១៥-មិថុនា-២០១១៖ លោកនាយករដ្ឋមន្ត្រី ហ៊ុន សែន ថ្លែងក្នុងឱកាសចែកសញ្ញាបត្រដល់និស្សិតនៅសាកលវិទ្យាល័យវិទ្យាសាស្ត្រសុខាភិបាល រាជធានីភ្នំពេញ។
នាយក រដ្ឋមន្ត្រី អំពាវនាវ ឲ្យរក្សាស្ថិរភាព និងបញ្ចៀស ហិង្សា ក្នុងសង្គម
ដោយ ម៉ម មុនីរតន៍ / អាស៊ីសេរី | ១៧ កុម្ភៈ ២០១៤
លោកនាយករដ្ឋមន្ត្រី ហ៊ុន សែន បានអំពាវនាវឲ្យបញ្ចៀសការប្រើអំពើហិង្សា ឬបង្កាត់ភ្លើងអុជអាលនៅក្នុងសង្គម ក្នុងន័យដើម្បីហេតុផលអ្វីមួយសម្រាប់ប្រយោជន៍ផ្ទាល់ខ្លួន ឬគណបក្សម្ខាង។
សារនយោបាយរបស់លោក ហ៊ុន សែន ដែលមិនសំដៅលើបក្សនយោបាយ ឬភាគីពាក់ព័ន្ធណាមួយនោះ គឺលោក ហ៊ុន សែន មិនចង់ឲ្យសន្តិភាពផ្នែកនយោបាយដែលមានជាង ៣០ឆ្នាំមកនេះ ត្រូវបាត់បង់ទៅវិញដោយទទេៗ ហើយសន្តិភាពនេះ អាចបន្តដំណើរទៅមុខទៀត ដោយភាពសុខសាន្ត។
លោក ហ៊ុន សែន ចាត់ទុកថា ការប៉ុនប៉ងធ្វើឲ្យសន្តិភាពដែលមានរូបរាងអស់រយៈពេលជាង ៣ទសវត្សមកនេះ ត្រូវបាត់បង់ទៅវិញ គឺជាការប្រឆាំងទៅនឹងឆន្ទៈ និងភាពសុខដុមរមនារបស់ប្រជាពលរដ្ឋនៅកម្ពុជា។
លោក ហ៊ុន សែន មានប្រសាសន៍ដោយមិនសំដៅចំឈ្មោះថា ការព្យាយាមធ្វើឲ្យសន្តិភាពត្រូវធ្លាក់ចុះ ឬស្ថិរភាពនយោបាយត្រូវក្រឡាប់ចាក់ នោះគឺជាការបំផ្លាញភាពសុខសាន្ត និងជីវភាពរស់នៅរបស់ប្រជាពលរដ្ឋកម្ពុជា។ ក្នុងន័យនេះ លោកនាយករដ្ឋមន្ត្រីបានអំពាវនាវឲ្យប្រជាពលរដ្ឋ និងភាគីពាក់ព័ន្ធ ដោយចាត់ទុកថា គឺជាផ្នែកមួយផងដែរនៃការរក្សាសន្តិភាពក្រៅពីរដ្ឋាភិបាល។
ការថ្លែងដូចនេះរបស់លោកនាយករដ្ឋមន្ត្រី ហ៊ុន សែន ធ្វើឡើងនៅក្នុងពិធីបិទវគ្គ និងចែកសញ្ញាបត្រនៃសាលាភូមិន្ទរដ្ឋបាល នៅថ្ងៃទី១៧ កុម្ភៈ។
សារនយោបាយរបស់លោក ហ៊ុន សែន ដែលជាមេដឹកនាំយូរជាងគេនៅក្នុងតំបន់អាស៊ីនេះ កើតឡើងនៅចំពេលដែលអ្នកនយោបាយថ្នាក់ក្រោម គ្រោងបើកកិច្ចពិគ្រោះយោបល់ដើម្បីទម្លាយភាពជាប់ដែលបានអូសបន្លាយជាងកន្លះឆ្នាំមកនេះ នៅថ្ងៃទី១៨ កុម្ភៈ។
