តុលាការ ខេត្តបន្ទាយមានជ័យ កោះហៅ អ្នកសារព័ត៌មាន ២នាក់ សាកសួរ
ដោយ សួន សុផលមុន្នី / អាស៊ីសេរី | ១៧ កុម្ភៈ ២០១៤
តុលាការខេត្តបន្ទាយមានជ័យ កាលពីរសៀលថ្ងៃទី១៧ ខែកុម្ភៈ បានកោះហៅអ្នកសារព័ត៌មានពីរនាក់សាកសួរតាមពាក្យបណ្ដឹងរបស់មន្ត្រីយោធាម្នាក់ ដែលបានប្ដឹងចោទប្រកាន់ពីបទបរិហារកេរ្តិ៍ទាក់ទិនទៅនឹង រឿងជម្លោះដីធ្លីមួយកន្លែងនៅក្រុងប៉ោយប៉ែត។ ភ្នាក់ងារសារព័ត៌មានទាំងពីរនាក់នោះ ម្នាក់ជាអ្នកបម្រើការនៅអង្គភាពកាសែត "កោះសន្តិភាព" និងម្នាក់ទៀតជាអ្នកបម្រើការនៅអង្គភាពស្ថានីយទូរទស្សន៍ "ហង្សមាស"។
ការប្ដឹងពីបទបរិហារកេរ្តិ៍នេះ កើតមានឡើងក្រោយពីភ្នាក់ងារសារព័ត៌មានទាំងពីរអង្គភាពនោះបានសរសេរអត្ថបទព័ត៌មានចុះផ្សាយរិះគន់ទៅលើមន្ត្រីយោធាម្នាក់ ឈ្មោះ ហង្ស ម៉ៅ ដែលមានពាក់ព័ន្ធក្នុងជម្លោះដីធ្លីជាមួយប្រជាពលរដ្ឋចំនួន ៥០គ្រួសារនៅភូមិស្ទឹងបទ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី៥ ធ្នូ ឆ្នាំ២០១៣។
មន្ត្រីយោធាឈ្មោះ ហង្ស ម៉ៅ កាលពីថ្ងៃទី២ មករា បានដាក់ពាក្យបណ្ដឹងទៅតុលាការខេត្តបន្ទាយមានជ័យដោយប្ដឹងចោទប្រកាន់ភ្នាក់ងារសារព័ត៌មានពីរនាក់ពីបទបរិហារកេរ្តិ៍។ នៅថ្ងៃទី១៥ ខែមករា ឆ្នាំ២០១៤ តំណាងអយ្យការបានចេញដីកាកោះហៅលោក ផូ ប៊ុនថន ជាភ្នាក់ងារយកព័ត៌មានឲ្យទូរទស្សន៍ "ហង្សមាស" និងលោក ពេជ្រ សុវណ្ណរ៉ា ជាភ្នាក់ងារកាសែត "កោះសន្តិភាព" ឲ្យចូលខ្លួនទៅបំភ្លឺនៅថ្ងៃទី១៧ ខែកុម្ភៈ ឆ្នាំ២០១៤។
ព័ត៌មានចុះផ្សាយនោះបានយោងលើប្រភពពីប្រជាពលរដ្ឋដែលបានបង្ហើបឲ្យដឹងថា នៅពេលទំនាស់ដីធ្លីកើតឡើងនៅក្រុងប៉ោយប៉ែត គេតែងសង្កេតឃើញបុគ្គលឈ្មោះ ហង្ស ម៉ៅ ញឹកញាប់ណាស់។ គេមិនដឹងថា លោក ហង្ស ម៉ៅ មានដីប៉ុន្មានហិកតារទៀតទេ ដែលមានជម្លោះជាមួយប្រជាពលរដ្ឋតទៅទៀតនោះ។
លោក ពេជ្រ សុវណ្ណរ៉ា យល់ថា ចេតនានៃពាក្យបណ្ដឹងបរិហារកេរ្តិ៍នេះ បានគំរាមកំហែងទៅលើសិទ្ធិសេរីភាពសារព័ត៌មានយ៉ាងធ្ងន់ធ្ងរ។
ភ្នាក់ងារយកព័ត៌មានទូរទស្សន៍ "ហង្សមាស" វិញ លោក ផូ ប៊ុនថន ថ្លែងថា ព័ត៌មានដែលបានចុះផ្សាយនោះគឺជារឿងទាក់ទិនពីទុក្ខកង្វល់របស់ប្រជាពលរដ្ឋ។ ប្រជាពលរដ្ឋក៏បានលើកឡើង និងមានប្រតិកម្មចំពោះមន្ត្រីយោធា និងការចុះអនុវត្តសាលក្រមរបស់តុលាការនៅលើដីមានទំនាស់នោះ ដោយសារការអនុវត្តសាលក្រមនោះពុំមានការចូលរួមពីប្រជាពលរដ្ឋ។
