់។ លោក លឹម សុត្ថារិទ្ធ ប្រធានការិយាល័យផែនការ និងផ្គត់ផ្គត់សៀវភៅគោល របស់ក្រសួងអប់រំ យុវជន និងកីឡា បានទទួលស្គាល់របាយការណ៍ ដែលវិទ្យាស្ថានខ្មែរសម្រាប់អភិវឌ្ឍន៍ជាតិ និងសម្ព័ន្ធគណនេយ្យភាពសង្គម អាស៊ីបូព៌ា និងប៉ាស៊ីហ្វិក បានរកឃើញ។ លោកបានបញ្ជាក់ថា របាយការណ៍នេះ មានលក្ខណៈប្រហាក់ប្រហែលនឹងរបាយការណ៍ដែលក្រសួងរកឃើញដែរ។
យ៉ាងណាក៏ដោយ លោក លឹម សុត្ថារិទ្ធ បានបញ្ជាក់ថា បញ្ហាដែលមានសៀវភៅសិក្សាគោលត្រូវបានដាក់លក់នៅលើទីផ្សារនោះ មិនដឹងថាជាកំហុសរបស់អ្នកណានោះទេ ពីព្រោះបញ្ហានេះ មានជាច្រើនដំណាក់កាល ដែលធ្វើឲ្យសៀវភៅទាំងនេះ ធ្លាក់ទៅដល់ទីផ្សារ។
បើទោះបីជាបញ្ហានេះ នៅមិនទាន់មានអ្នកទទួលខុសត្រូវក៏ដោយ ក៏លោក លឹម សុត្ថារិទ្ធបានបញ្ជាក់ប្រាប់អ្នកសារព័ត៌មានថា ក្រសួងបានខិតខំ និងរកយន្តការដើម្បី ដោះស្រាយចំពោះបញ្ហានេះហើយ ហើយក្រសួងក៏នឹងចាត់វិធានការចុះបង្ក្រាបការលក់សៀវភៅគោលនៅតាមទីផ្សារនានា ក្នុងពេលឆាប់ៗខាងមុខនេះផងដែរ៕
No comments:
Post a Comment