CNRP សើ្ន CPP ពន្លឿន ការបង្កើត សិក្ខាសាលារួមគ្នា ដើម្បី ទទួលអនុសាសន៍ លើ ការបោះឆ្នោត
ដោយ៖ ស៊ុន ណារិន / វីអូឌី | ថ្ងៃព្រហស្បតិ៍ ទី13 ខែមិនា ឆ្នាំ2014
គណបក្សសង្គ្រោះជាតិ នៅថ្ងៃព្រហស្បតិ៍នេះ ស្នើឲ្យគណបក្សប្រជាជនកម្ពុជា ពន្លឿនការបង្កើតសិក្ខាសាលារួមគ្នា ដើម្បីទទួលយោបល់អង្គការជាតិ និងអន្តរជាតិ ទៅលើកំណែទម្រង់ការបោះឆ្នោត។
សេចក្តីថ្លែងការណ៍របស់គណបក្សសង្គ្រោះជាតិ ឲ្យដឹងថា គណបក្សទាមទារឲ្យគណបក្សប្រជាជនកម្ពុជា បញ្ជាក់លទ្ធភាពនៃការរៀបចំសិក្ខាសាលាមួយរួមឲ្យបានឆាប់ ដើម្បីបើកទូលាយឲ្យមានការចូលរួមយោបល់ និងផ្តល់អនុសាសន៍ពីសំណាក់អ្នកជំនាញជាតិ និងអន្តរជាតិ សង្គមស៊ីវិល ដែលមានជំនាញលើការងារបោះឆ្នោត។
គណបក្សសង្គ្រោះជាតិ ក៏បានស្នើឲ្យគណបក្សប្រជាជនកម្ពុជា ឆ្លើយតបជាបន្ទាន់ ចំពោះសំណើទាមទារឲ្យ គ.ជ.ប ជាស្ថាប័នធម្មនុញ្ញ និងកំណត់ការជ្រើសតាំងសមាសភាព គ.ជ.ប មុននឹងបន្តកិច្ចប្រជុំថ្ងៃទី១៧ ខែមីនា។គណបក្សបញ្ជាក់ថា ប្រធានបទពាក់ព័ន្ធនឹងការកែទម្រង់ស្ថាប័នរៀបចំការបោះឆ្នោត ឲ្យទៅជាស្ថាប័នរដ្ឋធម្មនុញ្ញឯករាជ្យ និងមានការជ្រើសតាំងដោយរដ្ឋសភាតាមសំឡេងពីរភាគបី នៃសមាជិកសភាទាំងមូល គឺមានលក្ខណៈចាំបាច់ជាអាទិភាព សម្រាប់ការងារកែទម្រង់ការបោះឆ្នោត ដែលមិនអាចរំលងបាន។
សមាជិកគណៈកម្មការកែទម្រង់ការបោះឆ្នោតគណបក្សប្រជាជនកម្ពុជា លោក ជាម យៀប អះអាងថា មិនទាន់ទទួលបានលិខិតនេះនៅឡើយទេ ប៉ុន្តែគណបក្សនេះ នៅតែរក្សាជំហជួបចរចានៅថ្ងៃទី១៧ ខែមីនាខាងមុខនេះ។លោកបង្ហើបឲ្យដឹងថា ថ្នាក់ដឹកនាំកំពូលគណបក្សប្រជាជនកម្ពុជា មិនទាន់មានប្រតិកម្មតបចំពោះសំណើបែបណាឡើយ ដោយសារជាប់រវល់ការងារតាមមូលដ្ឋាន។
នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវ លោក ហង្ស ពុទ្ធា ផ្តល់ជាអនុសាសន៍ចំពោះភាពមិនចុះសម្រុងនេះ ដោយស្នើគណបក្សទាំងពីរ គប្បីពិចារណាបង្កើតគណៈកម្មការមួយឯករាជ្យ ដើម្បីជ្រើសតាំង គជប អព្យាក្រឹត្យមួយ ស្របតាមគោលការណ៍រដ្ឋធម្មនុញ្ញ។
កាលពីថ្ងៃទី១០ ខែមីនា គណៈកម្មការចម្រុះបក្សទាំងពីរ បានពិភាក្សាលើចំណុចពីរ ក្នុងនោះគណបក្សប្រជាជនកម្ពុជា ទាមទារការពិនិត្យអព្យាក្រឹត្យភាព និងឯករាជ្យភាពអង្គការសង្គមស៊ីវិល ចំណែកគណបក្សសង្គ្រោះជាតិ ទាមទារការប្តូរសមាសភាព គជប និងដាក់ជាស្ថាប័នធម្មនុញ្ញ៕
No comments:
Post a Comment