កម្មករម្នាក់ ដែលរបួសក្បាល ធ្ងន់ធ្ងរ ក្នុងហេតុការណ៍ នៅផ្លូវ វ៉េងស្រេង បានស្លាប់
ដោយ អ៊ុក សាវបូរី / RFA | 17 May 2014
សាកសព កម្មករ ឈ្មោះ មួន សុខមឿន អាយុ
២៩ឆ្នាំតម្កល់ នៅវត្តសំបួរមាស
ដែលរងរបួសក្បាល ធ្ងន់ធ្ងរ ក្នុងហេតុការណ៍ កងកម្លាំង អាជ្ញាធរ បង្ក្រាបការតវ៉ា របស់ កម្មករ នៅផ្លូវ វ៉េងស្រេង កាលពីថ្ងៃទី៣ ខែមករា
បានស្លាប់ នាម៉ោង ៣ទៀបភ្លឺថ្ងៃ ទី១៧ ខែឧសភា ឆ្នាំ២០១៤។
RFA/Ouk Savborey
កម្មករ ម្នាក់ទៀត ដែលរបួស នៅក្នុងហេតុការណ៍ កងកម្លាំង អាជ្ញាធរ បង្ក្រាបការតវ៉ា របស់ កម្មករ នៅសួនឧស្សាហកម្ម កាណាឌីយ៉ា តាមបណ្ដោយ ផ្លូវ វ៉េងស្រេង បានស្លាប់ នៅម៉ោង ៣ទៀបភ្លឺ ថ្ងៃសៅរ៍ ទី១៧ ខែឧសភា ដោយសារ របួសគ្រាំ ក្នុងក្បាល បានរើឡើង។
កម្មកររូបនោះមានឈ្មោះ មួន សុខមឿន អាយុ ២៩ឆ្នាំ មានស្រុកកំណើតនៅភូមិរលាំងទឹក ឃុំស្រង់ ស្រុកគងពិសី ខេត្តកំពង់ស្ពឺ ធ្លាប់ជាកម្មករនៅរោងចក្រមួយក្នុងសួនឧស្សាហកម្មកាណាឌីយ៉ា។ មួន សុខមឿន ត្រូវវាយអោយរបួសក្បាលធ្ងន់ធ្ងរ និងងងឹតភ្នែកខាងឆ្វេង នៅពេលកម្លាំងអាជ្ញាធរចុះទៅបង្ក្រាបការតវ៉ារបស់កម្មករ ដែលទាមទារដំឡើងប្រាក់ខែគោល ១៦០ដុល្លារ នៅលើផ្លូវវ៉េងស្រេង កាលពីថ្ងៃទី៣ ខែមករា ឆ្នាំ២០១៤។
ក្រុមគ្រួសារ មួន សុខមឿន បញ្ជាក់ថា របួសចាស់នៅតែបន្តធ្វើទុក្ខរូបគេ ហើយកាន់តែរើខ្លាំងឡើងៗ ប៉ុន្តែគ្រួសារគេពុំមានប្រាក់សម្រាប់ព្យាបាលឡើយ រហូតគេស្លាប់នៅក្នុងផ្ទះជួលក្នុងសង្កាត់ចោមចៅ ខណ្ឌពោធិ៍សែនជ័យ។ ក្រុមគ្រួសារបានដឹកសពតាមម៉ូតូ ចេញពីផ្ទះជួលទៅតម្កល់នៅវត្តសំបួរមាស ក្នុងខណ្ឌដង្កោ រាជធានីភ្នំពេញ។ លើសពីនេះ ពួកគេក៏កំពុងខ្វះខាតថវិកាធ្វើបុណ្យសពតាមប្រពៃណី។
ការស្លាប់របស់ មួន សុខមឿន បន្សល់ទុកភរិយាអោយមេម៉ាយ និងកូនប្រុសអាយុ ៣ឆ្នាំ អោយកំព្រាឪពុក។
No comments:
Post a Comment