មន្ត្រីអង្គការសង្គមស៊ីវិលដែលឃ្លាំមើលស្ថានការណ៍នយោបាយនៅកម្ពុជា ចាត់ទុកថា នេះទំនងជាលោក ហ៊ុន សែន ចង់បើកផ្លូវការចរចាទ្វេភាគីទាំងពីរនៅថ្ងៃអង្គារ មានបរិយាកាសល្អប្រសើរ។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា ថ្លែងថា នេះជាសញ្ញាវិជ្ជមានសម្រាប់ការចរចា ហើយក៏ជាការបន្ទន់ឥរិយាបថរបស់លោកនាយករដ្ឋមន្ត្រី ហ៊ុន សែន។ លោកបន្តថា ជាទម្លាប់នៅពេលណាដែលលោក ហ៊ុន សែន ចង់បញ្ចប់បញ្ហា តែងអនុវត្តគោលនយោបាយបែបនេះ។ ទោះជាបែបណា លោក អ៊ូ វីរៈ ឲ្យដឹងថា អ្វីដែលអ្នកនយោបាយសម្រេចក្នុងន័យដើម្បីបុព្វហេតុជាតិ និងតម្កល់ផលប្រយោជន៍របស់ពលរដ្ឋជាចម្បង គឺជាយន្តការដ៏ប្រសើរ។
យ៉ាងណាក៏ដោយ បើទោះជាលោក ហ៊ុន សែន រិះគន់ដោយពុំបានថ្លែងដោយចំឈ្មោះគណបក្សនយោបាយ ឬក្រុមណាមួយ តែគេដឹងថា នោះទំនងជាលោកនាយករដ្ឋមន្ត្រី ហ៊ុន សែន ចង់សំដៅបក្សប្រឆាំង និងសហជីព។ ព្រោះក្នុងពេលកន្លងទៅនេះ ទាំងបក្សសង្គ្រោះជាតិ និងក្រុមកម្មករបានផ្ទុះបាតុកម្មអហិង្សាជាបន្តបន្ទាប់ ដើម្បីទាមទារដំឡើងប្រាក់ខែគោល ១៦០ដុល្លារ និងការបោះឆ្នោតឡើងវិញ ឬទាមទារឲ្យរាប់សន្លឹកឆ្នោតជាដើម។
បើទោះជាមានការចោទប្រកាន់យ៉ាងនេះក្ដី ទាំងគណបក្សសង្គ្រោះជាតិ និងបណ្ដាញសម្ព័ន្ធសហជីព បានបដិសេធម្ដងជាពីរដងហើយថា ការទាមទារកន្លងទៅនេះ គឺពុំមានហិង្សាឡើយ តែផ្ទុយទៅវិញ ការបង្ក្រាបរបស់សមត្ថកិច្ចទេ ដែលជាហេតុផលនាំឲ្យមានហិង្សាកើតឡើង។
នេះពុំមែនទើបតែលើកទីមួយឡើយនៃការជួបចរចា។ គណបក្សនយោបាយទាំងពីរបានព្យាយាមម្ដងជាពីរដងរួចមកហើយ ទាំងថ្នាក់កំពូល និងគណៈកម្មការជំនាញ ប៉ុន្តែលទ្ធផលនៅតែពុំអាចទៅរួច។ យ៉ាងណា លោក អ៊ូ វីរៈ គិតថា ការជួបចរចាលើកនេះ ទំនងជាភាគីទាំងពីរព្រមព្រៀងក្នុងកម្រិតមួយ។ ក៏ប៉ុន្តែលោកយល់ឃើញថា មធ្យោបាយដែលល្អប្រសើរ អ្នកនយោបាយទាំងពីរគប្បីសម្បទានគ្នាទៅវិញទៅមក ទើបជាច្រកចេញដ៏ល្អមួយ៕
ពងក្ដៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗៗ,,,,,,,,,,,,,,,,,,,,,,,,,,,,,,,,,,,,,,....................................................................................................................?????????????????????????????????????????????????????????????????????????????????
ReplyDelete