តារាភាពយន្ត អង់គ្លេស មកកម្ពុជា ផលិតភាពយន្តខ្លី ដើម្បី រៃអង្គាសប្រាក់ ជួយកុមារខ្មែរ ក្រីក្រ
តារាភាពយន្ត
និងជាតារាបង្ហាញម៉ូត សម្លៀកបំពាក់ ជនជាតិអង់គ្លេស អ្នកនាង រ៉ូស៊ី ហាន
ធិងថន វាយលី (Rosie Huntington-Whiteley) ជួបកុមារ ក្រីក្រ កម្ពុជា
កាលពីថ្ងៃពុធ ទី២ ខែមេសា ឆ្នាំ២០១៤។ Photo/ Rosie Huntington-Whiteley INSTAGRAM
តារាភាពយន្ត និងជាតារាបង្ហាញម៉ូត សម្លៀកបំពាក់ ជនជាតិអង់គ្លេស អ្នកនាង រ៉ូស៊ី ហាន ធិងថន វាយលី (Rosie Huntington-Whiteley) បានមកកម្ពុជា ដើម្បី ផលិត ឯកសារភាពយន្ត ខ្លីមួយ ស្តីអំពើ ស្ថានភាពរស់នៅ របស់ កុមារក្រីក្រកម្ពុជា ដើម្បី រៃអង្គាសថវិកា ជួយកុមារក្រីក្រ ទាំងនោះ។ ភាពយន្ត ឯកសារនេះ នឹងចាក់បញ្ចាំង តាមស្ថានីយទូរទស្សន៍ នៃប្រទេសអង់គ្លេស ក្នុងការប្រកួត កីឡាបាល់ទាត់ រៃអង្គាស ថវិកាមួយ នៅខែមិថុនា ខាងមុខ។
តារាសម្ដែងភាពយន្តដ៏មានប្រជាប្រិយភាពរបស់អង់គ្លេស អ្នកនាង រ៉ូស៊ី ហាន ធិងថន វាយលី កាលពីថ្ងៃព្រហស្បតិ៍ ទី៣ មេសា បានសម្ដែងការឈឺចាប់ និងខ្លោចផ្សា នៅពេលអ្នកនាងបានជួបនឹងកុមារក្រីក្រកម្ពុជា មួយចំនួន និងបានសាកសួរឪពុកម្តាយពួកគេ។ អ្នកនាង រ៉ូស៊ី មានប្រសាសន៍ថា ការដែលអ្នកនាងឈឺចាប់បំផុតនោះ គឺនៅពេលបានស្តាប់រឿងរ៉ាវឈឺចាប់មួយ អំពីកុមារអាយុ ៦ខែម្នាក់បានស្លាប់ ដោយសារឪពុកម្តាយគ្មានថវិកាទិញថ្នាំពេទ្យ និងទឹកស្អាត សម្រាប់ព្យាបាលជំងឺ។
អ្នកនាងបន្តថា នេះជាបញ្ហាថវិកាបន្តិចបន្តួចសោះ ប៉ុន្តែបណ្ដាលឲ្យកុមារម្នាក់នោះបានបាត់បង់ជីវិត។ កត្តានេះហើយដែលបានជំរុញឲ្យអ្នកនាងគាំទ្រយុទ្ធនាការប្រកួតកីឡា បាល់ទាត់ ដើម្បីប្រមូលថវិកាជួយកុមារក្រីក្រដែលមានឈ្មោះថា Soccer Aid។
មន្ត្រីនាំពាក្យអង្គការយូនីសេហ្វ (UNICEF) អ្នកស្រី ដេនីស សេហ្វឺដ ចនសាន់ (Denise Shepherd Johnson) មានប្រសាសន៍ថា តារាភាពយន្ត និងជាតារាបង្ហាញម៉ូតសម្លៀកបំពាក់អង់គ្លេស រូបនេះ នឹងផលិតភាពយន្តឯកសារស្តីអំពីបញ្ហាសុខភាពរបស់កុមារក្រីក្រនៅតាម តំបន់ជនបទកម្ពុជា ដែលកំពុងជួបប្រទះបញ្ហាទឹកស្អាត អនាម័យ និងផលប៉ះពាល់ផ្សេងទៀត។ អ្នកស្រីបន្ថែមទៀតថា អង្គការយូនីសេហ្វ ចង់ឲ្យ អ្នកនាង រ៉ូស៊ី ហាន ធិងថន វាយលី ស្វែងយល់ពីផលវិបាករបស់កុមាររស់នៅតាមតំបន់ជនបទ ដែលមិនទាន់ទទួលបានសេវាសង្គម ហើយចង់ប្រែក្លាយស្ថានភាពរបស់កុមារនៅតាមជនបទ ឲ្យមានស្ថានភាពល្អប្រសើរដូចកុមារនៅទីក្រុង។
