លោក ហ៊ុន សែន ព្រមាន បក្សប្រឆាំង បើបន្តចោទថា នៅពីក្រោយ រឿងអាស្រូវ លោក កឹម សុខា
RFA / វិទ្យុ អាស៊ី សេរី | ១៧ មីនា ២០១៦
អនុប្រធានគណបក្សសង្គ្រោះជាតិ លោក កឹម សុខា (ឆ្វេង)
ចាប់ដៃជាមួយលោកនាយករដ្ឋមន្ត្រី ហ៊ុន សែន នាវិមានព្រឹទ្ធសភា
ក្រោយជំនួបចរចាកំពូលនៅថ្ងៃទី២២ កក្កដា ២០១៤។
RFA/Tin Zakariya
លោកនាយករដ្ឋមន្ត្រី ហ៊ុន សែន នៅថ្ងៃទី១៧ មីនា ព្រមានវាយបកលើគណបក្សសង្គ្រោះជាតិ ប្រសិនបើបក្សនេះបន្តចោទប្រកាន់បក្សកាន់អំណាច ឬរដ្ឋាភិបាលថាជាអ្នកនៅពីក្រោយការបញ្ចេញរឿងអាស្រូវស្នេហារបស់ អ្នកនយោបាយម្នាក់។ ពិតមែនថាលោកមិនបាននិយាយចំឈ្មោះអ្នកនយោបាយរូបនោះ ក៏លោកនាយករដ្ឋមន្ត្រីទំនងសំដៅដល់ លោក កឹម សុខា ប្រធានស្ដីទីគណបក្សសង្គ្រោះជាតិ។ ចំណែកមន្ត្រីបក្សប្រឆាំងលើកឡើងថា ពួកគេកំពុងផ្ដោតអារម្មណ៍ទៅលើការបោះឆ្នោតក្នុងពេលខាងមុខ។
បើទោះបីជា លោក ហ៊ុន សែន មិនបានបញ្ជាក់ច្បាស់ថា នឹងវាយបកទៅកាន់អ្នកដែលចោទរដ្ឋាភិបាលនៅពីក្រោយការបញ្ចេញរឿង អាស្រូវស្នេហាពាក់ព័ន្ធនឹង លោក កឹម សុខា បែបណាក្តី ប៉ុន្តែ លោក ហ៊ុន សែន បញ្ជាក់ថា បើគេនៅតែបន្តចាត់ទុករឿងអាស្រូវស្នេហា ថាជារឿងនយោបាយ នោះរដ្ឋាភិបាលនឹងចាត់វិធានការមែនទែនតែម្តង។
លោក ហ៊ុន សែន ដែលមនុស្សមួយចំនួនចាត់ទុកជាបុរសខ្លាំងនៅកម្ពុជា ព្រមានថា ក្នុងករណីរដ្ឋាភិបាលលូកដៃចូលក្នុងរឿងនេះ គឺបក្សប្រឆាំងពិតជាពិបាកមិនអាចទប់រួចនោះទេ៖ «ដំបូងឆេះនៅឆ្ងាយ។ ឥឡូវឆេះជិតដល់ជើងរដ្ឋាភិបាលហើយ តែឆេះដល់ជើងរដ្ឋាភិបាល រដ្ឋាភិបាល ត្រូវរើ ប៉ុន្តែយ៉ាងណាក៏ដោយ តុលាការបានបញ្ជាមកនគរបាលធ្វើការហើយ អ្នកឯងចង់ឆ្លើយយ៉ាងម៉េចជារឿងរបស់អ្នកឯង ប៉ុន្តែភស្តុតាងផ្សេង អ្នកឯងថាមានប៉ាសស្ព័រ (Passport) ឥឡូវមានប៉ាសស្ព័រ ព្រោះអ្នកឯងទៅធ្វើប៉ាសស្ព័រ អ្នកឯងថាមិនដែលចេញក្រៅប្រទេស ប៉ុន្តែអ្នកឯងជិះបាងកក អ៊ែរវ៉េ (Bangkok Airway) ម៉ោងប៉ុណ្ណេះ ថ្ងៃប៉ុណ្ណេះ ទៅដេកនៅសណ្ឋាគារនេះ គេដឹងតើរឿងហ្នឹង និយាយឲ្យច្បាស់ៗដំបង កាន់តែរើកាន់តែងាប់។»
ការថ្លែងរបស់ លោក ហ៊ុន សែន បែបនេះ ទំនងជាលោកសំដៅទៅលើការចូលបំភ្លឺរបស់ កញ្ញា ខុម ចាន់តារាទី ហៅ ស្រីមុំ នៅចំពោះមុខអាជ្ញាធរក្រសួងមហាផ្ទៃ កាលពីពេលថ្មីៗនេះ ទាក់ទងនឹងរឿងអាស្រូវស្នេហារវាងនាង និងលោក កឹម សុខា។ កញ្ញា ខុម ចាន់តារាទី បដិសេធថា នាងមិនបានជាប់ពាក់ព័ន្ធស្នេហាជាមួយ លោក កឹម សុខា ឡើយ។
