លោក អាត់ ធន់ ប្រធានសហភាពការងារកម្ពុជា ក្នុងសិក្ខាសាលាមួយ នាពេលកន្លងមក (រូបថត៖ តាំង វីដា)
សហព័ន្ធសហជីព និងសមាគម ចំនួន១៨ ប្រកាន់ជំហរ ក្នុងការដឹកនាំ កម្មករ ធ្វើកូដកម្ម ចាប់ពីថ្ងៃទី១២-១៥
ដោយ៖ កាន់ វិច្ឆិកា / វីអូឌី | ថ្ងៃចន្ទ ទី10 ខែមិនា ឆ្នាំ2014
សហព័ន្ធសហជីព និងសមាគមចំនួន១៨ នៅតែប្រកាន់ជំហរ ក្នុងការដឹកនាំកម្មករធ្វើកូដកម្ម ចាប់ពីថ្ងៃទី១២-១៥ខែមីនាខាងមុខនេះ ដើម្បីទាមទារប្រាក់ឈ្នួល១៦០ដុល្លារ ក្នុងមួយខែ។
ប្រធានសហភាពការងារកម្ពុជា លោក អាត់ ធន់ ប្រាប់ VOD នៅព្រឹកថ្ងៃចន្ទនេះថា សហព័ន្ធសហជីព និងសមាគមទាំង១៨ នៅតែប្រកាន់ជំហរក្នុងការធ្វើកូដកម្មមិនធ្វើការក្នុងថ្ងៃទី១២ ខែមីនាដដែល។ លោកបន្តថាកូដកម្មនេះ គឺតម្រូវឲ្យកម្មករឈប់ធ្វើការចាប់ពីព្រឹកថ្ងៃទី ១២ ដល់ ១៥ ខែមីនា ដើម្បីទាមទារប្រាក់ឈ្នួលគោល ១៦០ដុល្លារ ក្នុងមួយខែ។
លោក អាត់ ធន់ ក៏បានបន្ថែមដែរថា នៅរសៀលនេះ សហព័ន្ធសហជីព និងសមាគមទាំង១៨ នឹងជួបពិភាក្សា ដើម្បីសម្រេចថានឹងត្រូវធ្វើយ៉ាងណាឲ្យកូដកម្មនោះ ដំណើរការទៅបានល្អ។
បុគ្គលិកផ្នែកច្បាប់របស់សហព័ន្ធសហជីពសេរីកម្មករនៃព្រះរាជាណាចក្រកម្ពុជា លោក យ៉ាន់ រ័ត្នកែវពិសី មានប្រសាសន៍ថា កម្មករប្រហែលជា២ទៅ៣ម៉ឺននាក់ នឹងចូលរួមក្នុងការធ្វើកូដកម្មនោះ ដោយអ្នកខ្លះនៅផ្ទះ មិនទៅធ្វើការ ហើយអ្នកខ្លះទៀតនឹងត្រលប់ទៅស្រុកកំណើតវិញ។
លោកបន្តថា ចំពោះការធ្វើកូដកម្មនេះ សហព័ន្ធសហជីព ក៏ដូចជាសមាគមទាំង១៨ បានដាក់លិខិតជូនដំណឹងទៅក្រសួងការងាររួចហើយ។
VOD មិនអាចទាក់ទងសុំការអធិប្បាយពីអ្នកនាំពាក្យក្រសួងការងារ លោក ហេង សួរ បានទេនៅព្រឹកថ្ងៃចន្ទនេះ។ កាលពីថ្ងៃទី៨ ខែមិនា ប្រធានសមាគមរោងចក្រកាត់ដេរកម្ពុជា លោក វ៉ាន់ ស៊ូអៀង លើកឡើងថា ការធ្វើកូដកម្មរបស់សហព័ន្ធសហជីព និងសមាគមចំនួន១៨ ជាសិទ្ធិរបស់ពួកគេ ហើយលោកមិនខ្វល់ពីការទាមទារប្រាក់ឈ្នួល១៦០ដុល្លារ សម្រាប់កម្មករនោះទេ តែលោកថា អ្វីដែលសំខាន់គឺត្រូវធ្វើតាមច្បាប់៕
No comments:
Post a Comment