ព្រះសង្ឃ ១០អង្គ ត្រូវបណ្ដេញ មិនឲ្យ គង់ នៅក្នុងវត្តមួយ នាខេត្តបាត់ដំបង
ដោយ សួន សុផលមុន្នី / អាស៊ីសេរី | ០៨ មីនា ២០១៤
ការឈ្លោះប្រកែកយ៉ាងតឹងសរសៃកដាក់គ្នាដោយគ្មានលទ្ធផលមួយ បានកើតឡើងរវាងព្រះសង្ឃ ១០អង្គ ជាមួយនឹងព្រះចៅអធិការវត្តដំណាក់បេង អនុគណស្រុក រួមទាំងអាជ្ញាធរដែនដីមួយចំនួនទៀត។ អធិករណ៍នេះ កើតមានឡើងកាលពីរសៀលថ្ងៃទី៨ មីនា ក្នុងបរិវេណវត្តសុវណ្ណព្រឹក្សារតនារាម ហៅ វត្តដំណាក់បេង ឋិតភូមិដំណាក់បេង ឃុំបួរ ស្រុកភ្នំព្រឹក ខេត្តបាត់ដំបង។
ក្រោយពីព្រះសង្ឃព្រះនាម ពត ជីវន្ត និងលោកនេនចំនួន ៩អង្គផ្សេងទៀត បាននិមន្តទៅទីអារាមនោះ សុំឲ្យព្រះចៅអធិការវត្តសុវណ្ណព្រឹក្សារតនារាម និងអនុគណស្រុកភ្នំព្រឹក បញ្ជាក់ពីមូលហេតុនៃការបណ្ដេញព្រះសង្ឃទាំង ១០អង្គ មិនឲ្យស្នាក់នៅវត្ត ដោយសារកំហុសថយគោយន្តបណ្ដាលឲ្យប៉ះបាក់របងលោកយាយ សំ បន្តិចបន្តួចនៅក្នុងវត្ត៖ «សំឡេងឈ្មោះប្រកែកគ្នារបស់ព្រះសង្ឃ និងព្រះសង្ឃ»។
មន្ត្រីស៊ើបអង្កេតរបស់អង្គការសិទ្ធិមនុស្សលីកាដូ (Licadho) លោក ហេង សាយហុង ដែលបានចុះទៅដល់កន្លែងកើតហេតុ បញ្ជាក់ថា យ៉ាងហោចណាស់មានប្រជាពុទ្ធបរិស័ទជិត ២០០នាក់ បានចូលស្ដាប់នៅទីវត្តអារាមនោះដែរ។ អ្នកភូមិទាំងនោះ បានគាំទ្រព្រះសង្ឃទាំង ១០អង្គ អោយបន្តគង់នៅក្នុងវត្តជាបន្តទៀត ដោយសារជម្លោះស្ដាប់ប្រកែកគ្នាស្ដាប់លែងបាន ក៏មានការបំបែកគ្នា។ ចំណែកឯព្រះសង្ឃទាំង ១០អង្គ ក្រោយមកក៏បំបែកគ្នាទៅគង់នៅវត្តអារាមមួយក្នុងស្រុកបាណន់ ខេត្តបាត់ដំបង៕
No comments:
Post a Comment