នេះជាលើកទី១ ដែល លោក ហ៊ុន សែន ចេញមុខនិយាយជាសាធារណៈអំពីរឿងអាស្រូវស្នេហារបស់ លោក កឹម សុខា ចាប់តាំងពីរឿងនេះបានផ្ទុះជាងកន្លះខែរួចមក។
លោក ហ៊ុន សែន ដែលជឿជាក់ថាសំឡេងឆ្លើយឆ្លងគ្នាក្នុងខ្សែអាត់ជារបស់ លោក កឹម សុខា ថ្លែងថា លោក កឹម សុខា មិនអាចលាក់កំបាំងរឿងអាស្រូវស្នេហានេះបានឡើយ។ លោក ហ៊ុន សែន ថែមទាំងថ្លែងឌឺដងទៅកាន់បក្សប្រឆាំងថា យុទ្ធសាស្ត្រ៣ មិន ១ រាយការណ៍ដែល លោក ហ៊ុន សែន សំដៅលើយុទ្ធសាស្ត្រ មិនឆ្លើយ មិនឆ្លង មិនឈ្លោះ ដែលបក្សប្រឆាំងកំពុងប្រកាន់យកពេលនេះ អាចអនុវត្តបានតែក្នុងទសវត្សរ៍ទី៨០ ដើម្បីប្រឆាំងក្រុមខ្មែរក្រហមប៉ុណ្ណោះ ប៉ុន្តែមិនអាចយកមកប្រើដើម្បីលាក់បាំងបញ្ហាអាស្រូវផ្លូវភេទបាន ឡើយ៖ «បោកគេបោកឯងសម័យនេះវាហួសហើយ សូម្បីតែព្រលានយន្តហោះបាងកក ព្រលានយន្តហោះភ្នំពេញ គេថតមនុស្សទុកតើ សណ្ឋាគារមួយៗគេមានប្រដាប់ថតរបស់គេតើ។ ៣ មិន ១ រាយការណ៍ អាហ្នឹងយុទ្ធសាស្ត្រការពារភូមិ-ឃុំកាលពីសម័យរដ្ឋកម្ពុជា ប្រឆាំងនឹងការចូលវាយឆ្មក់របស់ពួកខ្មែរក្រហមទេ ប៉ុន្តែមិនអាចប្រើនៅក្នុងសតវត្សរ៍ ២១ បានទេ។»
ក្នុងកិច្ចប្រជុំរបស់ថ្នាក់ដឹកនាំគណបក្សសង្គ្រោះជាតិ នៅទីក្រុងម៉ានីល (Manila) ប្រទេសហ្វីលីពីន (Philippines) កាល ពីថ្ងៃទី១៥ មីនា គណបក្សសង្គ្រោះជាតិ នៅតែរក្សាជំហរថា មិនឆ្លើយ មិនឆ្លង និងមិនឈ្លោះ ហើយផ្ដោតតែទៅលើការបោះឆ្នោតប៉ុណ្ណោះ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍នៅថ្ងៃទី១៧ មីនា ថា គណបក្សមិនប្រតិកម្មទៅនឹងអ្វីដែលមិនមែនជាប្រយោជន៍របស់ប្រទេស ជាតិនោះទេ។ ចំពោះការព្រមានវាយបករបស់ លោក ហ៊ុន សែន វិញ លោក យឹម សុវណ្ណ មានប្រសាសន៍ថា លោកមិនដឹងថា តើ លោក ហ៊ុន សែន ចង់សំដៅទៅលើអ្វីនោះទេ?៖ «ប៉ុន្តែមកទល់ពេលនេះ អ្វីដែលបក្សប្រឆាំងកំពុងធ្វើ គឺ យើងខិតខំធ្វើដើម្បីឈានទៅរកការបោះឆ្នោត។ យើងត្រូវជំរុញពលរដ្ឋចុះឈ្មោះបោះឆ្នោត។ យើងត្រូវរៀបចំធ្វើម៉េចឲ្យពលរដ្ឋមានឯកសារគ្រប់គ្រាន់។ យើងត្រូវរៀបចំសារនយោបាយ គោលនយោបាយ។ យើងត្រូវរៀបចំរចនាសម្ព័ន្ធ ដើម្បីឈានទៅរកការបោះឆ្នោតឃុំឆ្នាំ២០១៧ និងការបោះឆ្នោតជាតិឆ្នាំ២០១៨។»
ជុំវិញរឿងអាស្រូវស្នេហារបស់ លោក កឹម សុខា នេះ អ្នកតាមដានព្រឹត្តិការណ៍នយោបាយនៅកម្ពុជា មើលឃើញថា ត្រូវបានគេបង្កើតឡើងដើម្បីបង្វែរការយកចិត្តទុកដាក់របស់ពលរដ្ឋ ខ្មែរទៅលើរឿងរ៉ាវធំៗរបស់ប្រទេសជាតិប៉ុណ្ណោះ ជាពិសេសគឺធ្វើឲ្យបក្សប្រឆាំងធ្លាក់ប្រជាប្រិយភាពក្នុងការបោះឆ្នោត ខាងមុខ៕
No comments:
Post a Comment