សមាជិក ព្រឹទ្ធសភា ១១រូប របស់ បក្ស សម រង្ស៊ី មិនចូលរួម ប្រជុំវិសាមញ្ញ នៅថ្ងៃ ១១ មេសា
ដោយ ដែន អយុធ្យា / RFA | 11 April 2014
លោក គង់ គាំ ប្រធាន គណបក្ស សម រង្ស៊ី ថ្លែង ក្នុងមហាបាតុកម្ម
ដើម្បី ទាមទារ ឲ្យគណៈកម្មាធិការជាតិ រៀបចំការបោះឆ្នោត (គ.ជ.ប.)
កែទម្រង់ ការបោះឆ្នោត ជ្រើសរើស តំណាងរាស្ត្រ អាណត្តិ ទី៥
កាលពីថ្ងៃ ទី២៥ មេសា ឆ្នាំ២០១៣។ RFA/Den Ayuthyea
សមាជិក ព្រឹទ្ធសភា ចំនួន ១១រូប របស់ គណបក្ស សម រង្ស៊ី ធ្វើពហិការ មិនចូលរួម ប្រជុំវិសាមញ្ញ ដើម្បី ពិនិត្យផ្តល់យោបល់ ទៅលើច្បាប់ មួយចំនួន ដែលបញ្ជូន ដោយរដ្ឋសភា ឯកបក្ស នីតិកាល ទី៥ នោះទេ នៅព្រឹកថ្ងៃសុក្រ ទី១១ ខែមេសា។ ប៉ុន្តែ មន្ត្រី គណបក្ស ប្រជាជនកម្ពុជា ថ្លែងថា, ការមិនចូលរួម ប្រជុំ របស់ សមាជិកព្រឹទ្ធសភា គណបក្ស សម រង្ស៊ី មិនរាំងស្ទះ ដល់ដំណើរការ ព្រឹទ្ធសភាទេ។
លោក គង់ គាំ ប្រធានគណបក្ស សម រង្ស៊ី មានប្រសាសន៍ថា មូលហេតុដែលសមាជិកព្រឹទ្ធសភាគណបក្ស សម រង្ស៊ី ទាំង ១១រូប មិនចូលរួមប្រជុំវិសាមញ្ញ ព្រោះយល់ថា ច្បាប់ដែលរដ្ឋសភាបញ្ជូនមកព្រឹទ្ធសភាពិនិត្យ និងផ្តល់យោបល់ពេលនេះមិនត្រឹមត្រូវទេ។ លោកស្នើសមាជិករដ្ឋសភាពីគណបក្សប្រជាជនកម្ពុជា ត្រូវបញ្ឈប់សកម្មភាពសម្រេចកិច្ចការ ឬបញ្ហាប្រទេសជាតិធំៗ ដោយមិនស្របច្បាប់ ឬឯកបក្សជាបន្តទៀតនាថ្ងៃអនាគត៖ «ដូច្នេះយើង គ្រាន់តែសោកស្ដាយថា ការសម្រេចអនុម័តច្បាប់ក្នុងរយៈពេលដែលគ្មានក្រុមតំណាងរាស្ត្រ គណបក្សប្រឆាំង សង្គ្រោះជាតិ ស្នើតែពាក់កណ្ដាលរដ្ឋសភាអ៊ីចឹងហ្នឹង គឺវាខ្វះតម្លាភាព វាខ្វះគណនេយ្យភាព វាខ្វះការចូលរួម។ ដូច្នេះ វាមិនត្រឹមត្រូវ វាមិនធានាផលប្រយោជន៍របស់ប្រទេសជាតិ និងប្រជាពលរដ្ឋទេ។»
កាលពីថ្ងៃទី១០ ខែមេសា គណបក្ស សម រង្ស៊ី បានចេញសេចក្តីថ្លែងការណ៍មានចុះហត្ថលេខាសមាជិកព្រឹទ្ធសភាចំនួន ១១រូប ដោយបានទទូចដល់គណបក្សឈ្នះអាសនៈរដ្ឋសភានីតិកាលទី៥ កាលពីថ្ងៃទី២៨ ខែកក្កដា ឆ្នាំ២០១៣ ត្រូវពិភាក្សាគ្នាកែសម្រួលស្ថាប័នបោះឆ្នោត ឬ គ.ជ.ប និងឈានដល់រៀបចំការបោះឆ្នោតឡើងវិញ ដើម្បីផ្តល់យុត្តិធម៌ និងផ្តល់សិទ្ធិដល់ប្រជាពលរដ្ឋដែលប្រាថ្នាចង់បានការបោះឆ្នោតដ៏ ត្រឹមត្រូវនៅកម្ពុជា ឲ្យបានឆាប់។
បញ្ហានេះដែរ សមាជិកព្រឹទ្ធសភាគណបក្សប្រជាជនកម្ពុជា កាលពីថ្ងៃទី១០ ខែមេសា បានចេញសេចក្តីថ្លែងការណ៍ដោយចាត់ទុកការមិនចូលរួមប្រជុំរបស់ សមាជិកព្រឹទ្ធសភារបស់គណបក្ស សម រង្ស៊ី ថាមិនបានរាំងស្ទះដល់ដំណើរការព្រឹទ្ធសភាទេ ព្រោះព្រឹទ្ធសភាមានកូរ៉ុមគ្រប់ចំនួន។ របៀបវារៈដែលព្រឹទ្ធសភាបានលើកយកមកពិនិត្យ និងផ្តល់យោបល់នៅព្រឹកថ្ងៃទី១១ ខែមេសា រួមមាន ពិនិត្យផ្តល់យោបល់លើសេចក្តីព្រាងច្បាប់ស្ដីពីការទូទាត់ថវិកា រដ្ឋសម្រាប់ការគ្រប់គ្រងឆ្នាំ២០១២ ពិនិត្យផ្តល់យោបល់លើសេចក្តីព្រាងច្បាប់ស្ដីពីការអនុម័តយល់ព្រម លើពិធីសារស្ដីពីវិសោធនកម្ម លើកិច្ចព្រមព្រៀងរវាងកម្ពុជា និងវៀតណាម ស្ដីពីការជំរុញ និងការការពារវិនិយោគ និងពិនិត្យផ្តល់យោបល់លើសេចក្តីព្រាងច្បាប់ស្ដីពីផ្លូវថ្នល់។
ទោះយ៉ាងណា សេចក្តីថ្លែងការណ៍របស់គណបក្ស សម រង្ស៊ី បានស្នើដល់គណបក្សនយោបាយដែលឈ្នះអាសនៈសភានីតិកាលទី៥ ឲ្យតម្កល់ផលប្រយោជន៍ជាតិ និងប្រជាពលរដ្ឋជាធំ ឲ្យស្របតាមស្មារតីនៃកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ធ្វើជាគន្លឹះដើម្បីរក្សាស្ថិរភាព និងមានការអភិវឌ្ឍន៍ពិតប្រាកដនៅកម្ពុជា៕
No comments:
Post a Comment