កម្ពុជា ស្នើ រដ្ឋាភិបាល អូស្ត្រាលី ចូលរួម កែទម្រង់ ការបោះឆ្នោត
ដោយ៖ ញឹម សុខន / វីអូឌី | ថ្ងៃសៅរ៍ ទី22 ខែកុម្ភៈ ឆ្នាំ2014
ប្រមុខ រាជរដ្ឋាភិបាល កម្ពុជា លោក ហ៊ុន សែន នៅព្រឹកថ្ងៃសៅរ៍នេះ ស្នើឲ្យ ប្រទេសអូស្ត្រាលី ចូលរួមចំណែក ជួយលើ ការកែទម្រង់ ការបោះឆ្នោត នៅកម្ពុជា។
ការស្នើនេះធ្វើឡើង ក្នុងជំនួបរវាងលោកនាយករដ្ឋមន្ត្រី ហ៊ុន សែន និង រដ្ឋមន្ត្រីការបរទេសអូស្ត្រាលី លោកស្រី Julie I Sabel Bishob នៅវិមានសន្តិភាពក្រុងភ្នំពេញ នាថ្ងៃទី២២ ខែកុម្ភៈនេះ ។ ក្រោយពីជំនួបនេះ ជំនួយការនាយករដ្ឋមន្ត្រី លោក អ៊ាង សុផល្លែត ឱ្យដឹងថា មន្ត្រីតំណាងប្រទេសអូស្ត្រាលីរូបនោះ ស្នើសុំឱ្យកម្ពុជាពិនិត្យពិចារណា ជួយដល់អូស្ត្រាលី ក្នុងការទទួលយកជនភៀសខ្លួនស្របច្បាប់ ពីប្រទេសអូស្ត្រាលី បានមករស់នៅ និងតាំងទីលំនៅថ្មី នៅក្នុងព្រះរាជាណាចក្រកម្ពុជា។
លោក អ៊ាង សុផល្លែត បន្តថា កម្ពុជា សន្យាបង្កើតគណៈកម្មការ ដើម្បីសិក្សាករណីនេះ។ លោកថា កម្ពុជា ក៏បានស្នើឲ្យអូស្ត្រាលី បន្តជួយដល់សាលាក្តីខ្មែរក្រហមបន្តទៀត ដោយចាត់ទុកថា កាផ្តល់ធនធានមនុស្សដល់សាលាក្តីនេះ ជារឿងសំខាន់។
ជំនួយការរូបនោះ អះអាងទៀតថា កម្ពុជា បានស្នើឲ្យប្រទេសអូស្ត្រាលី ចូលរួមចំណែកជួយលើការកែទម្រង់ការបោះឆ្នោតនៅកម្ពុជាផងដែរ។
ប្រព័ន្ធបោះឆ្នោតនៅកម្ពុជា រងការរិះគន់ ពីមជ្ឈដ្ឋានជាតិ និងអន្តរជាតិ ថា មាននីតិវិធីស្មុគស្មាញ ធ្វើឲ្យដំណើរការបោះឆ្នោតប្រព្រឹត្តទៅ គ្មានតម្លាភាព នឹងមិនយុត្តិធម៌។ ជារឿយៗ ជម្លោះនយោបាយច្រើនកើតឡើងក្រោយការបោះឆ្នោត ដោយចោទថាបក្សកាន់អំណាច ទទួលបានប្រយោជន៍ច្រើន ពីនីតិវិធីស្មុគស្មាញនេះ។ ទោះជាយ៉ាងណា គណបក្សដែលឈ្នះអាសនៈក្នុងសភា នាអាណត្តិទី៥នេះ ប្រកាសកែទម្រង់ស៊ីជម្រៅ លើប្រព័ន្ធបោះឆ្នោតនេះ ឲ្យស្របតាមស្តង់ដារអន្តរជាតិតាមបែបលិទ្ធិប្រជាធិបតេយ្យ៕
No comments:
Post a Comment