ពលរដ្ឋ ឃាត់គ្រឿងចក្រក្រុមហ៊ុនចិន នៅខេត្តព្រះវិហារ (រូបថត៖ បូ សាវី)
ពលរដ្ឋ នៅព្រះវិហារ ឃាត់គ្រឿងចក្រ ក្រុមហ៊ុនចិន ជាថ្មីទៀត ដើម្បីឲ្យក្រុមហ៊ុន បង្ហាញឯកសារ
ដោយ៖ បូ សាវី / វីអូឌី | ថ្ងៃសុក្រ ទី28 ខែមិនា ឆ្នាំ2014
ប្រជាពលរដ្ឋជាង ២រយគ្រួសារ នៅស្រុកឆែប ខេត្ដព្រះវិហារ នៅព្រឹកថ្ងៃសុក្រ ឃាត់គ្រឿងចក្រ ក្រុមហ៊ុនចិន រូយ ហ្វេង ពីរគ្រឿង ដើម្បីទាមទារឲ្យអ្នកគ្រប់គ្រងក្រុមហ៊ុន បង្ហាញច្បាប់ធ្វើវិនិយោគ ដោយអះអាងថា ក្រុមហ៊ុននេះ ឈូសឆាយប៉ះពាល់ដីពួកគេ ដោយមិនមានដំណោះស្រាយ។
ពលរដ្ឋនៅភូមិសំបូរ ឃុំសង្កែពីរ ស្រុកឆែប លោក ផាវ យ៉ន ប្រាប់ VOD ថា ប្រជាពលរដ្ឋនៅឃុំសង្កែ១ និងឃុំសង្កែពីរ ប្រមាណជាង ២រយនាក់ បានប្រមូលផ្ដុំគ្នា រារាំងគ្រឿងចក្រក្រុមហ៊ុនចិនរូយ ហ្វេង មិនឲ្យឈូសឆាយដីបន្ដទៀត ដើម្បីជុំរុញអាជ្ញាធរ និងឲ្យអ្នកគ្រប់គ្រងក្រុមហ៊ុននេះ បង្ហាញច្បាប់ធ្វើវិនីយោគនៅតំបន់នោះ ប៉ុន្ដែក្រុមកម្មករគ្រឿងចក្របានគេចខ្លួន។ លោកថា ក្រុមហ៊ុនចិននេះបានឈូសឆាយប៉ះពាល់ដីអ្នកភូមិបម្រុងទុក និងចូលដីស្រែចំការពួកគាត់ រាប់រយហិកតា ដោយមិនមានដំណោះស្រាយដល់ពួកគេ។
ពលរដ្ឋមួយរូបទៀត នៅភូមិជោគជ័យ ឃុំសង្កែរពីរ លោក ដា រី ឲ្យដឹងថា អ្នកភូមិទាមទារឲ្យអាជ្ញាធរ ដកគ្រឿងចក្រក្រុមហ៊ុនចិនរូយ ហ្វេង នេះចេញពីតំបន់ដីទំនាស់នោះ និងឲ្យបង្ហាញពីព្រំប្រទល់ឲ្យបាននច្បាស់លាស់។ លោកថា ពលរដ្ឋបានសាកសួរអាជ្ញាធរ មូលដ្ឋាន តែអាជ្ញាធរ អះអាងថា ការឈូសឆាយដីនៅតំបន់នោះ មិនមានច្បាប់អនុញ្ញាតទេ។
VOD មិនអាចសុំបំភ្លឺពីអភិបាលស្រុកឆែប លោក អ៊ុង វុទ្ធី និងក្រុមហ៊ុនចិនរ៉ូយ ហ្វេងដើម្បីបំភ្លឺ ជុំវិញករណីនេះ បាននៅឡើយទេ ដោយលោកប្រាប់ថា ជាប់រវល់រៀបមង្គលការកូន។
យ៉ាងនេះក្ដី អ្នកសម្របសម្រួលសមាគមការពារសិទ្ធិមនុស្ស អាដហុក ខេត្ដព្រះវិហារ លោក ឡោ ចាន់ មានប្រសាសន៍ថា ទំនាស់ដីធ្លីនៅខេត្ដព្រះវិហារ ហាក់មានសន្ទុះកើនឡើងនៅដើមឆ្នាំ២០១៤នេះ។ លោកថា ពលរដ្ឋបានរកអន្ដរាគមន៍ជាបន្ដបន្ទាប់ ប៉ុន្ដែអាជ្ញាធរ មិនមានឆន្ទះដោះស្រាយ ដោយលើកហេតុផលថា ហួសដែនសមត្ថកិច្ច។
កាលពីថ្ងៃទី១០ ខែមីនា ឆ្នាំ២០១៤នេះ ពលរដ្ឋប្រមាណ ៥រយនាក់បានប្រមូលផ្ដុំគ្នា តវ៉ាប្រឆាំងនឹងគ្រឿងចក្រក្រុមហ៊ុនចិនរ៉ូយ ហ្វេង ដើម្បីរកដំណោះស្រាយ ប៉ុន្ដែមកដល់ពេលនេះ គ្រឿងចក្រនេះ នៅបន្ដធ្វើសកម្មភាពដដែល៕
No comments:
Post a Comment