អ្នក មានជម្លោះដីធ្លី នៅភ្នំពេញ ប្រមូលផ្តុំមុខសាលារាជធានី ជំរុញឲ្យអាជ្ញាធរដោះស្រាយករណីដីធ្លី
ដោយ៖ ជន ស្រីណុច | ថ្ងៃពុធ ទី2 ខែមេសា ឆ្នាំ2014
អ្នកមានជម្លោះដីធ្លី ជំរុញឲ្យសាលារាជធានី ដោះស្រាយករណីរបស់ពួកគាត់ឲ្យបានឆាប់ (រូបថត៖ ជន ស្រីណុច)
អ្នកមានជម្លោះដីធ្លីនៅរាជធានីភ្នំពេញប្រមាណ ៥០នាក់ ប្រមូលផ្តុំគ្នានៅមុខសាលារាជធានីភ្នំពេញ នៅព្រឹកថ្ងៃពុធនេះ ជំរុញឲ្យសាលារាជធានីពន្លឿនការដោះស្រាយបញ្ហាដីធ្លីរបស់ពួកគាត់ឲ្យបានឆាប់ ខណៈដែលពួកគាត់កំពុងជួបការលំបាកក្នុងជីវភាពរស់នៅ។ អ្នកមានជម្លោះដីធ្លីទាំងនោះ មានសហគមន៍បឹងកក់ អតីតអ្នកបឹងកក់ និងបុរីកីឡា។
អ្នកស្រី ទេព វណ្ណី តំណាងប្រជាសហគមន៍បឹងកក់ មានប្រសាសន៍ថា ជម្លោះដីធ្លីនៅសហគមន៍បឹងកក់ និងបុរីកីឡា បានអូសបន្លាយពេលជាច្រើនឆ្នាំមកហើយ នៅតែពុំមានដំណោះស្រាយ ហើយអាជ្ញាធរចេះតែពន្យាពេលដោះស្រាយរហូត ទើបពួកគាត់ទៅប្រមូលផ្តុំគ្នានៅមុខសាលារាជធានីភ្នំពេញ ជំរុញឲ្យអភិបាលរាជធានី ពន្លឿនការងារដោះស្រាយករណីដីធ្លីជូនប្រជាពលរដ្ឋឲ្យបានឆាប់។
ជាមួយគ្នានោះដែរ អ្នកស្រី ឆាយ គឹមហ៊ន តំណាងប្រជាពលរដ្ឋសហគមន៍បុរីកីឡា បន្ថែមថា ពួកគាត់ពេលនេះ កំពុងជួបការលំបាកក្នុងជីវភាពរស់នៅ ណាមួយរស់ក្បែរគំនរសំរាម ធ្វើឲ្យសុខភាពរបស់ពួកគាត់ធ្លាក់ទ្រុឌទ្រោមជារៀងរាល់ថ្ងៃ។
អ្នកស្រី ស្នើឲ្យអាជ្ញាធរដោះស្រាយវិវាទដីធ្លីនេះឲ្យបានឆាប់ ដើម្បីឲ្យពួកគាត់មានទីលំនៅសមស្របដូចពលរដ្ឋដទៃ។ នៅម៉ោងជាង ៩ព្រឹកនេះ មន្ត្រីសាលារាជធានីភ្នំពេញ បានអញ្ជើញតំណាងសហគមន៍ទាំងបីនេះ ចំនួន ២៥នាក់ ដើម្បីចូលជួប។
កន្លងមក អ្នកបុរីកីឡា ធ្លាប់បានដាក់ញត្តិ ជំរុញឲ្យសាលារាជធានីភ្នំពេញ ដាក់សម្ពាធឲ្យក្រុមហ៊ុនផានអ៊ីមិច របស់លោកស្រី ស៊ុយ សុផាន សង់អាគារចំនួន១០ជូនពួកគេ តាមកិច្ចសន្យា ដែលបានព្រមព្រៀង តាំងពីឆ្នាំ២០០៤ ខណៈក្រុមហ៊ុននេះ សង់បានតែ៨អាគារ រួចបណ្តេញអ្នកភូមិចេញ ផ្ទុយនឹងកិច្ចសន្យា។
ចំណែកតំណាងអ្នកភូមិបឹងកក់ ធ្លាប់ឲ្យដឹងដែរថា អនុក្រិត្យរបស់លោកនាយករដ្ឋមន្ត្រី បានកាត់ដីនៅតំបន់នោះ១២.៤៤ហិកតា តាំងពីឆ្នាំ២០១១ សម្រាប់ពលរដ្ឋ ជិត១០០០គ្រួសារនៅតំបន់នោះ។ ប៉ុន្តែអ្នកស្រីថា មកដល់ពេលនេះពួកគេប្រមាណ៤០គ្រួសារទៀត មិនទាន់ទទួលប័ណ្ណកម្មសិទ្ធិ តាមអនុក្រិត្យនៅឡើយ៕
No comments:
Post a Comment