តំលៃសំបុត្ររថយន្តក្រុងក្រុមហ៊ុនកាពីតូលទេសចរណ៍ មានការឡើងថ្លៃ (រូបថត៖ ណាត សុភាព)
អ្នកដំណើរ ត្អូញត្អែរ ខណៈក្រុមហ៊ុនរថយន្តក្រុង ដំឡើងថ្លៃ ខុសពីធម្មតា
ដោយ៖ ណាត សុភាព | ថ្ងៃពុធ ទី2 ខែមេសា ឆ្នាំ2014
ក្រុមអ្នកដំណើរ នៅថ្ងៃពុធនេះ ត្អូញត្អែរ ដោយសារក្រុមហ៊ុនរថយន្តក្រុងមួយចំនួន បានដំឡើងថ្លៃខុសពីថ្ងៃធម្មតា ខណៈបុណ្យចូលឆ្នាំប្រពៃណីជាតិ ខិតជិតមកដល់នាពេលខាងមុខនេះ។ ការត្អូញត្អែរនេះ ធ្វើឡើងស្របពេលពលរដ្ឋខ្មែរជាប់ខ្សែចិន-វៀតណាម សម្រុកទៅស្រុកកំណើតដើម្បីសែនផ្នូរ ឬហៅថាឆេងម៉េងនោះ។
លោក ជា ជៀនសូរិយា ជាអ្នកដំណើរម្នាក់ប្រាប់ VOD នៅព្រឹកថ្ងៃពុធនេះថា តម្លៃសំបុត្រធ្វើដំណើរ ពីភ្នំពេញ ទៅខេត្តបាត់ដំបង ក្រុមហ៊ុន កាពីតូល លក់ធម្មតាចាប់ពី ២៧.០០០៛ ឬ២៨.០០០៛ ប៉ុណ្ណោះ តែនៅពេលនេះ បានឡើងថ្លៃដល់៣.២០០៛។ លោកត្អូញត្អែរពីការដំឡើងថ្លៃនេះ «គាត់ឡើងថ្លៃអញ្ចិងប្រជាជនគាត់ធ្វើដំណើរ ទៅណាមកណា ក៏ពិបាកដែល អញ្ចិងដូចផ្ទះខ្ញុំអញ្ចិង សមាជិកគ្រួសារច្រើនអញ្ចិង បើសិនជាចង់ទៅខេត្តអញ្ចិងម្តង ទាល់តែសំបុត្រឡាន ៦ ឬ ៧ សំបុត្រអញ្ចិង ដល់ពេលឡានឡើងថ្លៃអញ្ចិងត្រូវកាត់បន្ថយវិញ អ្នកខ្លះទៅ អ្នកខ្លះនៅផ្ទះ ឥតបានទៅទាំងអស់គ្នា ព្រោះតែឥឡូវមុនចូលឆ្នាំ១អាទិត្យ២អាទិត្យអញ្ចិង ត្រឹម ៣២០០០៛ តែបើសិនជាដល់ថ្ងៃចូលឆ្នាំ ឡើងដល់៤០០០០ហើយ»។
លោក វិជ្ជា ធ្វើដំណើរម្នាក់ទៀត ពីភ្នំពេញទៅក្រុងព្រះសីហនុ ដោយជិះរថយន្តក្រុងសូរិយា ស្នើឲ្យក្រុមហ៊ុនរក្សាថ្លៃឈ្នួលរថយន្តឲ្យដូចថ្ងៃធម្មតា ដើម្បីកុំឲ្យប៉ះពាល់ដល់ជីវភាពអ្នកដំណើរ «ពីភ្នំពេញទៅកំពង់សោម រាល់ដង ២០០០០៛ ឥឡូវ ២៤០០០៛ បាទសូមអំពាវនាវ ដល់ម្ចាស់ក្រុមហ៊ុនទាំងអស់ កុំឲ្យឡើងថ្លៃ ឡើងតំលៃថេរ ថោកសមរម្យទាំងអស់»។
