ប្រជាពលរដ្ឋតវ៉ានៅមុខសាលាខេត្តប៉ៃលិន នៅព្រឹកថ្ងៃពុធនេះ(រូបថតដោយទឹម គីម)
ពលរដ្ឋ នៅខេត្តប៉ៃលិន តវ៉ា សុំដំណោះស្រាយ ពី សាលាខេត្ត ករណីបណ្តេញចេញ
ដោយ៖ ទឹម គីម និងឡុង គីមម៉ារីតា / វីអូឌី | ថ្ងៃពុធ ទី19 ខែមិនា ឆ្នាំ2014
តំណាងប្រជាពលរដ្ឋ ៦នាក់ ក្នុងចំណោម ៤៥នាក់ នៅព្រឹកថ្ងៃពុធនេះ ប្រមូលផ្តុំនៅមុខសាលាខេត្តប៉ៃលិន ដើម្បីដាក់ញាត្តិ ទាមទារ ឲ្យអាជ្ញាធរ ផ្ដល់ជាសំណង ឬរកទីកន្លែងថ្មី សម្រាប់ពួកគាត់ ករណីរឿងដីធ្លី។
អ្នកស្រី អោម សំអាត់ អាយុ ៤៤ ឆ្នាំ មានប្រសាសន៍ថា តំណាងប្រជាពលរដ្ឋឃុំស្ទឹងត្រង់៦នាក់ បានចូលដាក់ញត្តិនៅសាលាខេត្តប៉ៃលិន សុំដំណោះស្រាយបញ្ហាជូនប្រជាពលរដ្ឋ នៅម៉ោងប្រមាណ១១ព្រឹកថ្ងៃពុធនេះ។ អ្នកស្រីបន្តថា មន្ត្រីសាលាខេត្ត បានចេញទទួលញត្តិពីតំណាងប្រជាពលរដ្ឋ ដោយសន្យាថា នឹងដោះស្រាយ ប៉ុន្តែត្រូវប្រើរយៈពេលយូរបន្តិច។
អ្នកតវ៉ាឲ្យដឹងថា ប្រជាពលរដ្ឋប្រមាណ១១៨គ្រួសារ រងការបណ្តេញចេញពីភូមិក្រឹង ឃុំស្ទឹងត្រង់ ស្រុកសាលាក្រៅ ខេត្តប៉ៃលិន តាំងពីឆ្នាំ២០០៦។ពលរដ្ឋថា កាលពីឆ្នាំ២០០០ ប្រជាពលរដ្ឋបានទទួលដីពីមេភូមិមួយចំនួន ដើម្បីរស់នៅ និងប្រកបរបរចិញ្ចឹមជីវិត។
កាលពីថ្ងៃទី១ខែមីនា អាជ្ញាធរស្រុកស្រាលាក្រៅខេត្តប៉ៃលិន បានបញ្ជាឲ្យប្រជាពលរដ្ឋ១៩ គ្រួសាររុះរើផ្ទះដោយអះអាងថា ផ្ទះទាំងនោះសង់នៅលើដីជាកម្មសិទ្ធិរបស់រដ្ឋ។ប្រជាពលរដ្ឋ ឲ្យដឹងថា អភិបាលស្រុករសាលាក្រៅ ខេត្តប៉ៃលិន បានបញ្ជាឲ្យប្រជាពលរដ្ឋរុះរើផ្ទះចេញពីដីនៅទីនោះ តែប្រជាពលរដ្ឋមិនព្រម។ ប្រជាពលរដ្ឋបន្តថា ពួកគេនឹងមិនចាកចេញពីទីនោះទេ ព្រោះដីនោះ ពួកគេបានរស់នៅច្រើនឆ្នាំហើយ ប្រសិនបើអាជ្ញាធរដេញប្រជាពលរដ្ឋចេញ ត្រូវរកទីកន្លែងថ្មីសម្រាប់ពួកគេ៕
No comments:
Post a Comment