អាជ្ញាធរ បណ្តេញ ពលរដ្ឋ មិនឲ្យតវ៉ា នៅមុខសាលាដំបូង ខេត្តពោធិ៍សាត់
ដោយ៖ កាន់ វិច្ឆិកា / វីអូឌី | ថ្ងៃអង្គារ ទី18 ខែកុម្ភៈ ឆ្នាំ2014
អាជ្ញាធរខេត្តពោធិ៍សាត់ជិត១០០នាក់ នៅព្រឹកថ្ងៃអង្គារនេះ បានបណ្តេញប្រជាពលរដ្ឋប្រមូលផ្តុំតវ៉ានៅមុខសាលាដំបូងខេត្ត ទាមទាររកដំណោះស្រាយ និងយុត្តិធម៌ពីការរុះរើ និងដុតបំផ្លាញផ្ទះសម្បែងរបស់ពួកគាត់កាលពីថ្ងៃទី១២ខែកុម្ភៈ។
លោក ស៊ិម វណ្ណី ប្រជាពលរដ្ឋរងគ្រោះដោយសារអាជ្ញាធរដុតផ្ទះដើម្បីបណ្តេញចេញ ប្រាប់វីអូឌីថា នៅម៉ោងប្រហែលជា៥ភ្លឺព្រឹកមិញនេះ កម្លាំងសមត្ថកិច្ចចម្រុះ ដែលដឹកនាំដោយអភិបាលខេត្តពោធិ៍សាត់ លោក ខូយ សុខា ប្រមាណជាជិត១០០នាក់ បានចុះទៅបណ្តេញប្រជាពលរដ្ឋដែលតវ៉ាទាមទារឲ្យដោះលែងស្ត្រីម្នាក់ និងដោះស្រាយលើបញ្ហាដែលអាជ្ញាធរបានរុះរើកម្ទេច និងដុតផ្ទះរបស់ពួកគាត់អស់ជាង១០០ខ្នង កាលពីថ្ងៃទី១២ ខែកុម្ភៈ កន្លងទៅ «ម៉ោង៥កន្លះ ចាប់ផ្តើមរៀបចំកម្លាំងគេ ដាក់ពេញ ស្ទាក់ផ្លូវព្រាតអស់ ហ៊ុមព័ទ្ធប្រជាពលរដ្ឋ ។ នេះខាងប៉ូលីសទេ គេហ៊ុមព័ទ្ធ ពេលពួកប៉េអឹមគេមក គេរុញច្រាន់មក ខាងប្រជាពលរដ្ឋអី ត្រឹមក្រោម១០០ទេ គេរុញថយៗ ខ្លះក៏ដួល ខ្លះសន្លប់។ ឥឡូវមានអ្នកសន្លប់ពីរនាក់»។
លោកបន្ថែមថា បើទោះជាមានការបណ្តេញមិនឲ្យប្រមូលផ្តុំនៅមុខសាលាដំបូងខេត្ត ប៉ុន្តែរូបលោករួមនឹងពលរដ្ឋផ្សេងទៀត នឹងឡើងទៅតវ៉ានៅសាលាឧទ្ធរណ៍ នៅថ្ងៃស្អែកទៀត ដើម្បីបន្តទាមទាររកយុត្តិធម៌ ។
ពលរដ្ឋដែលរងគ្រោះម្នាក់ទៀត អ្នកស្រី ប៉ាល់ វីន លើកឡើងថា ពួគគាត់ជាប្រជាជនក្រីក្រ ការទាមទាររបស់គាត់គ្រាន់តែចង់បានផ្ទះមកវិញ ដើម្បីប្រកបរបរចិញ្ចឹមជីវិត ហើយកូនៗពួកគាត់បានទៅរៀនដូចពីមុន «កូនចៅខ្ញុំទៅរស់នៅឯណាទៅ ដើរដេក ដើរស៊ី គ្មានស្អីហូប គ្មានស្អីដេក តើបានអីនៅ? រស់នៅសែនពិបាក គ្មានកន្លែងនៅ គ្មានទីលំនៅជ្រក គ្មានស្អីដាំដំនាំ បានស្អីចិញ្ចឹមកូនតទៅទៀត សូមជួយខ្ញុំផង។ កូនចៅទាំងអស់គ្នានេះ កូនចៅវេទនាណាស់ គ្មានទីលំនៅ គ្មានបាយហូបទេ ដាំអីក៏មិនបានដែរ រវល់តែដី រវល់តែដុត»។