ប៉ុន្តែប្រធានបែងចែករថយន្តរបស់ក្រុមហ៊ុនភ្នំពេញ-សូរិយា ដឹកជញ្ជូនអ្នកដំណើរ លោក វ៉ា ណារិន្ទ មានប្រសាសន៍ថា ក្រុមហ៊ុនឡើងថ្លៃពី ៣.០០០៛ ទៅ៥.០០០៛ មុនឬក្នុងថ្ងៃបុណ្យចូលឆ្នាំ ដើម្បីយកថ្លៃលើសនេះទូទាត់ជាមួយនឹងរថយន្តដែលចេញដំណើរត្រឡប់មកភ្នំពេញភាគច្រើនមិនមានភ្ញៀវ «អញ្ចិងយើងទូរទាត់អាទៅ អាមក គឺយើងត្រូវតែតម្លើងថ្លៃ បន្តិចហើយ ដើម្បីមានតុល្យភាព កុំឲ្យខាត បើយើងយកតំលៃធម្មតា យើងទៅ បើយើងមក ដឹងតែខាតតែម្តង ព្រោះមកវិញគាត់ឥតទាន់មកវិញ»។
ដោយឡែកនៅពេល សួរថា ជារៀងរាល់ឆ្នាំសាលារាជធានីតែងចេញសេចក្តីជូនដំណឹងទៅក្រុមហ៊ុនរថយន្តឈ្នួលទាំងអស់កុំឲ្យឡើងថ្លៃនោះ លោក វ៉ា ណារិន្ទ មិនបានឆ្លើយនឹងសំនួរនេះទេ។
អ្នកសម្របសម្រួលនៃបណ្តាញរួបរួម ដើម្បីគណនេយ្យភាពសង្គម នៅអាស៊ីបូព៌ា និងប៉ាស៊ីហ្វិក ប្រចាំកម្ពុជា លោក សន ជ័យ សោកស្តាយចំពោះវិធានការរបស់សាលារាជធានី ដែលមិនត្រូវបានអនុវត្តន៍ឲ្យសិទ្ធិភាព។ លោកយល់ថា ទំនងជាមានអំពើពុករលួយ ទើបតម្លៃសេវាដឹកជញ្ជូនអ្នកដំណើរចេះតែឡើងថ្លៃខុសពីថ្ងៃធម្មតាបែបនេះ «វាអាចពាក់ព័ន្ធនិងការសូកប៉ាន់ ជាពិសេសទោះមិនមានជាលុយកាកធំដុំ វាជាប្រភេទសម្ភារ វាជាប្រភេទអំណោយណាមួយ អញ្ចិងបានធ្វើឲ្យវិធានការនិង ហាក់បីដូចជាត្រូវបានបិទមាត់ ដោយអាជីករ ឬក៏ឈ្មួញដែរ ម៉ៅការនៅតាមបេនហ្នឹង»។
ប្រធានសហព័ន្ធនិស្សិតបញ្ញវន្តកម្ពុជា លោក ម៉ៅ ពិសេស បានចេញសេចក្តីអំពាវនាវ ថ្ងៃទី២ ខែមេសានេះថា ដល់អ្នករត់ម៉ូតូឌុប រត់រ៉ឺម៉កទេសចរណ៍ ឡានឈ្នួល និងឡានក្រុងទាំងអស់ កុំដំឡើងថ្លៃ ដឹកជញ្ជូនអ្នកដំណើរក្នុងឱកាសបុណ្យចូលឆ្នាំថ្មីប្រពៃណីយជាតិខ្មែរ នៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០១៤ ដោយសារឱកាសតែមួយគត់ សម្រាប់បងប្អូនខ្មែរ ជាពិសេស សិស្ស និស្សិត និងប្អូនកម្មករ កម្មការិនី ទៅជួបជុំសាច់ញាតិនៅស្រុកកំណើត។ VOD មិនអាចសុំការអត្ថាធិប្បាយពីអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានទេ នៅថ្ងៃពុធនេះ៕
No comments:
Post a Comment