លោក ផូ ប៊ុនថន៖ «ទីមួយតុលាការបានអនុវត្តសាលក្រមហ្នឹងដោយអត់បានដឹង អត់បានចូលរួម ដោយគេទៅប្រកាសមានសមត្ថកិច្ចប៉ុន្មាននៅលើដីហ្នឹង ដោយកំបាំងមុខ អ៊ីចឹងប្រជាពលរដ្ឋខ្លះអត់បានដឹង ពេលអ៊ីចឹងត្រូវបានគេបំពានយកដីគាត់។ លោក ហង្ស ម៉ៅ ដែលបានប្ដឹងខ្ញុំនេះ គាត់ជាអ្នកក្តីក្តាំងជាមួយប្រជាពលរដ្ឋពាក់ព័ន្ធដីនៅចំណុចហ្នឹង ពេលព័ត៌មានផ្សាយទៅ គាត់បានប្ដឹងយើង ប៉ុន្តែសម្រាប់ព័ត៌មានដែលបានផ្សាយហ្នឹងមិនមែនសម្រាប់តែខ្ញុំ ហង្សមាស ឬក៏លោក សុវណ្ណរ៉ា ដែលជា កោះសន្តិភាព នោះទេ»។
លោក ផូ ប៊ុនថន យល់ថា ករណីប្ដឹងអ្នកសារព័ត៌មាននេះ ជាចេតនាបំពាក់ស្មារតីអ្នកសារព័ត៌មានផ្សេងទៀត មិនពួកគេហ៊ានសរសេររឿងពិតដើម្បីផលប្រយោជន៍សង្គម។
វិទ្យុអាស៊ីសេរីមិនអាចសុំការបញ្ជាក់ពីលោក ហង្ស ម៉ៅ និងតំណាងអយ្យការ ជុំវិញករណីនេះបានឡើយ កាលពីរសៀលថ្ងៃទី១៧ កុម្ភៈ។
លោកវរសេនីយ៍ត្រី សុខ ណាន បច្ចុប្បន្នបម្រើការនៅអគ្គនាយកដ្ឋានបញ្ជូនសារនៃអគ្គបញ្ជាការក្រសួងការពារជាតិ ថ្លែងថា បុគ្គលឈ្មោះ ហង្ស ម៉ៅ ដែលមានទំនាស់ដីធ្លីជាមួយប្រជាពលរដ្ឋ ៥០គ្រួសារនៅក្រុងប៉ោយប៉ែត នោះ ម្ដងស្លៀកពាក់ជាឧត្ដមសេនីយ៍ ម្ដងស្លៀកពាក់ជាអង្គរក្ស។
លោក ហង្ស ម៉ៅ ពីមុនមកធ្លាប់ធ្វើជាអង្គរក្ស លោកផ្កាយមាស ៤ ហ៊ីង ប៊ុនហៀង ប៉ុន្តែនៅឆ្នាំ២០១១ លោក ហង្ស ម៉ៅ ត្រូវបានគេដេញចេញពីតំណែង៖ «ក្រោយមកទៀតបុគ្គលនេះដើរធ្វើព្យុះធ្វើភ្លៀងជាមួយប្រជាពលរដ្ឋនៅក្រុងប៉ោយប៉ែត គ្រាន់តែគ្រប់សង្កត់ដីធ្លីជាមួយប្រជាពលរដ្ឋចំនួន ៦ភូមិ។ ការដែលប្ដឹងរបស់លោក ហង្ស ម៉ៅ នេះ គឺជាលក្ខណៈមួយគំរាមដើម្បីឲ្យចប់ ដើម្បីកុំឲ្យធ្វើអីលោក ហង្ស ម៉ៅ កើត សូម្បីតែរូបខ្ញុំផ្ទាល់ ជាតំណាងប្រជាពលរដ្ឋក៏លោក ហង្ស ម៉ៅ ហ្នឹង ថាខ្ញុំបំផ្លាញទ្រព្យសម្បត្តិរបស់គាត់ដែរ ប៉ុន្តែខ្ញុំអត់មានបានដឹងអីទាំងអស់ ព្រោះខ្ញុំធ្វើការជាយោធានៅភ្នំពេញ»។
មន្ត្រីសមាគមអាដហុក លោក ស៊ុំ ចន្ទគា ថ្លែងថា ករណីប្ដឹងអ្នកសារព័ត៌មាននេះ ជាការគំរាមកំហែងសិទ្ធិសេរីភាពសារព័ត៌មាន។ បញ្ហានេះ លោកថា តុលាការខេត្តបន្ទាយមានជ័យ គួរលើកយកច្បាប់សេរីភាពសារព័ត៌មានមកអនុវត្ត ដើម្បីចៀសវាងការចោទប្រកាន់ថា តុលាការជាកន្លែងមួយដែលគេយកធ្វើជាបង្អែកដើម្បីគំរាមកំហែងដល់អ្នកដទៃនិងអ្នកសារព័ត៌មាន៕
No comments:
Post a Comment