បក្សប្រឆាំង រម្លឹកខួប ១៧ មេសា ដោយជំរុញ ឲ្យវែកមុខ អតីត មេដឹកនាំ ខ្មែរក្រហម បន្ថែមទៀត
ពិធីបង្សុកូល រាប់បាត្រ របស់ គណបក្ស សង្គ្រោះជាតិ នៅសារមន្ទីរ ប្រល័យពូជសាសន៍ ជើងឯក ជាយរាជធានី ភ្នំពេញ។ CNRP
ដូចការគ្រោងទុក គណបក្ស សង្គ្រោះជាតិ នៅព្រឹកថ្ងៃ ទី១៧
មេសានេះ បានរៀបចំ ពិធី បង្សុកូល រាប់បាត្រ
ឧទ្ទិសកុសល ដល់ជនរងគ្រោះ ដែលបានស្លាប់ បាត់បង់ជីវិត នៅក្នុងរបប
ប្រល័យពូជសាសន៍ ប៉ុល ពត។ ពិធី បែបសាសនានេះ បានធ្វើឡើង នៅសារៈមន្ទីរ ឧក្រិដ្ឋកម្ម ប្រល័យពូជសាសន៍ ជើងឯក ដោយគ្មាន វត្តមាន មេបក្សប្រឆាំង ទាំងពីរ នោះទេ។
បក្សប្រឆាំង បានរៀបរាប់ ពីទុក្ខវេទនា របស់ ប្រជាពលរដ្ឋខ្មែរ ក្នុងសម័យប៉ុល ពត និងបានជំរុញ ឲ្យតុលាការ បន្តស្រាវជ្រាវ វែកមុខ មេដឹកនាំ ខ្មែរក្រហម យកមកកាត់ទោស បន្ថែមទៀត។
នៅព្រឹកថ្ងៃព្រហស្បតិ៍នេះ គណបក្សសង្គ្រោះជាតិបានរៀបចំពិធីបង្សុកូលរម្លឹកខួបដល់ វិញ្ញាណក្ខណ្ឌជនរងគ្រោះដែលបានស្លាប់បាត់បង់ជីវិតក្នុងសម័យខ្មែរ ក្រហម។លោក សម រង្ស៊ី និង លោក កឹម សុខា ប្រធាន និង អនុប្រធានគណបក្សសង្គ្រោះជាតិដែលកំពុងស្ថិតនៅឯក្រៅប្រទេសមិនមាន វត្តមានក្នុងពិធីនេះទេ។ យ៉ាងណាដ៏ដោយ ពិធីបង្សុកូលនេះប្រារព្ធធ្វើឡើងដោយមានព្រះសង្ឃប្រមាណជិត ១០០អង្គ រួមទាំងមានសកម្មជន និង អ្នកគាំទ្រគណបក្សសង្គ្រោះជាតិប្រមាណ ជាង ២០០នាក់ផ្សេងទៀតបានចូលរួម។
នៅក្នុងពិធីនេះ ប្រជាពលរដ្ឋរងគ្រោះ និងដែលមានសាច់ញាតិបានបាត់បង់ជីវិតនៅក្នុងសម័យខ្មែរក្រហមបាន ឡើងថ្លែងរៀបរាប់ពីទុក្ខវេទនា និងការឈឺចាប់ចំពោះរបបប្រល័យពូជសាសន៍ ៣ឆ្នាំ ៨ ខែ និង ២០ថ្ងៃនេះ។ ជារបបប្រល័យពូជសាសន៍ដែលបានសម្លាប់ជីវិតមនុស្សប្រមាណជិតពីរលាន នាក់។
លោក ម៉ៅ មុនីវណ្ណ មន្ត្រីជាន់ខ្ពស់ និង តំណាងឲ្យគណបក្សសង្គ្រោះជាតិ ក៏បានថ្លែងពីដើមកំណើតខ្មែរក្រហម ដោយចោទថាមានជាប់ពាក់ព័ន្ធនឹងប្រទេសវៀតណាម។ លោក ម៉ៅ មុនីវណ្ណបានបន្ថែមថា គណបក្សសង្គ្រោះជាតិនៅតែជំរុញឲ្យតុលារការខ្មែរក្រហមបន្តស្រាវ ជ្រាវវែកមុខមេដឹកនាំខ្មែរក្រហមបន្ថែមទៀត និង ឈានដល់ការកាត់ទោសដល់បុគ្គល និង ប្រទេសដែលពាក់ព័ន្ធផងដែរ។ ក្រៅតែពីតំណាងរាស្ត្រមួយចំនួនរបស់គណបក្សសង្គ្រោះជាតិក៏មានការ ចូលរួមផងដែរពីសមាជិកព្រឹទ្ធសភាមកពីគណបក្ស សម រង្ស៊ី។
គួរកត់សម្គាល់ថា នៅព្រឹកមិញនេះក៏មានការប៉ះទង្គិចគ្នាបន្តិចបន្តួចរវាងសកម្មជន គណបក្សសង្គ្រោះជាតិ និង អាជ្ញាធរខណ្ឌដង្កោផងដែរ។ការប៉ះទង្គិចនេះ គឺដោយសារសកម្មជនគណបក្សសង្គ្រោះជាតិបានចែកចាយឌីសវីដេអូនិយាយ អំពីកោះត្រល់ និង ឌីសបង្ហាញពីសកម្មភាពបង្ក្រាបផ្សេងៗរបស់អាជ្ញាធរទៅលើប្រជាពលរដ្ឋ នាពេលកន្លងមក ក៏ប៉ុន្តែអាជ្ញាធរបានរារាំង និង ដកហូត៕
No comments:
Post a Comment