លោកសមរង្ស៊ី ប្រធានគណបក្សសង្គ្រោះជាតិ ថ្លែងទៅកាន់អ្នកគាំទ្រនៅទីលាប្រជាធិបតេយ្យ នាពេលកន្លងមក (រូបថត៖ ឧត្តម)
លោក សម រង្ស៊ី៖ ប្រជារាស្ត្រខ្មែរ រួបរួមគ្នា ដើម្បី ប្រឆាំង អំណាច ផ្ដាច់ការ, គឺ ខុសពី ប្រជារាស្ត្រថៃ
ដោយ៖ នួន បូរិន / វីអូឌី | ថ្ងៃសុក្រ ទី7 ខែកុម្ភៈ ឆ្នាំ2014
លោក សម រង្ស៊ី ប្រធាន គណបក្សសង្គ្រោះជាតិ ដែលកំពុង កៀងគរសំឡេង របស់ សហគមន៍ អន្តរជាតិ ជួយជំរុញ ឲ្យមាន ដំណោះស្រាយ នយោបាយ នៅកម្ពុជា បានធ្វើ ការវិភាគ រវាង ស្ថានការណ៍ នយោបាយ នៅកម្ពុជា និងប្រទេសថៃ ថា, មានលក្ខណៈ ដូចគ្នា តែមួយចំនុចប៉ុណ្ណោះ, តែ មួយចំនុចទៀត គឺ មិនដូចគ្នា ព្រោះ ប្រជាជនកម្ពុជា កំពុងរួបរួមគ្នា ដើម្បី ប្រឆាំងអំណាចផ្ដាច់ការ។
លោក សម រង្ស៊ី បានធ្វើវិភាគ ដូចនេះ នៅលើទំព័របណ្ដាញទំនាក់ទំនងសង្គមរបស់លោក ដែលបានមើលឃើញ នៅថ្ងៃព្រហស្បតិ៍ ទី៧ ខែមករានេះ។ លោកបានធ្វើការប្រៀបធៀប ស្ថានការណ៍នយោបាយ នៅប្រទេសថៃ និងប្រទេសកម្ពុជា មានចំណុដូចនេះ។
១- ចំណុចដូចគ្នា ៖ មានការប្រេះស្រាំយ៉ាងជ្រៅក្នុងសង្គម ហើយមានការស្អប់គ្នាយ៉ាងខ្លាំង ដែលមិនដែលមានពីមុនមក រវាងភាគីទាំងសងខាង។
២- ចំណុចខុសគ្នា ៖ នៅប្រទេសថៃ ប្រជារាស្ត្របែកបាក់ជាពីរក្រុមធំៗ តែនៅប្រទេសកម្ពុជា ប្រជារាស្ត្ររួបរួមគ្នា ប្រឆាំងអំណាចផ្តាច់ការ តំណាងដោយមនុស្សមួយក្តាប់តូច។
នៅប្រទេសថៃ មានចែកក្រុមនិន្នាការនយោបាយធំៗ ចំនួនពីរគឺ ក្រុមអាវក្រហម និយមលោកថាក់ស៊ីន ឬគណបក្សភឿថៃ របស់លោកស្រីយីង ឡាក់ និងមួយទៀត ក្រុមអាវលឿង ដែលនិយម គណបក្សប្រឆាំង របស់លោកអាប់ភីស៊ីត។ បច្ចុប្បន្ន ក្រុមអាវលឿង បានធ្វើបាតុកម្ម ប្រឆាំងលោកស្រី យីងឡាក់ មានរយៈពេល ៣ខែមកហើយ ដោយមិនមានដំណោះស្រាយអ្វីឡើយ។ ការបោះឆ្នោតនៅថៃ នៅថៃ្ងទី២ កុម្ភៈ ដែលមានចំនួនអ្នកចេញទៅបោះឆ្នោត មិនដល់ ៥០ភាគរយក្នុងចំណោម អ្នកមានសិទ្ធិបោះឆ្នោត ៤៣លានាក់ ខណៈ គណបក្សប្រឆាំងរបស់លោកអាប់ភីស៊ីត ធ្វើការហិការ ត្រូវបានក្រុមអ្នកវិភាគថៃមួយចំនួន ជាពិសេសក្រសួងការបរទេសអាមេរិក និងលោក បាន គីមូន អគ្គលេខាធិការ អង្គការសហប្រជាជាតិព្រមានថា រាជាណាចក្រនេះ កាន់តែបែកបាក់គ្នាថែមទៀត ប្រសិនបើអ្នកនយោបាយខ្វែងគំនិតគ្នា មិនតម្កល់ផលប្រយោជន៍រាស្ត្រជាធំ។ ក្រសួងការបរទេសសហរដ្ឋអាមេរិក បន្តព្រមានថា ប្រសិនអំពើហិង្សានៅតែបន្ត គឺរដ្ឋប្រហារយោធា អាចនឹងកើតមាន ហើយទីបំផុត វាជាការសម្លាប់ ប្រជាធិបតេយ្យ។
ប៉ុន្តែ លោកស្រីជា វណ្ណាត អ្នកវិភាគបញ្ហាសង្គម ហាក់យល់ស្របនឹងទស្សនៈរបស់ មេដឹកនាំបក្សប្រឆាំងនេះតិចតួច ដែលថាប្រជាជាតិថៃកំពុង ប្រេះស្រាំគ្នាយ៉ាងខ្លាំងនោះ។ លោកស្រី ពិនិត្យឃើញថាបើទោះជា អ្នកនយោបាយថៃ និងប្រជាជនថៃ មានការមិនចុះសម្រុងគ្នាក្ដី តែអ្នកនយោបាយថៃមានការអត់ធ្មត់ជាខ្លាំង ព្រោះស្ថាប័នសមត្ថកិច្ច និង ប្រជាជនថៃរបស់ប្រទេសនេះ មិនងាយប្រើហិង្សាដាក់គ្នាឡើយ។ លោកស្រីមានប្រសាសន៍ថា កម្ពុជា ងាយប្រើហិង្សាជាងប្រទេសថៃ។ នៅពេលសុំការវិភាគ ត្រង់ចំនុចដែលលោកសមរង្ស៊ីថា នៅប្រទេសកម្ពុជា ប្រជារាស្ត្ររួបរួមគ្នា ប្រឆាំងអំណាចផ្តាច់ការ តំណាងដោយមនុស្សមួយក្តាប់តូច។ ចំនុចនេះលោកស្រី ជា វណ្ណាត បែរជាទទូចសុំឲ្យអ្នកនយោបាយខ្មែរ រៀនធ្វើសមាធិ និងអហិង្សាគឺដើម្បីជាតិ មានសន្តិភាពយូរអង្វែង។
កម្ពុជាស្ថិតក្នុងភាពជាប់គាំងនយោបាយ រយៈពេល៦ខែមកហើយ គិតចាប់ពីថ្ងៃបោះឆ្នោតជ្រើសតាំងតំណាងរាស្ត្រអាណត្តិទី៥ ថ្ងៃទី២៨ ខែកក្កដា ឆ្នាំ២០១៣ មកដល់ពេលនេះ ដែលមិនទាន់មានសញ្ញាណាមួយថាគណបក្សប្រជាជនកម្ពុជា និងគណបក្សសង្គ្រោះជាតិ បានបោះដៃគ្នាដើម្បីកំណត់ថ្ងៃចរចារម្ដងទៀតឡើយ។ គណបក្សសង្គ្រោះជាតិ ដែលដឹកនាំដោយ លោកសមរង្ស៊ី និងលោក កឹម សុខា បន្តព្រមានថា នៅពេលឆាបៗនេះ គណបក្សនឹងបន្តប្រមូលផ្ដុំប្រជាពលរដ្ឋធ្វើមហាបាតុកម្មជាថ្មីម្ដងទៀត ដើម្បីឲ្យគណបក្ស ប្រជាជនកម្ពុជា ទទួលយកការបោះឆ្នោតសភាអាណត្តិទី៥ឡើងវិញ៕
No comments:
Post a Comment