រដ្ឋមន្ត្រី ការបរទេស អូស្ត្រាលី ធ្វើទស្សនកិច្ចកម្ពុជា ចុងសប្ដាហ៍នេះ
ដោយ វោហារ ជាតិ / អាស៊ីសេរី | ១៧ កុម្ភៈ ២០១៤
រដ្ឋមន្ត្រី ក្រសួងការបរទេស អូស្ត្រាលី (Australia) អ្នកស្រី ជូលី ប៊ីហ្សប (Julie Bishop) នឹងអញ្ជើញមកធ្វើទស្សនកិច្ច កម្ពុជា នៅថ្ងៃ២១ និងថ្ងៃទី២២ កុម្ភៈ ចុងសប្ដាហ៍នេះ។
ក្រសួងការបរទេសកម្ពុជា បានចេញសេចក្ដីប្រកាសព័ត៌មានមួយនៅថ្ងៃទី១៧ កុម្ភៈ បានហៅទស្សនកិច្ចនេះថា ជាទស្សនកិច្ចការងារ ហើយអ្នកស្រីនឹងជួបលោកនាយករដ្ឋមន្ត្រី ហ៊ុន សែន លោក ស ខេង រដ្ឋមន្ត្រីក្រសួងមហាផ្ទៃ និងជួបលោក ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។
ចំណែកអ្នកស្រី ជូលី ប៊ីហ្សប បានសរសេរនៅក្នុងសសេចក្ដីប្រកាសព័ត៌មានរបស់ក្រសួងការបរទេសអូស្ត្រាលីថា ទស្សនកិច្ចនៅកម្ពុជា គឺជាដំណើរទស្សនកិច្ចរបស់អ្នកស្រីក្នុងបណ្ដាប្រទេសសមាជិកអាស៊ានដទៃទៀត ក្នុងកិច្ចគម្រប់ខួប ៤០ឆ្នាំ រវាងទំនាក់ទំនងអូស្ត្រាលីនិងអាស៊ាន។
ដោយឡែកចំពោះកម្ពុជាវិញ អ្នកស្រីបន្ថែមថា អ្នកស្រីនឹងជួបពិភាក្សាជាមួយមន្ត្រីជាន់ខ្ពស់មួយចំនួនដើម្បីពិភាក្សាទ្វេភាគីលើចំណុចគន្លឹះមួយចំនួនថែមទៀត ចំពោះកម្មវិធីជំនួយអភិវឌ្ឍរបស់អូស្ត្រាលីនៅកម្ពុជា៕
No comments:
Post a Comment