ពលរដ្ឋ នៅមណ្ឌលគិរី តវ៉ាបិទផ្លូវ រឿងអាជ្ញាធរ ដុតរោងស្នាក់នៅ ប្រមាណ ៣០០គ្រួសារ
ដោយ រដ្ឋា វិសាល / អាស៊ីសេរី | ១២ កុម្ភៈ ២០១៤
កងកម្លាំងប្រដាប់អាវុធចម្រុះប្រមាណ ១០០នាក់ បានចុះរុះរើ និងដុតកម្ទេចរោងស្នាក់នៅរបស់ប្រជាពលរដ្ឋប្រមាណ ៣០០គ្រួសារ រស់នៅចំណុចព្រំប្រទល់ខេត្តមណ្ឌលគិរី និងខេត្តក្រចេះ ក្រោមហេតុផលថា ប្រជាពលរដ្ឋទាំងនោះបានមកកាប់រានតំបន់ព្រៃឈើការពាររបស់រដ្ឋ ហើយតាំងទីលំនៅខុសច្បាប់។
ដោយសារផ្ទុះកំហឹង និងការឈឺចាប់ចំពោះសកម្មភាពរបស់កងកម្លាំងប្រដាប់អាវុធចម្រុះទាំងនោះ អ្នកភូមិប្រមាណ ៣០០នាក់ បាននាំគ្នាដាក់របាំងបិទកំណាត់ផ្លូវជាតិលេខ៧៦ ដើម្បីតវ៉ាពីបញ្ហានេះ។
កំណត់ផ្លូវជាតិលេខ៧៦ ស្ថិតនៅចន្លោះស្រុកកែវសីមា ខេត្តមណ្ឌលគិរី និងស្រុកស្នួល ខេត្តក្រចេះ ត្រូវបានកាត់ផ្តាច់ចរាចរណ៍កាលពីវេលាម៉ោងប្រមាណ ១រសៀលថ្ងៃទី១២ ខែកុម្ភៈ បន្ទាប់ពីអ្នកភូមិប្រមាណ ៣០០ ទៅ ៤០០នាក់ ដាក់របាំងរាំងផ្លូវ។ អ្នកភូមិបញ្ជាក់ថា កងកម្លាំងចម្រុះនៃអាជ្ញាធរខេត្តបានរុះរើ និងដុតបំផ្លាញរោងស្នាក់នៅរបស់ពលរដ្ឋជាង ៥០០គ្រួសារ។
ប្រជាពលរដ្ឋរស់នៅទីកើតហេតុមានប្រសាសន៍បញ្ជាក់ថា ក្រុមប្រដាប់អាវុធចម្រុះប្រមាណ ១០០នាក់ ត្រូវបានគេដាក់ពង្រាយនៅតំបន់គ្រញូងសែនជ័យ ក្នុងឃុំពីរធ្នូ ជាប់ព្រំប្រទល់ស្រុកស្នួល និងស្រុកកែវសីមា ហើយបណ្ដេញប្រជាពលរដ្ឋចេញពីលំនៅឋាន បន្ទាប់មកកងកម្លាំងទាំងនោះបានប្រើប្រាស់រថយន្តទាញរំលំរោងស្នាក់នៅ ហើយដុតបំផ្លាញចោល។ ប្រជាពលរដ្ឋបន្តថា រហូតមកទល់នឹងរសៀលម៉ោង៣ រោងប្រក់តង់ និងស័ង្កសីប្រមាណ ៣០០ ទៅ ៥០០រោង ត្រូវបានដុតបំផ្លាញចោល ក្នុងនោះក៏មានប្រជាពលរដ្ឋមួយចំនួនត្រូវចាប់ដាក់រថយន្តនាំចេញពីទីកើតហេតុ។
ប្រជាពលរដ្ឋរស់នៅតំបន់គ្រញូងសែនជ័យ រាយការណ៍ថា អ្នកភូមិប្រមាណ ៥០០គ្រួសារ បានមកកាប់រានព្រៃតាំងទីលំនៅធ្វើស្រែចម្ការនៅតំបន់នោះប្រមាណ ២ឆ្នាំហើយ។ អ្នកភូមិទាំងនោះជាប្រជាពលរដ្ឋចំណាកស្រុកពីបណ្ដាខេត្តនានា ដោយសារក្រីក្រគ្មានដីប្រកបរបរចិញ្ចឹមជីវិត។