អ្នកស្រី ដេនីស សេហ្វឺដ ចនសាន់៖ «អ្វីដែលយើងចាប់អារម្មណ៍នោះ គឺយើងចង់ផ្តល់សេវាសង្គមទាំងឡាយណាដែលកុមារត្រូវការចាំបាច់ទៅ ឲ្យពួកគេ។ យើងចង់ធានាថា កុមារទាំងនោះអាចទៅសាលារៀន ទទួលសេវាកម្មសុខភាព ឬក៏លិខិតសំបុត្រកំណើត។ យើងចង់ឃើញសុបិនកុមារទាំងនោះក្លាយជាការពិត។ យើងក៏ចង់ឃើញថា សិទ្ធិកុមារទាំងនោះត្រូវបានគោរព ហើយយើងនឹងធ្វើអ្វីៗទាំងអស់ ដើម្បីឲ្យមានការគោរពសិទ្ធិមនុស្ស។»
អ្នកស្រីបន្តថា ដំណើរតារាភាពយន្តអង់គ្លេស អ្នកនាង រ៉ូស៊ី ហាន ធិងថន វាយលី មកកម្ពុជា នឹងអាចទាក់ទាញការចាប់អារម្មណ៍ពីពលរដ្ឋអង់គ្លេស ចំពោះបញ្ហាទាំងឡាយដែលកុមារកម្ពុជា កំពុងជួបប្រទះ ហើយពួកគេអាចផ្តល់ថវិកាជួយដល់កុមារទាំងនោះ៖ «ដោយសារតែអ្នកនាង មានអ្នកគាំទ្រនៅលើទំព័រថ្វីតធឺ (twitter) ប្រមាណ ១លាន ៩សែននាក់។ នេះជាឱកាសល្អមួយសម្រាប់លើកកម្ពស់ការស្វែងយល់ពីផលវិបាកមួយ ចំនួន ដែលកម្ពុជា កំពុងជួបប្រទះ ហើយសំខាន់ជាងនេះទៅទៀត គឺដើម្បីផ្តល់មធ្យោបាយដល់សប្បុរសជន ឲ្យជួយដល់កុមារកម្ពុជា ដើម្បីធានាសិទ្ធិកុមារត្រូវបានគោរព។»
មន្ត្រីនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន មានប្រសាសន៍កាលពីថ្ងៃទី៣ មេសា ថា រដ្ឋាភិបាលកំពុងព្យាយាមកែលំអបញ្ហាខ្វះខាតមួយចំនួន ដែលកុមារនៅតាមតំបន់ជនបទកំពុងជួបប្រទះ។ ទោះបីជាយ៉ាងក៏ដោយ លោកបដិសេធការលើកឡើងរបស់តារាភាពយន្តអង់គ្លេស អ្នកនាង រ៉ូស៊ី ដែលថា កុមារកម្ពុជា ស្លាប់ដោយសារគ្មានថវិកាព្យាបាលជំងឺ៖ «រាជរដ្ឋាភិបាល បានធ្វើជាបណ្ដើរៗ ដូចជាចំណាត់ការដ៏មានប្រសិទ្ធភាពមួយ ដូចជាពលរដ្ឋដែលក្រទទួលបានសេវាសុខភាពដោយឥតគិតថ្លៃ។»
ក្នុងទិវាទឹកពិភពលោកសម្រាប់ឆ្នាំ២០១៤ កាលពីខែមីនា អង្គការយូនីសេហ្វ បានផ្សាយរបាយការណ៍មួយបង្ហាញថា ប្រជាពលរដ្ឋកម្ពុជា ៦លាន ៣សែននាក់ នៅពុំទាន់មានទឹកស្អាតប្រើប្រាស់ និងអនាម័យជាមូលដ្ឋាននៅឡើយ បើទោះជាមហាសន្និបាតអង្គការសហប្រជាជាតិ កាលពី ៤ឆ្នាំមុនបានកំណត់ថា ពលរដ្ឋគ្រប់រូបត្រូវទទួលបានទឹកស្អាត និងអនាម័យមូលដ្ឋាន ដែលជាសិទ្ធិមូលដ្ឋានរបស់ពួកគេក៏ដោយ។
អង្គការយូនីសេហ្វ បន្តថា ប្រជាពលរដ្ឋនៅកម្ពុជា ប្រមាណ ៣លាន ៩សែននាក់ ដែលខ្វះទឹកស្អាតសម្រាប់បរិភោគ គឺជាប្រជាជនក្រីក្ររស់នៅតាមតំបន់ជនបទ។ ការខ្វះទឹកស្អាតប្រើប្រាស់ និងអនាម័យមូលដ្ឋាននេះ បានធ្វើឲ្យកុមារដែលមានចំនួន ៤១ភាគរយនៃប្រជាពលរដ្ឋសរុប ប្រឈមនឹងការឆ្លងនូវជំងឺផ្សេងៗដែលចម្លងតាមទឹក។ ការខ្វះទឹកស្អាត និងអនាម័យ ជាបញ្ហានាំឱ្យមានការបាត់បង់ជីវិតមនុស្ស និងប្រាក់កាស។ បញ្ហានេះ បណ្ដាលឲ្យរដ្ឋាភិបាលកម្ពុជា ខាតបង់ទឹកប្រាក់ប្រមាណ ១៤៦លានដុល្លារជារៀងរាល់ឆ្នាំ៕
No comments:
Post a Comment