រដ្ឋមន្ត្រីក្រសួងការងារ លោក អ៊ិត សំហេង ក្នុងពិធីសម្ពោធ និងផ្សព្វផ្សាយរបាយការណ៍ពីរ កាលពីព្រឹកមិញ (រូបថត៖ តាំង វីដា)
រដ្ឋមន្ត្រី ក្រសួងការងារ៖ បាតុកម្ម របស់ កម្មករ កើតឡើង ដោយសារគណបក្ស ប្រឆាំង និងសហជីព ទុច្ចរិត
ដោយ៖ តាំង វីដា / វីអូឌី | ថ្ងៃពុធ ទី12 ខែមិនា ឆ្នាំ2014
រដ្ឋមន្ត្រីក្រសួងការងារ នៅថ្ងៃពុធនេះ ចាត់ទុកថា ការធ្វើកូដកម្ម និងបាតុកម្ម ដែលកំពុងបង្អាក់ប្រតិបត្តិការពាណិជ្ជកម្ម បង្កផលប៉ះពាល់ដល់ក្រុមហ៊ុន និងវិស័យកាត់ដេរនៅកម្ពុជាសព្វថ្ងៃនេះ គឺបង្កើតឡើងដោយគណបក្សប្រឆាំង និងសហជីពមួយចំនួន ដែលស្ថិតក្រោមការបញ្ជារបស់អ្នកនយោបាយ។
ថ្លែងបន្ទាប់ពីពិធីសម្ពោធ និងផ្សព្វផ្សាយរបាយការណ៍ពីរ ដែលជាឯកសារគោលនយោបាយរបស់ សហព័ន្ធនិយោជក និងសមាគមពាណិជ្ជកម្មកម្ពុជា (CAMFEBA) និងរបាយការណ៍របស់អង្គការអន្តរជាតិខាងការងារ (ILO) រដ្ឋមន្ត្រីក្រសួងការងារ លោក អ៊ិត សំហេង ឲ្យដឹងថា បើទោះបីជា រដ្ឋាភិបាល បានកំពុងរៀបចំកិច្ចសន្ទនាត្រីភាគី ពាក់ព័ន្ធនឹងប្រាក់ឈ្នួលអប្បបរមារបស់កម្មករក្តី តែបាតុកម្មបិទផ្លូវ ការរាំងខ្ទប់ច្រកចេញចូលក្រុមហ៊ុន និងការបង្ខំកម្មករ ឲ្យឈប់ធ្វើការ ក្នុងរយៈពេលចុងក្រោយនេះ គឺភាគច្រើនកើតឡើងខុសច្បាប់ បង្កដោយក្រុមឱកាសនិយម និងសហជីពមួយចំនួនតូច ដែលមាននិន្នាការគាំទ្របក្សប្រឆាំង «វាមិនមែនជាកូដកម្ម បាតុកម្ម រឿងលក្ខ័ណ ការងារដាច់ដោយលែកទេ វាជាកញ្ចប់នយោបាយ ដោយបង្កើតឡើង ដោយគណបក្សប្រឆាំង ហើយនិងសហជីព របស់ពួកគេ បញ្ហានេះ គឺមិនអាចដោះស្រាយបានឆាប់ទេ ហើយវាត្រូវតែយកច្បាប់ មកអនុវត្តឲ្យបានត្រូវ ហើយកុំទៅគំរាម ធ្វើកូដកម្មស្អី នេះវាជារឿងមួយដែលមិនសមរម្យទេ ហើយការគំរាមបែបនេះ ខ្ញុំមើលទៅវាមានចរិកនយោបាយទេ ដើម្បីផលប្រយោជរបស់ក្រុមខ្លួន ដើម្បីគណបក្សនយោបាយរបស់ខ្លួន »។
លោក អ៊ិត សំហេង ក៏បានអំពាវនាវដល់សហជីព ដែលមានគម្រោងធ្វើបាតុកម្ម ត្រូវផ្តាច់ខ្លួនចេញពីគណបក្សនយោបាយ និងរង់ចាំយន្តការដោះស្រាយបញ្ហាប្រាក់ឈ្នួលនេះ ពីរដ្ឋាភិបាល ដើម្បីជៀសវាងបង្កអសន្តិសុខដល់វិនិយោគិន នាំឲ្យផលប៉ះពាល់កាន់តែធ្ងន់ធ្ងរលើវិស័យនេះ។