ថ្លែងបញ្ជាក់ពីព្រឹត្តិការណ៍នេះ អភិបាលស្រុកស្នួល លោក គង់ គឹមនី មានប្រសាសន៍ថា ប្រជាពលរដ្ឋបានមកតាំងទីលំនៅ ហើយកាប់រានព្រៃឈើខុសច្បាប់នៅតំបន់ព្រៃការពារ។លោកបន្តថា អាជ្ញាធរបានជូនដំណឹងច្រើនលើកឲ្យប្រជាពលរដ្ឋរុះរើ និងចាកចេញពីតំបន់នោះ ប៉ុន្តែប្រជាពលរដ្ឋកាន់តែច្រើន បានសម្រុកមកកាប់ឆ្ការព្រៃកាន់តែខ្លាំង ទើបអាជ្ញាធរ ជាពិសេសស្ថាប័នអយ្យការបានចេញដីកាសម្រេចបណ្ដេញ និងរុះរើរោងខុសច្បាប់ទាំងនោះចេញ៖ «កាលណាយើងរុះរើ ហើយយើងមិនអាចឲ្យគាត់ទៀតទេ។ ខ្ញុំបានជម្រាបគាត់ហើយ បើសិនគាត់អត់ដីទេ ឲ្យគាត់ទៅបញ្ជាក់ពីមូលដ្ឋានគាត់មក ពីភូមិឃុំគាត់មក ថាគាត់ពិតជាអត់ដីមែន។ គេមានកម្មវិធីបែងចែកដីសង្គមកិច្ច គាត់មកធ្វើខុសច្បាប់អ៊ីចឹង»។
សេចក្តីរាយការណ៍របស់ប្រជាពលរដ្ឋអ្នកតវ៉ា ឲ្យដឹងថា ស្ពានឈើមួយកន្លែងត្រូវបានគេដុតបំផ្លាញ នៅចម្ងាយប្រមាណ ៣០០ម៉ែត្រពីចំណុចផ្លូវជាតិលេខ៧៦ កន្លែងដែលអ្នកតវ៉ាយកដើមឈើធ្វើរបាំងបិទផ្លូវ ធ្វើឲ្យរថយន្ត និងម៉ូតូប្រមាណ ៥០០គ្រឿងកកស្ទុះចរាចរណ៍នៅតំបន់នោះ។
មន្ត្រីឃ្លាំមើលសិទ្ធិមនុស្សសមាគមអាដហុក (Adhoc) ខេត្តក្រចេះ បានចាត់មន្ត្រីចុះទីកាន់ទីកើតហេតុហើយ ក៏ប៉ុន្តែមន្ត្រីសម្របសម្រួលសមាគមប្រចាំខេត្តក្រចេះ អ្នកស្រី ធីម ណារីម សម្ដែងការសោកស្ដាយចំពោះស្ថានភាពអាក្រក់នេះ។ អ្នកស្រីចាប់អារម្មណ៍ថា ប្រជាពលរដ្ឋមកតាំងទីលំនៅខុសច្បាប់ ក៏ប៉ុន្តែអាជ្ញាធរគួរស្វែងរកដំណោះស្រាយណាដែលមិនបង្កភាពហិង្សា ដែលបណ្ដាលឲ្យខូចខាតទ្រព្យសម្បត្តិ និងប៉ះពាល់ដល់សិទ្ធិរស់រានមានជីវិតរបស់ពលរដ្ឋ៖ «មនុស្សវាខុសពីសត្វៗវាអាចរស់នៅកន្លែងផ្សេងៗបាន ប៉ុន្តែមនុស្សវាត្រូវការដី។ បើសិនយើងរកឃើញថា គាត់មានតម្រូវការចាំបាច់មែន គួររកវិធីសម្របសម្រួលដោះដូរបែបណាមួយដែលអាចធ្វើទៅបាន»។
មកទល់នឹងរសៀលម៉ោង៤ ថ្ងៃដដែលនេះ មិនទាន់ឃើញក្រុមអាជ្ញាធរណាចុះដោះស្រាយបញ្ឈប់ការបិទផ្លូវជាតិនេះនៅឡើយ។ ចំណែកក្រុមអ្នកតវ៉ាស្រែកអំពាវនាវស្វែងរកកិច្ចគាំពារសិទ្ធិរស់នៅ និងថ្កោលទោសចំពោះសកម្មភាពរបស់អាជ្ញាធរមានសមត្ថកិច្ច ដែលប្រើហិង្សាបណ្ដេញពួកគាត់ចេញពីលំនៅឋានដោយបង្ខំ និងគ្មានដំណោះស្រាយបែបនេះ។
ប្រជាពលរដ្ឋអ្នកតវ៉ាបិទផ្លូវជាតិលេខ៧៦ ឲ្យដឹងថា នៅវេលាម៉ោងប្រមាណ ៥រសៀល កងកម្លាំងសមត្ថកិច្ចត្រូវបានបញ្ជូនមកកាន់ទីកើតហេតុ កើនឡើងជិត ២០០នាក់ បន្ទាប់មកថ្នាក់ដឹកនាំក្រុមសមត្ថកិច្ច បានសន្យាថានឹងដោះស្រាយបញ្ហាជូនប្រជាពលរដ្ឋ ទើបអ្នកតវ៉ាបានបើកផ្លូវឲ្យធ្វើចរាចរណ៍ឡើងវិញដូចធម្មតា៕
No comments:
Post a Comment