លោក សម រង្ស៊ី និងលោក កឹម សុខា ប្រធាន និងអនុប្រធាន គណបក្ស សង្គ្រោះជាតិ
មេដឹកនាំ គណបក្ស សង្គ្រោះជាតិ ទាំងពីររូប មិនមានវត្តមាន ចូលរួម ពិធីខួប រម្លឹក ថ្ងៃ១៧ មេសា ទេ
រាជធានី ភ្នំពេញ៖ មេដឹកនាំ គណបក្ស សង្គ្រោះជាតិ ទាំងពីររូប មិនមាន វត្តមាន ចូលរួម ពិធីខួប រម្លឹក ថ្ងៃ១៧ មេសា ស្អែកនេះទេ ដោយសារតែ ពួកលោក កំពុងស្ថិត នៅក្រៅប្រទេស។ នេះ បើ តាមការអះអាង ពីលោក ម៉ៅ មុនីវណ្ណ ប្រធានស្តីទី គណៈកម្មការ ប្រតិបត្តិ របស់ គណបក្ស សង្គ្រោះជាតិ ដែលបានប្រាប់ ឱ្យដឹង នៅថ្ងៃ ទី១៦ មេសានេះ។ក្នុងពិធីជួបជុំ បង្សុកូល រាប់បាត្រ ឧទ្ទិសកុសល ជូនដល់វិញ្ញាណក្ខន្ធ អ្នកដែលបាត់បង់ជីវិត ក្នុងរបប ខ្មែរក្រហម នាព្រឹក ថ្ងៃព្រហស្បតិ៍ ទី១៧ មេសា នៅសារមន្ទីរ ឧក្រិដ្ឋកម្ម ប្រល័យពូជសាសន៍ ជើងឯក នឹងមិនមានវត្តមាន របស់ លោក សម រង្ស៊ី និងលោក កឹម សុខា ប្រធាន និងអនុប្រធាន គណបក្ស សង្គ្រោះជាតិ នោះទេ។
លោក ម៉ៅ មុនីវណ្ណបានឲ្យដឹងថា ទោះជាមិនមានមេបក្សទាំងពីរ តែគណបក្សសង្គ្រោះជាតិ នឹងរៀបចំពិធីជួបជុំ នៅជើងឯក តាមការគ្រោងទុក ក្រោមអធិបតីភាពលោក គង់ គាំ ទីប្រឹក្សានយោបាយជាន់ខ្ពស់របស់គណបក្សសង្គ្រោះជាតិ និងលោក អ៊ូ ច័ន្ទឫទ្ធិ ប្រធានស្តីទីគណបក្សសង្គ្រោះជាតិ ព្រមទាំងថ្នាក់ដឹកនាំជាច្រើនទៀតរបស់គណបក្សសង្គ្រោះជាតិ។
លោក ម៉ៅ មុនីវណ្ណ បានបន្តថា លោកសមរង្ស៊ី និងលោកកឹមសុខា ដែលកំពុងស្ថិតនៅក្រៅប្រទេស គ្រោងនឹងថ្លែងការណ៍ផ្ទាល់មាត់ មកចូលរួមក្នុងពិធីជួបជុំ នាព្រឹកថ្ងៃទី១៧មេសា តាមរយៈវិដេអូអ៊ិនថឺណេត កម្មវិធី Skype។
ពិធីជួបជុំ បង្សុកូល រាប់បាត្រ ឧទ្ទិសកុសល ជូនដល់វិញ្ញាណក្ខន្ធ អ្នកដែលបាត់បង់ជីវិត ក្នុងរបបខ្មែរក្រហម នឹងប្រព្រឹត្តទៅនៅសារមន្ទីរឧក្រិដ្ឋកម្មប្រល័យពូជសាសន៍ ជើងឯក នាព្រឹកព្រលឹម ថ្ងៃព្រហស្បតិ៍ ទី១៧មេសាស្អែកនេះ។ ថ្ងៃ១៧មេសា ឆ្នាំ១៩៧៥ ជាថ្ងៃខ្មែរក្រហម ឡើងកាន់អំណាច។ រយៈពេល ៣ ឆ្នាំ ៨ ខែ និង ២០ ថ្ងៃ រហូតដល់ថ្ងៃទី៧មករា ឆ្នាំ១៩៧៩ ត្រូវបានគេកត់ត្រាថា មានអ្នកបាត់បង់ជីវិតជិត ២ លាននាក់។
ក្រៅពីរម្លឹកដល់ថ្ងៃកាប់សម្លាប់មនុស្ស ក្នុងពេលខ្មែរក្រហមឡើងកាន់អំណាច ពិធីជួបជុំ នាថ្ងៃទី១៧មេសា ក៏ត្រូវបានលោក ម៉ៅ មុនីវណ្ណ បញ្ជាក់ថា គណបក្សសង្គ្រោះជាតិ ក៏ផ្ញើសារជំរុញឲ្យតុលាការ ចម្រុះ កាត់ទោសមេខ្មែរក្រហម បន្តដំណើរការកាត់ក្តី លើអតីតមេខ្មែរក្រហមបន្ថែមទៀត ដើម្បីផ្តល់យុត្តិធម៌ដល់វិញ្ញាណក្ខន្ធអ្នកស្លាប់ និងជនរងគ្រោះ ឲ្យទទួលបានយុត្តិធម៌។ ពោលគឺមិនមែនត្រឹមតែសំណុំរឿង០០១ និងសំណុំរឿង០០២ទេ តែតុលាការ ត្រូវបន្តដល់សំណុំរឿង០០៣ និង ០០៤ តទៅទៀត។
សំណុំរឿង០០៣ និង០០៤ ដែលមានជនជាប់ចោទជាអតីតមេខ្មែរក្រហម ៥ នាក់ផ្សេងទៀត កំពុងស្ថិតក្នុងភាព ចម្រូង ចម្រាស់។ ភាគីកម្ពុជា រាប់ចាប់នាយករដ្ឋមន្ត្រី រហូតដល់ចៅក្រម និងព្រះរាជអាជ្ញា មិនចង់ឲ្យសាលាក្តីខ្មែរក្រហម ចាត់ការលើសំណុំរឿង ០០៣ និង ០០៤ ទេ ដោយសំអាងលើការបែកបាក់សង្គម។ ប៉ុន្តែមកដល់ពេលនេះ សំណុំរឿងក្តី ០០៣ និង ០០៤ កំពុងដំណើរការស៊ើបអង្កេតជាសំងាត់នៅឡើយ៕
No comments:
Post a Comment