ក្រុមប្រឹក្សាភិបាលសហព័ន្ធនិយោជក និងសមាគមពាណិជ្ជកម្មកម្ពុជា លោក វ៉ាន់ ស៊ូអៀង ចាត់ទុកថា ការញុះញង់កម្មករធ្វើបាតុកម្ម រហូតឈានដល់ហិង្សា គឺបណ្តាលមកពីសហជីពទុច្ចរិត ដែលមានបក្សប្រឆាំងជាបង្អែក ហើយជាក់ស្តែងគឺកម្មកររងការគំរាម ពីសហជីពទាំងនោះ «១៥ឆ្នាំមកនិងកូដកម្មខុសច្បាប់រហូតឥតមាន violence មិចអញ្ចិងគិតមើល ១៥ឆ្នាំមុនមួយថ្ងៃមានកូដកម្មផ្តេសផ្តាស កូដកម្មខុសច្បាប់ហើយមានហិង្សាណាស់ មានរដ្ឋចេញកម្លាំងទៅធ្វើអីណា មកពីអាខែ១២និង ជាពិសេសគាត់ប្រើកម្លាំងនៅក្រោយមាននយោបាយ»។
ប្រធានសហភាពការងារកម្ពុជា លោក អាត់ ធន់ ដែលគ្រោងនឹងដឹកនាំកម្មករធ្វើកូដកម្មទាមទារប្រាក់ឈ្នួល ១៦០ដុល្លារ និងការដោះលែងជនជាប់ឃុំ២១នាក់ អះអាងថា ការទាមទាររបស់ខ្លួន គឺមិនជាប់ពាក់ព័ន្ធនឹងរឿននយោបាយឡើយ។ លោកថា រដ្ឋាភិបាល អាចពិសោធន៍បានលើករណីនេះ ដោយឆ្លើយតបនឹងតម្រូវរបស់កម្មករជាមុន និងរង់ចាំសង្កេតមើលថាតើសហជីពខ្លះណា ដែលពាក់ព័ន្ធនឹងគណបក្សនយោបាយ។
អ្នកនាំពាក្យសង្គ្រោះជាតិ លោក យឹម សុវណ្ណ ចាត់ទុកការចោទប្រកាន់នេះ ថាជាការមិនទទួលខុសត្រូវរបស់រដ្ឋាភិបាល ដឹកនាំដោយគណបក្សប្រជាជនកម្ពុជា ទៅលើតម្រូវការរបស់ប្រជាពលរដ្ឋ ជាពិសេសកម្មកររោងចក្រ។ លោកអះអាងថា គណបក្សសង្គ្រោះជាតិ មិនមានលទ្ធភាពបង្គាប់បញ្ជាដល់សហជីព ឬកម្មករ ធ្វើបាតុកម្មនោះទេ «កុំចង្អុលមុខទៅគណបក្សប្រឆាំង គណបក្សប្រឆាំងគ្មានឥទ្ធិពល គ្មានអីទៅប្រមែលប្រមូលកម្មករឲ្យទៅធ្វើបាតុកម្ម រាប់មឹននាក់ ដរាបណា មិនគណបក្សប្រជាជន មិនបានធ្វើអ្វីខុសចំពោះកម្មករ ហើយសំខាន់បំផុតដើម្បីដោះស្រាយបញ្ហានិងសំលឹងមើលពិភពលោករាប់រយប្រទេសទៅ កាលណាតែប្រាក់ខែគេហូបគ្រាប់គ្រាន់ហើយទោះជា ទេវតាទៅញុះញង់កម្មករឲ្យទៅធ្វើបាតុកម្មក៏ធ្វើមិនចេញដែរ »។
កាលពីថ្ងៃទី៨ ខែមីនា ក្នុងទិវានារីអន្តរជាតិ កម្លាំងសមត្ថកិច្ច ដឹកនាំដោយគណបក្សប្រជាជនកម្ពុជា បានរារាំងសហព័ន្ធសហជីព និងសមាគមចំនួន១៨ រៀបចំវេទិកាសាធារណៈ នៅលើទីលានប្រជាធិបតេយ្យ ដោយអះអាងថា ការទាមទារនោះ មិនមែនជាឆន្ទៈពិតរបស់កម្មករឡើយ ដោយសារមានអ្នកនយោបាយនៅពីក្រោយ។ ការលើកឡើងនោះ ស្របពេលដែលថ្នាក់ដឹកនាំគណបក្សសង្គ្រោះជាតិ លោក សម រង្ស៊ី និងលោក កឹម សុខា ក៏បានទៅកាន់បរិវេណជិតទីលានប្រជាធិបតេយ្យ និងប្រកាសជំហរគាំទ្រការតវ៉ារបស់កម្មករ និងថ្កោលទោសការររាំងរបស់អាជ្ញាធរផងដែរ៕
No comments:
Post a Comment