VOD មិនអាចទាក់ទងសុំការបំភ្លឺពីអភិបាលខេត្តពោធិ៍សាត់ លោក ខូយ សុខា បានទេ នៅព្រឹកថ្ងៃអង្គារនេះ។ តែកាលពីល្ងាចម្សិលមិញ លោក ខូយ សុខា បានឲ្យដឹងថា ប្រជាពលរដ្ឋទាំងនោះ បានទៅរុករានដីព្រៃដើម្បីធ្វើលំនៅឋាន ដែលជាបទល្មើសព្រហ្មទណ្ឌ ហើយសមត្ថកិច្ច នឹងចាត់វិធានការតាមផ្លូវច្បាប់ប្រសិនបើពលរដ្ឋនៅតែបន្តតវ៉ាទៀតនោះ។
អ្នកសម្របសម្រួលអង្គការលីកាដូប្រចាំខេត្តពោធិ៍សាត់ លោក អេង ឈុនហាន មានប្រសាសន៍ថា សមត្ថកិច្ចបានបង្ខំឲ្យប្រជាពលរដ្ឋចាកចេញ មិនឲ្យតវ៉ាបន្តទៀត ជាហេតុធ្វើឲ្យប្រជាពលរដ្ឋមួយចំនួន ខ្យល់គរ មានខ្លះសន្លប់ ដោយសារតែរន្ធត់ និងអស់កម្លាំង។ លោកបន្ថែមថា ការបណ្តេញមិនឲ្យពលរដ្ឋតវ៉ានេះមិនមែនជាដំណោះស្រាយទេ ព្រោះពលរដ្ឋគ្រាន់តែទាមទារឲ្យមានការទទួលខុសត្រូវ លើការបំផ្លាញផ្ទះសម្បែងរបស់ពួកគាត់ប៉ុណ្ណោះ «ការបណ្តេញអញ្ចឹង ដូចជាមិនមែនការដោះស្រាយបញ្ហាទេ ពីព្រោះយើងឃើញការពិត បើតាមការស៊ើបអង្កេត ការចុះទៅពិនិត្យដល់កន្លែងកើតហេតុ យើងឃើញថា ទីតាំងដែលពួកគាត់នៅ ជាកន្លែងមួយដែលខាងរាជរដ្ឋាភិបាល ឬអាជ្ញាធរខេត្ត លោកចោទថា ការចូលកាន់កាប់ទន្ទ្រានព្រៃខុសច្បាប់ ត្រូវបានសមត្ថកិច្ចដុតបំផ្លាញអស់ហើយ អញ្ចឹងគាត់មកតវ៉ានេះ គាត់ថា ប្រសិនឲ្យគាត់ចេញពីនេះ តើឲ្យគាត់ទៅនៅកន្លែងណាទៀត គាត់មិនមានកន្លែងត្រូវទៅទេ»។
កាលពីថ្ងៃទី១៣ ខែកុម្ភៈ ឆ្នាំ២០១៤ ប្រជាពលរដ្ឋប្រមាណជាជាង៨០នាក់ បានឡើងទៅតវ៉ានៅមុខសាលាដំបូងខេត្តពោធិ៍សាត់ បន្ទាប់ពីស្ត្រីម្នាក់ត្រូវបានសមត្ថកិច្ចចាប់ខ្លួន ដោយចោទថាបានប្តឹងឲ្យមានអន្តរាគមន៍ និងផ្តល់ព័ត៌មានទៅអ្នកសារព័ត៌មាន ខណៈដែលកម្លាំងសមត្ថកិច្ចចម្រុះ ដឹកនាំដោយព្រះរាជអាជ្ញារងខេត្ត លោក ប៉ង់ ចាន់សុយុទ្ធារ៉ា ចុះទៅរុះរើ និងដុតបំផ្លាញផ្ទះរបស់ប្រជាពលរដ្ឋ យ៉ាងហោចណាស់ជាង១០០ខ្នង នៅភូមិអូរធំ ហៅភូមិចម្ការចេក ឃុំក្រពើពីរ ស្រុកវាលវែង ខេត្តពោធិ៍សាត់ កាលពីថ្ងៃទី១២ និងថ្ងៃទី១៣ ខែកុម្ភៈ កន្លងមក ក្រោមហេតុផលថា ជាតំបន់ការពារព្រៃឈើនោះ៕
No comments:
Post a Comment