លោក ថោង ខុន៖ អង្គរសង្ក្រាន នាំចំណូល ៣០ លានដុល្លា ដល់ខេត្ត សៀមរាប
ភ្ញៀវទេសចរ កំពុងដើរកំសាន្ត នៅតាមតំបន់ប្រាសាទនានា ក្នុងតំបន់អង្គរ ខេត្តសៀមរាប។
ព្រឹត្តិការណ៍ អង្គរសង្ក្រាន ដែលបានរៀបចំ ធ្វើរយៈពេល ៣ថ្ងៃ ក្នុងខេត្ត សៀមរាប បានបិទបញ្ចប់ហើយ កាលពីល្ងាច ថ្ងៃពុធ ទី១៦
មេសា ដែលជាថ្ងៃ ចុងក្រោយ នៃពិធីបុណ្យ ចូលឆ្នាំខ្មែរ។
មានភ្ញៀវ ទេសចរជាតិ ប្រមាណជា ២៥
ម៉ឺននាក់ និងទេសចរ បរទេស ២ម៉ឺននាក់ បានចូលរួម ក្នុងព្រឹត្តិការណ៍នេះ ដែលបាន នាំចំណូល ប្រមាណ ៣០លានដុល្លារ អាមេរិក ចាក់ចូល ក្នុងសេដ្ឋកិច្ច
ខេត្តសៀមរាប។ នេះ បើ យោងតាម លោក ថោង ខុន រដ្ឋមន្ត្រី ក្រសួង ទេសចរណ៍។
ប៉ុន្តែ
ក៏មានបញ្ហា មួយចំនួនដែរ ដែលធ្វើ ឲ្យភ្ញៀវទេសចរ មិនសប្បាយចិត្ត។
RFI | ១៧ មេសា ២០១៤
ព្រឹត្តិការណ៍ អង្គរសង្ក្រាន ដែលរៀបចំឡើង ដោយសហភាព សហព័ន្ធ យុវជនកម្ពុជា ក្នុងខេត្ត សៀមរាប ដើម្បី អបអរសាទរ ពិធីបុណ្យ ចូលឆ្នាំថ្មី បានបិទបញ្ចប់ហើយ កាលពីល្ងាច ថ្ងៃពុធ ទី១៦ មេសា ដែលជាថ្ងៃ ចុងបញ្ចប់ នៃពិធីបុណ្យ ចូលឆ្នាំខ្មែរ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងឲ្យដឹងថា ក្នុងរយៈពេល៣ថ្ងៃនៃពិធីបុណ្យចូលឆ្នាំថ្មីនេះ មានភ្ញៀវទេសចរជាតិមិនតិចជាង២៥ម៉ឺននាក់និងទេសចរបរទេសប្រមាណ២ម៉ឺន នាក់បានទៅទស្សនាខេត្តសៀមរាបនិងបានចូលរួមកម្សាន្តសប្បាយក្នុង ព្រឹត្តិការណ៍អង្គរសង្ក្រាន។ ភ្ញៀវទេសចរទាំងនោះបាននាំចំណូលប្រមាណ ៣០ លានដុល្លាចាក់ចូលក្នុងចរន្តសេដ្ឋកិច្ចខេត្តសៀមរាប។
ក្រៅពីនោះ ព្រឹត្តិការណ៍នេះក៏បានធ្វើឲ្យពិភពលោកស្គាល់កម្ពុជាកាន់តែច្បាស់ និងចង់មកទស្សនាកម្ពុជាកាន់តែច្រើនឡើងថែមទៀត។ លោករដ្ឋមន្ត្រីបានអះអាងថា នឹងបន្តរៀបចំព្រឹត្តិការណ៍ធំៗជាបន្តទៀតដើម្បីទាក់ទាញភ្ញៀវ ទេសចរណ៍ដូចជាអង្គរសង្ក្រាន បុណ្យទន្លេនិងបុណ្យសមុទ្រជាដើម។
សូមបញ្ជាក់ថា ក្នុងរយៈពេល៣ថ្ងៃនៃពិធីបុណ្យចូលឆ្នាំខ្មែរនេះ ទីក្រុងភ្នំពេញមានសភាពស្ងប់ស្ងាត់ ប៉ុន្តែ តំបន់រមណីយដ្ឋានទេសចរណ៍នានាជាពិសេសតំបន់អង្គរនិងតំបន់ឆ្នេរមាន មនុស្សយ៉ាងច្រើនកុះករ។ ជាពិសេសខេត្តសៀមរាបបានទទួលភ្ញៀវទេសចរច្រើនជាងគេដោយសារតែ ព្រឹត្តិការណ៍អង្គរសង្ក្រាន។ ទន្ទឹមនឹងការធ្វើដំណើរកម្សាន្តក្នុងស្រុក ក៏មានពលរដ្ឋខ្មែរជាច្រើនដែរបានធ្វើដំណើរកម្សាន្តទៅក្រៅប្រទេស ។
បើយោងតាមលោក អាង គឹមអ៊ាង ប្រធានសមាគមទីភ្នាក់ងារទេសចរណ៍កម្ពុជា ឆ្នាំនេះ មានអ្នកចេញទៅក្រៅប្រទេសអំឡុងពេលចូលឆ្នាំថ្មីកើនលើសឆ្នាំមុន ស្ទើរ ១០០ ភាគរយ។ គោលដៅទេសចរណ៍នៅក្រៅប្រទេសមានដូចជា ម៉ាឡេស៊ី សាំងហ្គាពួរ ចិន ជប៉ុន កូរ៉េ សហរដ្ឋអាមេរិក និងអូស្ត្រាលីជាដើម។
យ៉ាងណាក៏ដោយ ក្រុមអ្នកជំនាញទេសចរណ៍បានកត់សម្គាល់ថា ហេដ្ឋារចនាសម្ព័ន្ធទេសចរណ៍កម្ពុជានៅខ្វះខាតយ៉ាងច្រើន។ អ្នកធ្វើដំណើរជាច្រើនបានត្អូញត្អែរអំពីស្ថានភាពផ្លូវដ៏លំបាក ទៅកាន់ខេត្តសៀមរាប។ ក្រៅពីនោះ តម្លៃម្ហូបអាហារ បន្ទប់សណ្ឋាគារផ្ទះសំណាក់ក៏ឡើងថ្លៃខ្ពស់និងមិនអាចទទួលភ្ញៀវ គ្រប់គ្រាន់ទេ។ ទាំងនេះជាបញ្ហាដែលធ្វើឲ្យភ្ញៀវមួយចំនួនមិនសប្បាយចិត្ត៕
No comments:
Post a Comment